جوبانىڭ ىسكە اسۋىنا قاراعاندى وبلىس اكىمدىگى قولداۋ ءبىلدىرىپ, ۇلتتىق رۋحانياتتىڭ ۇلكەن جاناشىرى دۇيسەن قاسەيىنوۆ مۇرىندىق بولعان.
– مۇنداي نىساندار باۋىرلاس حالىقتار ءبىرىن-ءبىرى جاقسى تانۋىنا اسەر ەتەدى. سوندىقتان ەكى قانداس ەلدىڭ ىنتىماعىن ىدىراتپاس وسىنداي تاريحي مۇرالارىمىزدىڭ سانى ارتا بەرسىن. ەكى ەلدىڭ تىعىز بايلانىسىن ءبىزدىڭ ۇرپاقتار ءبىلىپ ءوسۋى كەرەك, – دەپ اتاپ ءوتتى ەتيمەسگۋت اۋدانىنىڭ باسشىسى ەنۆەر دەميرەل.
تۇرىك اعايىنداردىڭ ايتۋىنشا, ەندى بۇل ەسكەرتكىش ەكى ەل اراسىنداعى اينىماس بىرلىكتىڭ بەلگىسى بولماق. تۋىندى اۆتورى مۇرات مانسۇروۆ تۇلعانىڭ بەينەسىن مۇسىندەۋ وڭايعا تۇسپەگەنىن ايتادى. «ونىڭ ورلىگى, بويىنداعى مىنەزىن ءبىر بەينەگە سىيعىزۋعا تىرىستىق», – دەيدى اۆتور. 2,5 توننا قولادان قۇيىلعان ەسكەرتكىش – قاراعاندى وبلىسى اكىمدىگىنىڭ تۇركيا ەلىنە تارتۋى.
وسىناۋ تۇركيا رەسپۋبليكاسىنىڭ 100 جىلدىعىنا وراي ۇيىمداستىرىلعان شاراعا تاتتىمبەت قازانعاپ ۇلىنىڭ ۇرپاعى ارنايى كەلىپتى. انادولىدا باباسىنا ارنالىپ, بوي كوتەرگەن ەسكەرتكىش – قازاق ەلى ءۇشىن زور مارتەبە ەكەندىگىن ايتادى.
«تاتتىمبەت بابامىزدىڭ قۇرمەتىنە قويىلعان ەسكەرتكىشتىڭ اشىلۋ راسىمىنە كۋا بولدىم. تۇرىك اعايىندارعا ايتار العىسىمىز شەكسىز. ءتورىن ۇسىنىپ جاتىر. ەسكەرتكىشتىڭ اشىلۋى تەك تاتتىمبەت ۇرپاقتارىنىڭ, قاراعاندى ەلىنىڭ ەمەس, جالپى قازاققا دەگەن زور قۇرمەت», دەيدى كۇيشىنىڭ ۇرپاعى سلاميدەن نۇركەنوۆ.
تاتتىمبەت قازانعاپ ۇلىنىڭ ەسىمى ۇلىقتالعان جەردە ۇنەمى تاتتىمبەت حالىق اسپاپتارى وركەسترى جۇرەدى. بۇل جولى دا ونەرپازدار انتاليا, انكارا مەن الانياعا بارىپ, جەرگىلىكتى تۇرعىندارعا ءان كەشىن ۇيىمداستىردى.
وسىدان جەتى جىل بۇرىن حالىقارالىق تۇركسوي ۇيىمىنىڭ ۇيىمداستىرۋىمەن انكارا قالاسىندا تاتتىمبەت قازانعاپ ۇلى اتىنداعى ساياباق اشىلعان-تىن. بۇل دا – قازاقستاننىڭ تۇركياداعى ەلشىلىگىنىڭ قولداۋى جانە قاراعاندى وبلىسىنىڭ اكىمدىگىنىڭ اتسالىسۋىمەن جۇزەگە اسقان ەدى. ساياباق – انكارا قالاسى ەتيمەسگۋت مۋنيتسيپاليتەتى تۇرعىندارىنىڭ يگىلىگىنە بەرىلگەن. ەتيمەسگۋت اۋدانىنىڭ باسشىسى ەنۆەر دەميرەلدىڭ ايتۋىنشا, بۇل جەردە اتاقتى كۇيشى دينا نۇرپەيىسوۆا مەن اعارتۋشى احمەت بايتۇرسىن ۇلىنىڭ ەسىمى بەرىلگەن قوس ساياباق تا بار.
انادولىداعى اعايىننىڭ قازاققا دەگەن قۇرمەتى وسىنداي اسقاق بولىپ تۇر.
