قالا تورىندەگى قانىش ساتباەۆتىڭ ەسكەرتكىشىنە گۇل شوقتارىن قويۋدان باستالعان سالتاناتتى ءىس-شارا ش.دىلدەباەۆ اتىنداعى كەنشىلەر سارايىندا جالعاسىن تاپتى. بۇل جەردە بىرقاتار ەڭبەك وزاتىنا ءتۇرلى دەڭگەيدەگى «كەنشى داڭقى» توسبەلگىسى تابىستالدى, باسقا دا سىي-سياپات جاسالدى, ءان-كۇيدەن شاشۋ شاشىلدى. ءبارى دۇرىس-اۋ. بىراق...
«ەڭبەك ادامىن ۇلىقتاۋ» دەپ اتالعان وسى سالتاناتتان جەزقازعان كەنشىلەرىنىڭ اراسىنان شىققان قازاقستاننىڭ ەڭبەك ەرى تۇرسىنبەك ماكىشەۆتىڭ سىرت قالىپ قويعانىن قالاي تۇسىنۋگە بولادى؟ «ەشقانداي دا ءىس-شاراعا شاقىرعان جوق. سونداي جيىن ءوتىپ جاتقانىن ەستىگەن دە ەمەسپىن», دەيدى ءوزى.
سوندا قالاي بولعانى؟ ۇلى عالىم ق.ساتباەۆتىڭ ەسكەرتكىشىنە گۇل شوعىن قويۋ ءراسىمى كەزىندە «قازاقمىس» كورپوراتسياسى» جشس باسقارما توراعاسى ن.نۇريەۆتىڭ قاسىندا كەۋدەسىندە جۇلدىزى جارقىراپ ەڭبەك ەرى اتانعان كەنشى تۇرسا جاراسىمدى بولماس پا ەدى؟ ونىڭ ءوزى دە «جۇلدىزدى جىگىتىمىز ۇمىت قالماسىن» دەپ تاپسىرما بەرە قويماعانعا ۇقسايدى. ايتپەسە, ەڭبەك ەرى ەسكەرۋسىز قالماس ەدى عوي...
سول ءىس-شاراعا قاتىسقان ۇلىتاۋ وبلىسى اكىمىنىڭ ورىنباسارى ۇ.ۇسەنوۆ تە «وسى ولكەدەگى جالعىز ەڭبەك ەرىنىڭ كوزگە شالىنبايتىنى نەسى؟» دەپ, ەشكىمنەن سۇراي قويماعان سىڭايلى. ساتباەۆ قالاسىنىڭ اكىمى ش.اۋباكىردىڭ دە بۇعان ءمان بەرە قويماعانى بايقالادى.
ەلىمىزدە ەڭبەك ەرى اتانعان ازاماتتار سونشالىقتى كوپ ەمەس. بۇل ورايدا, ساتباەۆ قالاسىنىڭ اتى وزىپ تۇر دەسە بولادى. ويتكەنى وبلىستاعى جالعىز التىن جۇلدىزدى ازامات وسى قالادا تۇرادى. وكىنىشكە قاراي, ماڭداي تەرى, اق ادال ەڭبەگى ەل پرەزيدەنتى قاسىم-جومارت توقاەۆتىڭ تاراپىنان لايىقتى باعاسىن العان ەڭبەك ادامىنىڭ باسقاسى باسقا, ناق ارىپتەس كەنشىلەرى ماراپاتتالىپ جاتقان جيىننىڭ تورىنەن تابىلماۋى تۇسىنىكسىز.
ۇلىتاۋ وبلىسى
