ءسامميتتى ۇيىمداستىرۋعا بىرنەشە جىلدان بەرى ۋنيۆەرسيتەتتىڭ ستراتەگيالىق سەرىكتەسى بولىپ كەلە جاتقان «اريەل ۋنيۆەرسيتەتىنىڭ» دە باسشىلىعى مۇددەلى بولعان. بۇل ەكى ۋنيۆەرسيتەت اراسىنداعى بايلانىستىڭ بەرىك ەكەندىگىن ۇقتىرادى. مىسالى, بيىل استانادا يزرايل مەن قازاقستاننىڭ دەنساۋلىق ساقتاۋ جۇيەلەرىن سالىستىرمالى تالداۋ بويىنشا حالىقارالىق كۋرس وتكەن. وندا ءبىلىم بەرۋ باعدارلامالارى مەن عىلىمي جوبالاردى ازىرلەۋ ماسەلەلەرى تالقىلانىپ, ماماندار تاجىريبە الماسقان. وسى جولى ءسامميتتىڭ وتۋىنە دەنساۋلىق ساقتاۋ مينيسترلىگى قولداۋ كورسەتكەن. سامميتكە پارلامەنت سەناتىنىڭ دەپۋتاتى اقمارال ءالنازاروۆا, ءيزرايلدىڭ قازاقستان رەسپۋبليكاسىنداعى جانە قىرعىز رەسپۋبليكاسىنداعى ەلشىسى ەدۆين ناتان يابو گلۋسمان, «QazInnovations» يننوۆاتسيالاردى دامىتۋ جونىندەگى ۇلتتىق اگەنتتىكتىڭ جانە عىلىم قورىنىڭ باسشىلارى, مەديتسينالىق ۋنيۆەرسيتەتتەردىڭ رەكتورلارى, دەكاندار, عالىمدار قاتىستى. سونداي-اق چەحيا, قىتاي, جاپونيا, وڭتۇستىك كورەيا, ليتۆا, وزبەكستان, ءازىربايجان جانە باسقا ەلدەردىڭ ساراپشىلارى, پروفەسسورلارى جانە «اريەل ۋنيۆەرسيتەتىنىنەن» قوناقتار كەلدى.
سامميتتە استانا مەديتسينا ۋنيۆەرسيتەتىنىڭ رەكتورى كامالجان نادىروۆ مەديتسينا ماماندارىن دايارلاۋ ىسىندەگى جاڭاشىلدىقتار تۋراسىندا ورامدى وي ايتتى.
– ۋنيۆەرسيتەت تەك ءبىلىم الىپ, كاسىبي ماشىقتاردى يگەرۋمەن شەكتەلەتىن ورىن ەمەس. كەيىنگى جىلدارى جوعارى وقۋ ورىندارىندا زەرتتەۋ, كاسىپكەرلىك, تسيفرلىق ۋنيۆەرسيتەتتەر مودەلى بويىنشا دامۋ ۆەكتورى بەلسەندى تالقىلانۋدا. قازىر ۋنيۆەرسيتەتتەردىڭ مەملەكەت پەن قوعامداعى الەۋمەتتىك جانە ەكونوميكالىق ماسەلەلەردى شەشۋگە باعىتتالعان ءۇشىنشى ميسسياسى تۋرالى كەڭىنەن ايتىلىپ ءجۇر. قازىرگى ۋنيۆەرسيتەتتىڭ دامۋ پاراديگماسى ۇنەمى وزگەرىپ وتىرادى. ونى بارلىعىمىز ءبىلىپ, كورىپ وتىرمىز. وقۋ باعدارلامالارى مەيلىنشە عىلىمي ىزدەنىستەرگە نەگىزدەلۋدە. مەديتسينا ءبىر ورىندا تۇرمايدى. بۇرىن ءولىم-ءجىتىم دەرەكتەرى ءجيى انىقتالاتىن اۋرۋلاردىڭ ەمى تابىلىپ جاتىر. مۇنىڭ بارلىعى, ارينە, عىلىمي زەرتتەۋلەردىڭ جەتىستىگى دەپ بىلەمىز. كەلەشەكتە ۋنيۆەرسيتەتتەر ستۋدەنتتەردىڭ وسى قابىلەتىن شىڭداۋعا دەن قويادى دەپ ويلايمىز. سونىمەن قاتار ستۋدەنتتەردى كەيىنگى كەزدەرى پايدا بولىپ جاتقان جاڭا ماماندىقتارعا ەرتەرەك دايىنداۋىمىز كەرەك. مۇنداي ماماندىقتار سالادا بارشىلىق, – دەدى رەكتور.
ىزىنشە, رەكتور استانا مەديتسينا ۋنيۆەرسيتەتىنىڭ سالاداعى ماسەلەلەرگە قاتىستى ۇسىنىستار ازىرلەپ, جاڭا باستامالار قالىپتاستىرۋعا, يدەيا الماسىپ ىنتىماقتاستىقتى نىعايتۋ ماقساتىندا مەديتسيناداعى ءبىلىم, عىلىم مەن پراكتيكاعا قاتىستى ۇسىنىستاردى تالقىلاۋ ماڭىزدى ەكەنىن ەسكە سالدى. بۇل رەتتە شەتەلدىك قوناقتار مەديتسيناعا كەيىنگى جىلداردا ەنگىزىلگەن وزگەرىستەرگە ساي مامان دايارلاۋ يدەياسىن قۋاتتادى. سوسىن وندىرىسپەن بايلانىس ورناتۋدىڭ ماڭىزى تۋرالى وي قوزعادى. سامميت باعدارلاماسىندا پلەنارلىق جانە پانەلدىك پىكىرتالاس, رەكتورلار فورۋمى, دەكاندار فورۋمى, مەديتسينالىق تەحنولوگيالاردى جاھاندىق نارىقتارعا شىعارۋعا ارنالعان MedTech پانەلدىك سەسسياسى بار. وسى سەسسيالارعا قاتىساتىن ماماندار فارماتسەۆتيكا سالاسىن دامىتۋعا بايلانىستى ماسەلەلەردى دە تالقىلايدى. سەبەبى مەديتسينانىڭ بارلىق سالاسىندا ءبىلىمدى دە بىلىكتى ماماندار ەڭبەك ەتۋى كەرەك. ءبىر سوزبەن ايتقاندا, سامميتكە كەلگەن قوناقتار ءۇش كۇن مەديتسينا عىلىمى مەن ءبىلىم بەرۋدەگى سوڭعى ۇردىستەردى, جەتىستىكتەردى تالقىلايدى. ءبىلىم بەرۋ ءىسىن ودان ءارى دامىتۋ جولىن ۇسىنادى.
