كەرەكۋدىڭ اقتوعاي اۋدانىن مەكەن قىلعان مەرەكە جانە گۇلزات جانشوقوۆ وتباسى اينالاسىنا سىيلى, ونەگەلى شاڭىراق اتانىپ وتىر. ءسانى مەن سالتاناتى جاراسقان, بەرەكەلى جانۇيا كىم-كىمگە بولسىن ۇلگى. وتباسىنىڭ باستى تىرەگى, قازىعى بالا دەسەك, ۇرپاقتىڭ تاربيەلى بولىپ وسۋىنە وتباسىنداعى بەرەكەنىڭ اسەرى مول. گۇلزات – جەتى بالانى دۇنيەگە اكەلگەن التىن القالى انا. بالالارىنىڭ بارلىعى جاس, الدى مەكتەپ قابىرعاسىنداعى ورتاڭعى بۋىنعا ەندى جەتكەنىنە قاراماستان ول مەملەكەتتىك قىزمەت سالاسىندا ەڭبەك ەتۋگە دە ۇلگەرىپ ءجۇر.
وتاعاسى مەرەكە جانشوقوۆتىڭ ءوزى پوليتسيا قىزمەتىندە تابانى كۇرەكتەي 24 جىل تاپجىلماستان قىزمەت ەتىپ كەلەدى. ۇزاق جىلعى ادال ەڭبەگى ارقىلى ساتىلاپ ءوسىپ, پوليتسيا پودپولكوۆنيگى شەنىن يەلەندى. قازىر اۋداندىق جەرگىلىكتى پوليتسيا قىزمەتىن باسقارىپ, اۋماقتاعى قوعام تىنىشتىعى مەن ءتارتىپتىڭ ساقتالۋىنا جاۋاپ بەرەدى.
«العاشقى قىزمەت جولىم باتالوندىق پوليتسيادان باستالعان ەدى. كەيىن اۋىلدىق جەردە ۋچاسكەلىك ينسپەكتور بولدىم. ۇيدەن ەرتە كەتىپ, ءتۇن ورتاسىندا كەلەمىن. كەيدە جۇبايىم مەن بالالارىم مەنى اپتالاپ كورمەي قالاتىن كەزدەرى دە بولادى. بارلىعى جۇمىس بابىنا قاتىستى بولعان سوڭ, ۇيدەگىلەر قاباق شىتىپ, تۇسىنىسپەۋشىلىك تانىتقانىن كورمەپپىن. اعايىن-تۋىس بولعان سوڭ توي-تومالاققا ءجيى شاقىرادى. الايدا ولارعا بارۋعا مۇمكىندىگىمىز كەلمەي جاتادى. سونداي ساتتەردە كەلىنشەگىم رەنىش تانىتىپ, كەيىگەن ەمەس. وسىنداي تۇسىنىستىك, ءبىر-بىرىمىزگە دەگەن سىيلاستىق پەن ادال ماحاببات, ءوزارا سەنىم وتباسىمىزدىڭ بەرەكەسى ارتۋىنا سەبەپ دەپ ويلايمىن. ءتىپتى ايلاپ ىسساپارعا شىعىپ كەتەتىن ۋاقىتتا دا وتباسىمدا ۇيىعان تىرلىكتىڭ ساقتالىپ تۇرعانىنا ەش كۇمانىم بولمايدى. كىشكەنتايلارىمىز شەتىنەن تاربيەلى, اناسىنىڭ ايتقانىنان شىقپايتىنىن كورىپ ريزا بولاتىنىم دا بار. شارشاعان ساتتەردەگى كوڭىل كۇيىمىزدى قاباعىمىزعا قاراپ ۇعىنىپ وتىرادى», دەيدى مەرەكە شاعىبان ۇلى.
گۇلزاتتىڭ ءوزى مەملەكەتتىك قىزمەت سالاسىندا 14 جىلداي ىستەگەن. بالالارىنىڭ الدى 13-كە ەندى جەتكەن انانىڭ قايسارلىعى مەن ەڭبەكقورلىعىنا تاڭعالماسقا شارا جوق. «ۇيدە بالالار تاربيەسى, تۇزدە قىزمەتپەن اينالىسۋعا ۋاقىت قالاي تاباسىز؟» دەپ سۇرادىم.
«سەرىگىم بەس قىزدىڭ اراسىندا جالعىز ەر بالا بولىپ وسكەن ەكەن. وتباسى قۇرعان سوڭ تۇڭعىشىمىزدان كەيىنگى بالا ۇل, ودان سوڭ بىرىنەن سوڭ ءبىرى قىز بالالار دۇنيەگە كەلگەندە ەنەمنىڭ ويىندا ءوز ۇلىنىڭ سوڭىنان جالعىز ەر بالا عانا ەرىپ قالا ما دەگەن كۇدىك بولىپتى. كەيىن تاعى ەر بالانى ومىرگە اكەلگەنىمدە, ول كىسىنىڭ ريزا بولعانىن كورسەڭىز, دەيدى جىميىپ كوپبالالى انا. – مەن ءۇشىن اۋلەت ۇلكەندەرىنىڭ ءۇمىتىن اقتاۋ پارىز دەپ ويلايمىن. ال شاڭىراعىمىزدىڭ ءسانى – بالالارىمىز, الداعى عۇمىرىمىزدىڭ بارلىق ءمانى سولار بولىپ وتەتىنىن ءتۇيسىندىم».
قازىرگى كۇنى تۇڭعىش قىزدارى وبلىس ورتالىعىنداعى كوپسالالى دارىندى بالالارعا ارنالعان ليتسەي-ينتەرناتىندا ءبىلىم الىپ جاتىر. ۇلدارىنىڭ ۇلكەنى – كەكۋشينكاي-كاراتەدان ءتۇرلى دەڭگەيدەگى جارىستىڭ بىرنەشە دۇركىن جەڭىمپازى. بالالارى اكەسىندەي قايراتتى, سپورتشىل, نامىسقوي بولىپ وسسە دەگەن ارمانى بار.
گۇلزاتتىڭ پىكىرىنشە, وتباسى بەرەكەسىنىڭ كىلتى – ەرلى-زايىپتىلاردىڭ ءبىرىن-ءبىرى تىڭداي بىلۋىندە. وتباسى بولعان سوڭ ىدىس-اياق سىلدىراماي تۇرمايتىنى بەلگىلى. ايەل ادام توزىمدىلىك تۇرعىسىنان ەرىنە قاراعاندا ەكى ەسە بەرىك بولۋعا ءتيىس, ءبىر-ءبىرىمىزدى ۇنەمى قولداپ, قيىن ساتتە سۇيەۋ بولۋىمىز كەرەك دەپ ەسەپتەيدى.
«شاڭىراعىمىزدا بۇلجىماس داستۇرگە اينالعان قۇندىلىقتاردىڭ قالىپتاسۋىنا اتا-انامىزدىڭ بىزگە بەرگەن وڭ تاربيەسى ىقپال ەتتى دەپ ويلايمىن. انام ءار كەز ەر ازاماتىڭنىڭ التىن باسىن قادىرلەسەڭ ۇتىلمايسىڭ, سابىرلى بول, ۇرپاعىڭا ونەگەلى تاربيە بەر دەگەن اقىلىن ايتىپ وتىرادى. اتا-ەنەمنىڭ قولداۋىن دا ايرىقشا سەزىنەمىن. «ۇيادا نە كورسەڭ, ۇشقاندا سونى ىلەرسىڭ» دەگەن اسىل ءسوز تەككە ايتىلماعان», دەيدى انا.
پاۆلودار وبلىسى,
اقتوعاي اۋدانى
