– اۋدان ورتالىعىندا 4 وتباسى جاڭا باسپاناعا يە بولدى. بۇل ۇيلەردى الۋ ەلىمىزدەگى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا باستاپقى نارىقتان تۇرعىن ءۇي ساتىپ الۋ ارقىلى مۇمكىن بولىپ وتىر. اقسۋ-ايۋلى اۋىلىنان بولەك, اۋدانىمىزدىڭ اقادىر, ساكەن سەيفۋللين كەنتتەرىندە 26 وتباسىنا وسىنداي جاڭا پاتەرلەردىڭ كىلتى تابىس ەتىلدى. باسپانانى قولجەتىمدى ەتۋ – ۇكىمەت پەن جەرگىلىكتى اكىمدىكتەر تاراپىنان جۇزەگە اسىرىلىپ جاتقان ماڭىزدى جوسپارلاردىڭ ءبىرى. حالىقپەن ءار كەزدەسۋدە ءجيى كوتەرىلەتىن ماسەلە بىرتىندەپ وڭ شەشىمىن تاۋىپ جاتىر. بارشاڭىزدى بۇگىنگى قونىس تويلارىڭىزبەن شىن جۇرەكتەن قۇتتىقتايمىن! جاڭا باسپانالارىڭىزدىڭ ءىشى قۋانىش پەن شاتتىققا تولسىن, – دەدى اۋدان باسشىسى م.مۇحتاروۆ.
پاتەرلى بولعان وتباسىلار مەملەكەتتىك باعدارلاما اياسىندا باستاپقى نارىقتان ءۇي الۋعا كومەك قولىن سوزعان اۋدان اكىمشىلىگىنە العىسىن جەتكىزدى. بۇل ازاماتتار – وسىعان دەيىن الەۋمەتتىك وسال توپتاعى جانە كوپبالالى وتباسىلار ساناتىندا ءۇي كەزەگىندە تۇرعاندار.
– كوپ ۋاقىتتان بەرى پاتەر جالداپ كەلدىك. مىنە, جاڭا پاتەر ءبىز ءۇشىن ۇلكەن سىي بولدى. ەرەكشە قۋانىشتىمىز. اتا-انالارىمىز دا قۋانىپ جاتىر. قونىستوي تويلايمىز. ءار قازاق باسپانالى بولسىن, – دەيدى جاڭا پاتەر يەسى نۇرلان يگەنوۆ.
بيىل «نۇرلى جەر» مەملەكەتتىك باعدارلاماسى اياسىندا اقادىر كەنتىندەگى 12 پاتەرلى ەكى تۇرعىن ءۇيدىڭ قۇرىلىسى اياقتالىپ, پاتەر كىلتى تاعى بەرىلەدى. سونداي-اق اقسۋ-ايۋلى اۋىلىندا 24 پاتەرلى تۇرعىن ءۇيدىڭ قۇرىلىسى باستالدى. قوسىمشا جاڭادان سالىنىپ جاتقان ءبىرىنشى نارىقتاعى تۇرعىن ۇيلەردەن جالپى 32 پاتەر ساتىپ الۋ جوسپارلانىپ وتىر.
قاراعاندى وبلىسى,
شەت اۋدانى
