بىلتىرعىنى ەسەپكە الماعاننىڭ وزىندە, بيىل 147 ملرد تەڭگەگە 11 جاڭا ءوندىرىس ىسكە قوسىلدى. ياعني 2 مىڭنان اسا جۇمىس ورنى اشىلدى. كاسىپورىننىڭ كوپشىلىگى جۇمىسكەرگە ءزارۋ. ال جۇمىسسىز جاستاردىڭ جاعاسى – جايلاۋدا. ءسوز ەتەر سىلتاۋلارى «جۇمىس جوق», «تانىس-تامىر كەرەك», «تازا جۇمىس كەرەك» سەكىلدى تاعىسىن تاعى. كەيىنگى ۋاقىتتا شەتەل اسىپ, جاقسى جالاقىعا جۇمىس ىستەپ جاتقان جانداردىڭ جارناماسى الەۋمەتتىك جەلىدە تولىپ ءجۇر. ينتەرنەتتەگى الاياقتارعا بۇل دا «مال تابۋدىڭ» ءتيىمدى تەتىگى بولىپ تۇر. جاستاردىڭ كوبى «قۇجات جاساتامىز, بيلەت الامىز» دەگەندەردىڭ قۇرىعىنا وڭاي تۇسەدى. وسىدان كەلىپ ءىش ۋداي اشيدى: وتاندىق كاسىپورىنداردىڭ جوعارى جالاقى ۇسىنعان جۇمىسىن قاجەت قىلمايدى, قارا جۇمىستان قاشادى.
جاستاردىڭ جالاقىسى جوعارى جۇمىسقا سۇرانىپ, جانىن قيناماي, بولىپ-تولعىسى كەلەتىنىن جاسىرىپ قايتەمىز. بۇعان تسيفرلىق كورسەتكىشتىڭ دە قاجەتى جوق. زاڭگەر, ەكونوميست جانە وسى سەكىلدى «تازا» جۇمىسقا قىزىعاتىندار كوپ.
«ارينە, اتالعان ماماندىقتار دا كەرەك. ونى مۇلدەم جوققا شىعارا المايمىز. ايتسە دە, بۇگىندە وبلىسىمىزعا جۇمىسشى ماماندارى اۋاداي قاجەت ەكەنىن دە ەسكەرگەن ءجون. جۇمىسشى ماماندىقتاردىڭ جالاقىسى وزگەلەردەن بىرنەشە ەسە ارتىق. كاسىپورىندار ءوز قاراجاتىنا شەتەلدە وقىتىپ, مامان دايارلاۋعا مۇددەلى. وقىعان-توقىعانى قاجەت دەپ قول قۋسىرىپ وتىرعان جوق. بۇل ماماندىعى جوق جاستار ءۇشىن دە وتە وڭتايلى», دەيدى وبلىستىڭ ونەركاسىپ جانە يندۋستريا-يننوۆاتسيالىق دامۋ باسقارماسىنىڭ باسشىسى دارىن بۇلقايىر.
تاعى دا ايتىپ وتەلىك, ايماعىمىزدا 1,5 ترلن تەڭگەگە 55 ءىرى ينۆەستيتسيالىق جوبا پۋلى قالىپتاستىرىلعان. بۇل – 13 مىڭ جۇمىس ورنى. جالاقى دا ءتاپ-ءتاۋىر. جاستاردى وندىرىستەگى جۇمىسقا تارتۋ جونىندە نەبىر ءىس-شارالاردى قولعا السا دا, قوزعالىستىڭ جوقتىعىن ايتادى دارىن بەيبىت ۇلى.
«قازىر جاستاردىڭ باسىم بولىگى, اتاپ ايتقاندا, 50-60 پايىزى ءوز ماماندىقتارى بويىنشا جۇمىس ىستەمەيدى. وسىلايشا, جۇمىسسىز جاستار سانى ارتادى. ءبىز ءوز تاراپىمىزدان وڭىردەگى جۇمىس ورىندارى تۋرالى اقپارات بەرىپ وتىرۋعا تىرىسامىز. وقۋ ورىندارىمەن جانە كاسىپورىندارمەن مەموراندۋمعا وتىرىپ, كەزدەسۋلەر وتكىزەمىز. ودان بولەك, جاستاردىڭ بولاشاقتا تۇراقتى جۇمىس ورىندارىندا قالۋلارى ءۇشىن ناقتى ماماندىقتارعا مەملەكەتتىك تاپسىرىس ارقىلى تەگىن وقۋدى ۇيىمداستىرامىز. ال وقۋ ورنىن بىتىرگەندەر شەتەلدە تاعىلىمدامادان ءوتىپ, بىلىكتىلىكتەرىن شىڭدايدى. بىلىكتى مامان قاشاندا سۇرانىسقا يە», دەيدى د.بۇلقايىر.
قاراعاندىدا اۆتوبۋستان باستاپ, تۇرمىستىق تەحنيكا, كۇندەلىكتى قولدانىستاعى ۇساق-تۇيەكتىڭ ءتۇر-ءتۇرى شىعادى. وڭىرىمىزدەن شىققان ونىمگە ىرگەلەس شەتەلدىڭ سۇرانىسى دا جوعارى. ساران قالاسىنداعى «Kama TyresKZ» جاۋاپكەرشىلىگى شەكتەۋلى سەرىكتەستىگىندە جەڭىل كولىكتىڭ دوڭگەلەگىنەن باستاپ, اۋىل شارۋاشىلىعىنىڭ اۋىر تەحنيكالارىنا ارنالعان شينالار دا شىعادى. مىڭنان اسا جۇمىس ورنى بار كاسىپورىننىڭ جۇمىسى ءالى تولىق قۋاتىنا ەنە قويعان جوق. نەگە دەسەڭىز, بۇعان دا باستى سەبەپ – جۇمىس كۇشىنىڭ كەمدىگى. كاسىپورىن باسشىلىعى جۇمىسكەرلەرىن شەتەلدە وقىتىپ, تاعىلىمدامادان دا وزدەرى-اق وتكىزىپ وتىر.
ء«بىز زاۋىتتا جۇمىس ىستەگىسى كەلەتىندەردى, البەتتە, وزگە وڭىرلەردەن, بولماسا, شەتەلدەن ىزدەمەيمىز. ونىمىز ەكى جاققا دا ءتيىمسىز. بۇل جاعدايدا زاۋىتقا قوسىمشا جاتاقحانا سالۋ كەرەك بولادى. سوندىقتان جۇمىسقا جەرگىلىكتى تۇرعىنداردى الۋعا تىرىسادى. بىراق ءالى دە زاۋىتتا جۇمىس كۇشى جەتكىلىكسىز. كاسىپورىن جۇمىسىنىڭ تولىق قۋاتىنا ەنىپ, جوسپارلى ءونىمدى شىعارۋىنا دا كەدەرگى – جۇمىس كۇشىنىڭ جەتىسپەۋشىلىگى», دەيدى د.بۇلقايىر.
ءبىر اۋىسىمدا 4 اۆتوبۋس دايىنداپ ۇلگەرەتىن Saran يندۋستريالىق ايماعىنداعى «QazTehna» زاۋىتى تاعى بار. بۇل جەردە كادىمگى اۆتوبۋستارمەن قاتار, الەم مەگاپوليستەرى ۇستانعان باعىت – ەلەكترموبيلدەر دە شىعادى. مۇندا دا ەڭبەك ەتەمىن دەگەن جاسقا ەسىك اشىق.
بۇيىرسا بيىل ىسكە قوسىلاتىن تاعى 11 جوبا بار. ولار – تۇرمىستىق تەحنيكا شىعاراتىن «Silk Road Electronics» جشس, جەل قوندىرعىلارىنا ارنالعان كونۋستىق مۇنارا جاسايتىن «United Energy Qazaqstan» جشس, قۇرىلىس ماتەريالدارىن ازىرلەيتىن «Saryopan Operating» جشس سياقتى كاسىپورىندار. بۇل جاڭا كاسىپورىنداردان دا جۇمىس ورنى اشىلادى.
وسىدان كەلە ەرىكسىز ايماقتاعى 6 مىڭنان اسا جاس جۇمىس تاپپاي, «اي قاراپ ءجۇر مە؟» دەيسىز...
تۇركىستان تورىندە وتكەن ۇلتتىق قۇرىلتايدا مەملەكەت باسشىسى قاسىم-جومارت توقاەۆ: «قازاقتىڭ رەنەسسانس ءداۋىرى, ياعني تۇبەگەيلى وزگەرىستەر زامانى كەلەدى. ءبىز, اعا بۋىن وكىلدەرى, ەڭبەكقورلىق, ىسكەرلىك سياقتى قۇندىلىقتاردى ءوزىمىز ۇلگى ەتىپ كورسەتۋ ارقىلى دارىپتەۋىمىز كەرەك. جاستارىمىز كوپ سوزگە قۇمار, جاعىمپاز, جالقاۋ, ەنجار, ماسىل بولماۋعا ءتيىس. ولاردى وسىنداي تەرىس ادەتتەردەن قاشىق بولۋعا ۇيرەتۋىمىز كەرەك», دەگەن ەدى.
جاستاردىڭ جالقاۋ, ەنجارلىعى, شىنىمەن, ەلدىڭ ەرتەڭىنە ءسوزسىز اسەرى بار. دەگەنمەن ۇكىمەت جۇمىسسىزداردىڭ «ەكى قولىنا ءبىر كۇرەك» تاۋىپ بەرىپ وتىر. ال قارا جۇمىستان قاشقان جاستارمەن قاشانعى كۇرەسە بەرمەك؟
قاراعاندى وبلىسى
