ءتۋريزمدى تۇلەتەتىن فەستيۆال

فەستيۆال اياسىندا كاسىپكەرلەرگە ارنايى ورىندار ازىرلەندى. مۇندا ولار ءوز ونىمدەرىن ساۋدالادى. اشىق اسپان استىنداعى اسحانادا ازىرلەنگەن ءتۇرلى ءتىل ۇيىرەر تاعامدار كوپشىلىككە ۇسىنىلدى. باعالارى دا قولجەتىمدى. ۇلتتىق سۋسىنداردان بولەك, «توقىراۋىن» اۋىز سۋ ونىمدەرىن وندىرەتىن كاسىپورىننىڭ باسشىسى زاۋرە مەرعازىقىزى فەس­تيۆالعا 3 توننا سۋسىن اكەلىپتى. بۇعان قوسا «100 يگى ءىس» اكتسياسى اياسىندا بال­قاش قالاسىنداعى «حالىق بانك» قىزمەتكەرلەرى Halyk Bank QR-كودى ارقىلى تولەم قىزمەتىن جاساعاندارعا 1 تەڭگەگە سۋسىن ساتتى. مۇندا مۇمكىندىگى شەكتەۋلى جاندارعا دا جاعداي جاسالدى, ينۆاتاكسي قىزمەت كورسەتتى.

مۋلتفيلم كەيىپكەرلەرى مەن ويىن-ساۋىق باعدارلاماسى جاعا­جايداعى بالالاردىڭ كوڭىلىنە شۋاق سىيلادى. ال جاستار جاعى «جاستار تازا بال­قاش ءۇشىن» اكتسياسىنا جۇ­مىلدى. جاعاجاي ۆولەيبولى, ارمرەستلينگ, ارقان تارتۋ جانە «كوڭىلدى ستارتتار» سياقتى جاعاجايدا تۋرنير­لەر ۇيىمداستىرىلسا, جاپپاي ءجۇزۋ دە جۇرتتىڭ كوڭىلىنەن شىقتى. كول ۇستىندە 500 مەتر قاشىقتىقتى باعىندىرۋعا شىققان جۇزۋشىلەردىڭ ەڭ ۇلكەنى – 58 جاستا, ال كىشىسى – 13-تە. بەلگىلەنگەن ۋاقىتتا مارەگە ءبىرىنشى بولىپ جەتكەن باتىرحان بولاتبەكوۆ سايىسقا تىڭعىلىقتى دايىندىقپەن كەلىپتى. الماتى قالاسىنداعى اسكەري اكادەميادا وقيتىن باتىرحان جارىسقا قاتىسۋ ءۇشىن ءبىر اي كولەمدە «اق تەڭىز» باسسەينىندە ابدەن شىنىعىپتى. جاعاجاي ۆولەيبولىنان وتكەن دودا دا تارتىستى ءوتتى. كىر تاسىن كوتەرۋ سايىسىندا 65 كگ سالماقتا 16 كيلولىق قوس كىر تاسىن 38 رەت كوتەرگەن ەراسىل اليەۆ, 75 كيلودا 101 رەت كوتەرگەن قوبىلاندى جاقىپوۆ چەمپيون اتاندى. سونداي-اق قوس 24 كيلونى 40 رەت كوتەرگەن دميتري كيم 1-ورىنعا كو­تەرىلدى. قول كۇرەستە 65 كيلودا ەر­نات قايسار ۇلى, 75 كيلودا نۇر­لان ءادىلوۆ, 85 كيلودا يسلام مايحى, 95 كيلودا ەۆگەني موسكين جەڭىم­پاز اتاندى.

سونىمەن قاتار جاسىلەلدىكتەر اراسىندا وتكەن جاعالاۋ ۆولەيبو­لىن­دا اقتوعاي اۋدانىنىڭ «بەك­تاۋ اتا» كومانداسى 1-ورىندى يەلەنسە, ارقان تارتىستان بالقاشتىق «توقىراۋىن» كومانداسى جۇلدەگەر اتاندى. سەكىرت­پەمەن سەكىرۋ سايىسىنان «بەكتاۋ اتا» كومانداسىنىڭ مۇشەسى, اقتوعايلىق اقمارال امانوللاقىزى ۇزدىك دەپ تانىلدى. كوكشە تەڭىزدىڭ جاعاسىنداعى جايدارلى ساتكە كۋا بولعان پريوزەرسك قالاسى «جاسىل ەل» جاساعىنىڭ مۇشەسى ايدوس قاناتباي ۇلى «بۇل جيىن جاڭا قادامدارعا باستايدى», دەگەن وي-اسەرىمەن ءبولىستى.

– مەملەكەت باسشىسى قاسىم-جومارت توقاەۆ ءتۋريزمدى تۇلەتۋگە تاپ­سىرما بەردى. وسى باعىتتا بالقاش­تاعى جيىن جاڭا قادامدارعا باستايدى دەپ ويلايمىن. ءبىز پريوزەرسك قالاسىنان كەلدىك. «قورجىنتۇبەك» جانە «توراڭعالىق» اتتى ەكى كوماندا بولىپ قالامىزدىڭ نامىسىن قورعادىق. العان اسەرىم ەرەكشە. ايتا كەتۋ كەرەك, قازىر «جاسىل ەل» جا­ساعى تەك جۇمىس جاساپ قانا قويماي, ءتۇرلى ءىس-شارالارعا دا اتسالىسىپ جاتىر. ماسەلەن, جاقىندا عانا ناشا­­قور­لىقتىڭ الدىن الۋ ءۇشىن سين­تە­تيكالىق ەسىرتكىنىڭ زيانى مەن شو­مىلۋ ماۋسىمىنداعى قاۋىپ­سىزدىك ەرە­جەلەرىن ءتۇسىندىردى, – دەيدى ا.قانات­باي ۇلى.

«بالقاشTourfest – 2023» فەستي­ۆالى اسەم اندەرىمەن, ەرەكشە ويىن-ساۋىق باعدارلامالارىمەن كوپشىلىك كوڭىلىن كوتەردى. كوبىكتى كەش پەن ەسترادا جۇلدىزدارىنىڭ مەرەكەلىك كونتسەرتى فەستيۆالدى ءساتتى تۇيىندەدى. ءتۋريزم­دى تۇلەتۋگە باعىتتالعان «بال­قاشTourFest» فەستيۆالى داستۇرگە اينال­ماق.

قاراعاندى وبلىسى,

بالقاش قالاسى