«پرەزيدەنت ءوز جولداۋىندا گەوساياسي جانە ەكونوميكالىق سىلكىنىستەر الەمىندە قازاقستان ءوزىنىڭ كۇشتى جاقتارىن باسەكەلەستىك ارتىقشىلىقتارعا اينالدىرۋدى ۇيرەنۋ قاجەت ەكەنىن ايتتى. مەن بۇنى بيىلعى جولداۋدىڭ باستى ويى رەتىندە قابىلدادىم. بىزدە رەسۋرستار كوپ, بىراق ينۆەستورلار ءۇشىن قاجەتتى جاعداي تولىق جاسالماعان. بىزدە لايىقتى وندىرۋشىلەر بار, بىراق جۇمىستارى باياۋ, وعان قوسا, ەڭبەك نارىعى قورعالماعان. قازاقستاننىڭ ەكونوميكالىق الەۋەتىن ارتتىرۋ ءۇشىن كەمشىلىكتەردىڭ بارلىعىن جويۋ - ۇكىمەتتىڭ جانە بيلىك تارماقتارىنىڭ باستى مىندەتى. بۇل بيىلعى جولداۋدىڭ ماڭىزدى تەمىرقازىعى دەپ ويلايمىن», دەدى ءلاززات رامازانوۆا.
سونداي-اق ل.رامازانوۆانىڭ ايتۋىنشا, مەملەكەت باسشىسى ەكونوميكا قازىرگى زاماندا ەكولوگيالىق ماسەلەلەرمەن تىعىز بايلانىستا ەكەنىن ايقىن جەتكىزدى. دامىعان ەلدەردىڭ تاجىريبەسىن نەگىزگە الا وتىرىپ, ءبىز ESG قاعيداتتارى بويىنشا يندۋستريالىق ساياسات قۇرۋعا مىندەتتىمىز. «ECOJER» قاۋىمداستىعى وسىدان ەكى جىل بۇرىن سۋ تاپشىلىعى پروبلەماسىن كەشەندى شەشۋ قاجەتتىگىن تالاپ ەتكەن. سوندىقتان سۋ رەسۋرستارى مينيسترلىگىنىڭ قۇرىلۋى اقتالعان تالاپ. ەڭ باستىسى, وندا ساپالى شەشىمدەر قابىلداي الاتىن ناعىز كاسىپقوي ماماندار شوعىرلانۋى كەرەك.
«ەكىنشى اسپەكت - ادامدار. سوڭعى ۇلتتىق قۇرىلتايدا قاسىم-جومارت توقاەۆ, شىن مانىندە, جاڭا الەۋمەتتىك باعدارلامانى جاريالادى, جولداۋدان ءبىز سونىڭ قيسىندى جالعاسىن ەستىدىك. كەز كەلگەن ەكونوميكالىق رەفورمالاردىڭ ينديكاتورى - قاتارداعى قازاقستان ازاماتتارىنىڭ ءومىرى, ءاربىر وتباسى مەن ەرەسەكتەردىڭ جانە بالالاردىڭ الەۋمەتتىك جاعدايى ەكەنى انىق. بىراق ءبىز بالالار تۋرالى ايتقانىمىزدا, ەسكى پروبلەمالار الدىڭعى ورىنعا شىعادى», دەدى ول.
ونىڭ ويىنشا, ءوز بالالارىن قورعاي المايتىن مەملەكەتتە قانداي تابىستار تۋرالى ءسوز بولۋى مۇمكىن؟! بۋللينگ جانە زورلىق-زومبىلىق پروبلەمالارى, وعان قوسا, مەكتەپتەر مەن بىلىكتى پەداگوگتاردىڭ تاپشىلىعى دا بار.
«جولداۋدا ايتىلعانداردى جۇزەگە اسىرۋ بويىنشا ادامداردىڭ ءال-اۋقاتىن ارتتىرۋعا باسىمدىق بەرىلۋى كەرەك», دەپ تۇيىندەدى ءلاززات رامازانوۆا.
