دەپۋتاتتارعا اقتوبە وبلىسىنىڭ اكىمى لاۋازىمىنا نۇرلان قاسىمحان ۇلى قىزبەرگەنوۆ پەن اسحات بەرلەش ۇلى شاحاروۆتىڭ كانديداتۋراسى ۇسىنىلدى.
اشىق داۋىس بەرۋدىڭ ناتيجەسىندە 119 دەپۋتات اسحات شاحاروۆقا, 55 دەپۋتات نۇرلان قىزبەرگەنوۆكە داۋىس بەردى. جينالىسقا بارلىعى 174 دەپۋتات قاتىستى.
داۋىس بەرۋ قورىتىندىسى بويىنشا مەملەكەت باسشىسى اسحات شاحاروۆتى اقتوبە وبلىسىنىڭ اكىمى لاۋازىمىنا تاعايىنداۋ تۋرالى جارلىققا قول قويدى.
وبلىس اكتيۆىمەن كەزدەسۋ بارىسىندا ولجاس بەكتەنوۆ ءوڭىردىڭ جاڭا اكىمىن تانىستىردى. پرەزيدەنت اكىمشىلىگى باسشىسىنىڭ ايتۋىنشا, اسحات شاحاروۆتىڭ جاۋاپتى باسشىلىق قىزمەتتەردە مول تاجىريبەسى بار. ول ءار جىلدارى باتىس قازاقستان وبلىسى قاراتوبە جانە زەلەنوۆ اۋداندارىنىڭ, اقتوبە قالاسىنىڭ اكىمى بولدى.
ولجاس بەكتەنوۆ ەلىمىزدىڭ ءىرى وندىرىستىك ايماعى سانالاتىن وبلىستى دامىتۋعا زور ۇلەس قوسقانى ءۇشىن ەرالى توعجانوۆقا العىس ايتتى.
سونىمەن قاتار مەملەكەت باسشىسىنىڭ بيىلعى 1 قىركۇيەكتەگى جولداۋىندا بەرگەن تاپسىرمالارىنا ايرىقشا نازار اۋدارىلدى. وبلىس اكىمدىگىنە ءوندىرىس پەن اۋىل شارۋاشىلىعىن ودان ءارى دامىتۋ, جاڭا جۇمىس ورىندارىن اشۋ, شاعىن جانە ورتا بيزنەستى قولداۋ, اۆتوماگيسترال جەلىسىن دامىتۋ, ۇلەسكەرلەردىڭ ماسەلەلەرىن شەشۋ مىندەتى جۇكتەلدى.
بۇدان بولەك, پرەزيدەنت اكىمشىلىگىنىڭ باسشىسى جەرگىلىكتى بيلىك ورگاندارىنىڭ وكىلدەرى ازاماتتارمەن جان-جاقتى بايلانىس ورناتۋى قاجەت ەكەنىن اتاپ ءوتتى.
جيىن سوڭىندا ولجاس بەكتەنوۆ اسحات شاحاروۆقا اقتوبە وبلىسىنىڭ اكىمى لاۋازىمىنداعى جاۋاپتى قىزمەتىنە تابىس تىلەدى.
