فوتو: primeminister.kz
جينالىستا ءاليحان سمايىلوۆ مەملەكەت باسشىسىنىڭ ءوڭىر اكىمى لاۋازىمىنا نۇربول جۇنىسبەكوۆ جانە ەربول قاراشوكەەۆتىڭ كانديداتۋراسىن قاراۋعا ۇسىنۋ تۋرالى حاتىن وقىدى.
اشىق داۋىس بەرۋ قورىتىندىسى بويىنشا 142 دەپۋتات ەربول قاراشوكەەۆتىڭ كانديداتۋراسىن قولداعان. 47 دەپۋتات ن. جۇنىسبەكوۆتى قولداپ داۋىس بەرگەن. داۋىس بەرۋگە بارلىعى 189 دەپۋتات قاتىستى.
ايتا كەتەيىك, مەملەكەت باسشىسىنىڭ جارلىعىمەن ەربول شىراقپاي ۇلى قاراشوكەەۆ جامبىل وبلىسى اكىمى لاۋازىمىنا تاعايىندالدى.
وبلىس اكتيۆىنە جاڭا اكىمدى تانىستىرا وتىرىپ, ءاليحان سمايىلوۆ قازىرگى ۋاقىتتا ءوڭىردىڭ قۇرىلىس, ونەركاسىپ جانە اۋىل شارۋاشىلىعى سالالارىندا وڭ ديناميكا بايقالىپ وتىرعانىن اتاپ ءوتتى.
«وبلىستا شاعىن جانە ورتا بيزنەسپەن بىرگە ءىرى ينۆەستيتسيالىق جوبالار قارقىندى جۇزەگە اسىرىلۋدا. بىرنەشە ءىرى الەۋمەتتىك نىسان سالىنىپ, پايدالانۋعا بەرىلۋدە», دەدى ۇكىمەت باسشىسى.
سونىمەن قاتار پرەمەر-مينيستر ۇكىمەت وڭىرلەردە ازاماتتاردىڭ ءومىر ءسۇرۋ ساپاسىن ارتتىرۋ جونىندەگى شارالاردى ىسكە اسىرۋدى جالعاستىرىپ جاتقانىن اتاپ ءوتتى. اتاپ ايتقاندا, اكىمدىكتەرگە سالىقتاردى پايدالانۋ تۇرعىسىنان قوسىمشا وكىلەتتىكتەر بەرىلەتىن بولادى.
«بيۋدجەتتى باسقارۋ پروتسەسى بۇدان دا يكەمدى بولماق. ءتيىستى وزگەرىستەر جاڭا بيۋدجەت كودەكسىنىڭ جوباسىندا قاراستىرىلعان», دەدى ءاليحان سمايىلوۆ.
ۇكىمەت باسشىسى وڭىردەگى جۇمىستىڭ باسىم باعىتتارىنىڭ ءبىرى حالىق پەن اۋىل شارۋاشىلىعىن سۋمەن قامتاماسىز ەتۋ ەكەنىن اتاپ ءوتتى. وسىعان بايلانىستى يرريگاتسيالىق جەلىلەردى سالۋ, سۋ شارۋاشىلىعى نىساندارىن كۇردەلى جوندەۋ جانە جاڭا سۋارمالى جەرلەردى ىسكە قوسۋ جونىندە شارالار قابىلداۋ, سونداي-اق سۋ ۇنەمدەۋ تەحنولوگيالارىن بەلسەندى تۇردە ەنگىزۋ تالاپ ەتىلەدى.
سونداي-اق پرەمەر-مينيستر ۇكىمەت جاس وركەندەگى گيدروقۇرالدى جاڭعىرتۋعا قاجەتتى قاراجات بولگەنىن ەسكە سالدى.
«كەلەسى جىلى 3 ءىرى سۋ قويماسىن سالۋعا بيۋدجەتتە ءتيىستى قاراجاتتى كوزدەدىك. سونداي-اق جەرگىلىكتى بيۋدجەت ەسەبىنەن شاعىن سۋ قويمالارىن سالۋ كەرەك. ارالىق كەزەڭدە سۋدى جيناۋىمىز كەرەك», دەپ اتاپ ءوتتى پرەمەر-مينيستر.
تاعى ءبىر ماڭىزدى باعىت – تۇراقتى جۇمىسپەن قامتاماسىز ەتۋ. بۇعان قازىرگى ناقتى جاعدايدى ەسكەرە وتىرىپ قابىلدانعان حالىقتىڭ تابىسىن ارتتىرۋ باعدارلاماسى ايتارلىقتاي ىقپال ەتەدى.
سونىمەن قاتار وڭىردە ءوزىنىڭ ەكونوميكالىق جانە الەۋمەتتىك تيىمدىلىگىن دالەلدەگەن «اۋىل اماناتى» باعدارلاماسىن ىسكە اسىرۋ جالعاسۋدا.
ءاليحان سمايىلوۆ اتاپ وتكەندەي, ءوڭىر ەكونوميكاسىن ءارى قاراي ءارتاراپتاندىرۋ وتە ماڭىزدى. ماسەلەن, جاڭا ءىرى ينۆەستيتسيالىق جوبالاردى ىسكە اسىرۋ ارقىلى جاڭا جۇمىس ورىندارىن اشۋ كەرەك.
ول وبلىستىڭ حيميا ونەركاسىبىنىڭ الەۋەتى زور ەكەنىن, سوندىقتان ءىرى حيميالىق كەشەن مەن «تاراز حيميالىق پاركى» ارنايى ەكونوميكالىق ايماعىن ودان ءارى دامىتۋدى قامتاماسىز ەتۋ كەرەكتىگىن ايتتى.
سونىمەن قاتار ۇكىمەت باسشىسى اگروونەركاسىپ كەشەنىندەگى ءونىمدى قايتا وڭدەۋ ۇلەسىن ارتتىرۋدىڭ, ونىڭ ىشىندە سولتۇستىك قازاقستان وبلىسىنىڭ ءسۇت-تاۋارلى فەرمالاردى ىسكە قوسۋ تاجىريبەسىن پايدالانۋ ارقىلى, سونداي-اق اۆتوجولداردى سالۋ جانە كۇردەلى جوندەۋ ارقىلى كولىك-لوگيستيكالىق الەۋەتتى جۇزەگە اسىرۋدىڭ ماڭىزدى ەكەنىن اتاپ ءوتتى.
الەۋمەتتىك ينفراقۇرىلىمدى دامىتۋعا قاتىستى ءاليحان سمايىلوۆ «جايلى مەكتەپ» ۇلتتىق جوباسى اياسىندا جامبىل وبلىسىندا 6,5 مىڭ بالاعا ارنالعان جاڭا فورماتتاعى 7 ءبىلىم بەرۋ مەكەمەسىن سالۋ جوسپارلانعانىن ەسكە سالدى. بۇل وقۋشى ورىندارىنىڭ تاپشىلىعىن, ءۇش اۋىسىممەن وقىتۋدى جانە توزىعى جەتكەن مەكتەپتەر ماسەلەسىن شەشۋگە مۇمكىندىك بەرەدى.
«وبلىستىڭ جاڭا اكىمى مەن بارلىق جەرگىلىكتى اتقارۋشى ورگان وكىلدەرىنە مەملەكەت باسشىسى العا قويعان مىندەتتەردى ورىنداۋدا تابىس تىلەيمىن», دەپ تۇيىندەدى ءسوزىن ءاليحان سمايىلوۆ.
