سۋرەتتى تۇسىرگەن – جانگەلدى ابدىعالىم
قالانىڭ ورتالىعىندا بولاشاق دارىگەرلەر ءۇشىن سالىنعان جاڭا ستۋدەنتتەر ءۇيى توعىز قاباتتان تۇرادى. عيماراتتى سالۋعا ەكى جىل ۋاقىت كەتكەن. جاڭا جاتاقحانا 400 ستۋدەنتتى قابىلداي الادى. مۇنداعى تۇرمىستىق جاعداي زاماناۋي ستاندارتتارعا ساي. ونىڭ تاعى ءبىر بىرەگەيلىگى – ءبىر بولمەسىندە 2 ستۋدەنت قانا تۇرادى. بولاشاق دارىگەرلەر ءۇشىن بارىنشا قولايلى جاعداي جاسالعان. جاڭا جيھازدارمەن جابدىقتالعان, ساباققا دايىندىق بولمەسى بار, ينتەرنەتى دە قولجەتىمدى. تۇرمىستىق تەحنيكانىڭ بارلىق ءتۇرى بار. سونىمەن قاتار مۋلتيمەديالىق كابينەت, سپورت زالدارى, ترەناجەر, تەننيس, بي جانە باسقالارى بار. عيماراتتىڭ ءبىرىنشى قاباتىندا دارىگەردىڭ كابينەتى قاراستىرىلعان. ستۋدەنتتەر ءۇشىن تاعى ءبىر تيىمدىلىگى – جاڭا عيمارات قاراعاندىنىڭ ورتالىق پاركىنە جاقىن ورنالاسقان. ستۋدەنتتەر بوي جازىپ, ساياباقتا سەرۋەندەي الادى.
– مەملەكەت باسشىسىنىڭ باستاماسىمەن بۇكىل ەل بويىنشا ستۋدەنتتەرگە ارنالعان جاڭا جاتاقحانالار سالىنىپ جاتىر. ءبىز سىزدەرگە ءبىلىمنىڭ شىڭىنا جەتىپ, كەيىن حالىققا قىزمەت ەتۋ ءۇشىن قولايلى جاعداي جاساۋعا مىندەتتىمىز. مۇنداي زاماناۋي جاتاقحانانىڭ اشىلۋى جاڭا وقۋ جىلىنىڭ باسىندا دەنساۋلىق ساقتاۋ سالاسىنىڭ بولاشاق ماماندارىنا تاماشا تارتۋ ەكەنى انىق. قۇرىلىستى ۋنيۆەرسيتەت «پرەزيدەنتتىڭ بەس الەۋمەتتىك باستاماسى» باعدارلاماسىنىڭ شەڭبەرىندە جۇزەگە اسىردى, – دەدى ا.عينيات.
جەرگىلىكتى بيلىكتىڭ جاردەمى – جاتاقحانا سالۋعا قالا ورتالىعىنان ىڭعايلى جەر ءبولدى. ستۋدەنتتەر ءۇيى كولىك بايلانىسى جانە الەۋمەتتىك ينفراقۇرىلىمعا قولجەتىمدى جەردە ورنالاسقان.
بۇل – قاراعاندى مەديتسينا ۋنيۆەرسيتەتىنىڭ جەتىنشى جاتاقحاناسى. اكادەميالىق جۇمىس جونىندەگى پرورەكتور قۋاتبەك تولەۋبەكوۆ بيىل ۋنيۆەرسيتەتتىڭ ءبىرىنشى كۋرسىنا 1 777 تالاپكەر قابىلدانعانىن ايتتى. ونىڭ جارتىسىنا جاتاقحانادان ورىن جەتىسپەيدى. قازىر جاڭا عيماراتتان ورىندار ءبولىنىپتى, ستۋدەنتتەر قونىستانىپ جاتىر. قىزىلوردادان كەلگەن نۇرايىم قايراتقىزى – ەندى وسى جاتاقحانانىڭ تۇرعىنى.
– جاڭا وقۋ جىلىندا وسىنداي كەرەمەت جاتاقحانانىڭ تۇرعىنى بولىپ جاتقانىمىزعا قۋانىشتىمىز. مەن «جالپى مەديتسينا» ماماندىعى بويىنشا وقيمىن. بۇعان دەيىن باسقا جاتاقحانادا تۇرىپ كەلدىم, ەندى وسى جەردەن ورىن ۇسىندى. جاڭا جاتاقحانادا جاعداي مۇلدەم باسقاشا ەكەن. ءبارى جاڭا ءارى جايلى. باستىسى ساباققا دايىندالاتىن كابينەتىمىز بار, – دەيدى 3-كۋرستا وقيتىن ن.قايراتقىزى.
قازىرگى ۋاقىتتا ۋنيۆەرسيتەتتە 7 مىڭنان استام ستۋدەنت ءبىلىم الىپ جاتىر. بيىل قۇجات تاپسىرعان تالاپكەرلەردىڭ سانى كوپ. ايتا كەتۋ كەرەك, ۋنيۆەرسيتەت تابالدىرىعىن اتتاعان 851 ستۋدەنت مەملەكەتتىك گرانت يەگەرى اتاندى. بۇل كورسەتكىش بىلتىرعى جىلدان ەكى ەسە كوپ. ونىمەن قوسا 3 ستۋدەنت ماڭعىستاۋ وبلىستىق اكىمدىگىنىڭ, 1-ەۋى اتىراۋ وبلىستىق اكىمدىگىنىڭ گرانتىمەن وقۋعا ءتۇستى. تاعى 4 ستۋدەنت «قوڭىرات كورپوراتيۆتىك قورىنان» گرانتقا يە بولدى. «قازاقستان حالقىنا» قورى 2 تالاپكەرگە ءبىلىم گرانتىن تاعايىندادى.
مەدينيتسا ۋنيۆەرسيتەتى مۇنىمەن توقتاپ قالماق ەمەس. تاعى دا 500 ورىندىق جاڭا جاتاقحانانىڭ قۇرىلىسىن باستاماقشى.
قاراعاندى وبلىسى
