سالتاناتتى ءىس-شاراعا ۇلتتىق ۇلان باس قولباسشىسىنىڭ ورىنباسارى, گەنەرال-مايور باۋىرجان ءابجانوۆ, وبلىس اكىمى اپپاراتىنىڭ باسشىسى ولجاس ىدىرىسوۆ, قالالىق ارداگەرلەر كەڭەسى توراعاسىنىڭ ورىنباسارى يمانعالي تاتۆاەۆ, سونداي-اق وڭىردەگى كۇشتىك قۇرىلىمداردىڭ باسشىلارى, ارداگەرلەر, بولاشاق وفيتسەرلەردىڭ اتا-انالارى مەن تۋىستارى قاتىستى.
جاس ساربازداردى ۇلتتىق ۇلان باس قولباسشىسىنىڭ ورىنباسارى, گەنەرال-مايور باۋىرجان ءابجانوۆ قۇتتىقتاپ, اسكەر قاتارىندا ەل قورعاۋدىڭ مارتەبەلى قىزمەت ەكەندىگىن اتاپ ءوتتى.
«سىزدەردىڭ ارقايسىڭىز ماماندىقتارىڭىزدى سانالى تۇردە تاڭدادىڭىزدار. وتان قورعاۋ ىسىنە ۇمتىلىپ, تاعدىرلارىڭىزدى وفيتسەرلىك قىزمەتپەن بايلانىستىرىپ وتىرسىزدار. سوندىقتان جوعارى وقۋ ورنىنىڭ قابىرعاسىندا اسكەري قىزمەت پەن وقۋدى قاتار الا ءجۇرىپ, ۇلتتىق ۇلان اكادەمياسىنىڭ كۋرسانتى اتاعىن ابىرويمەن ارقالايسىزدار دەگەن سەنىمدەمىن. باس قولباسشىلىق, ۇلتتىق ۇلاننىڭ اسكەري قىزمەتشىلەرى سىزدەرگە وفيتسەرلەر كورپۋسىنىڭ بولاشاعى رەتىندە زور ۇمىتپەن قارايدى. ءبىز سىزدەرگە لايىقتى وقۋ جانە قىزمەت كورسەتۋ جاعدايلارىن قامتاماسىز ەتۋ ءۇشىن ءبارىن جاسايمىز», دەدى گەنەرال-مايور. بۇدان ءارى وبلىس اكىمىنىڭ اتىنان اپپارات باسشىسى ولجاس ىدىرىسوۆ كۋرسانتتارعا تىلەكتەرى مەن قۇتتىقتاۋلارىن جولدادى.
«مەملەكەت باسشىسى قاسىم-جومارت توقاەۆ: «اسكەر – مەملەكەتىمىزدىڭ تىرەگى. وتانىمىزدىڭ تاۋەلسىزدىگى مەن تۇتاستىعىن قورعاۋ – باستى پارىز. ونى باتىر اتا-بابالارىمىز عاسىرلار بويى كوزدىڭ قاراشىعىنداي ساقتاپ, بىزگە مۇرا ەتىپ قالدىردى. بۇگىنگى ءبىزدىڭ باستى مىندەتىمىز – وسى باعاسىز قۇندىلىعىمىزدى جوعالتپاي, كەيىنگى ۇرپاققا تابىستاۋ», دەپ اتاپ وتكەن بولاتىن. سىزدەر تاجىريبەلى وقىتۋشىلاردىڭ, تالىمگەرلەردىڭ باسشىلىعىمەن بولاشاقتا وتانىمىزدىڭ قارۋلى كۇشتەرىندە جوعارى بىلىكتى جانە سۇرانىسقا يە مامان بولۋ ءۇشىن پايدالى ءبىلىم مەن داعدىعا يە بولاتىندارىڭىزعا سەنىمدىمىن!» دەدى ولجاس نۇرلان ۇلى.
ءىس-شارادا ءسوز العان 1-كۋرس كۋرسانتى, قاتارداعى جاۋىنگەر نۇربول داۋلەت جيىلعان قاۋىمدى كۋرسانتتاردىڭ اسكەري انتقا ادال بولاتىنىنا جانە وتاندى قورعاۋ جولىندا بابالار ءىزىن لايىقتى جالعاستىراتىنىنا سەندىردى.
بارلىق جاس كۋرسانت بىرقاتار سىناقتان وتكەن بولاتىن. ولار دەنەشىنىقتىرۋ نورماتيۆتەرىن ورىنداپ, قابىلداۋ ەمتيحاندارىن تاپسىردى, بايىپتى كونكۋرستىق ىرىكتەۋدەن جانە جالپى اسكەري دايارلىقتان ءوتتى. ەندى ولاردىڭ الدىندا 4 جىل كۋرسانتتىق ءومىر بار. وسى جىلدار ىشىندە اسكەري ءىستىڭ بارلىق قىر-سىرىن يگەرىپ, وتاننىڭ سەنىمدى قورعاۋشىلارىنا اينالماق.
اسكەري ءراسىم وتكىزىلگەننەن كەيىن قوناقتارعا اكادەميا اسكەري قىزمەتشىلەرىنىڭ قويىلىمدارى كورسەتىلدى. اسكەري وركەستر مەن ۋنيۆەرسيتەت بارابانشىلارىنىڭ ءانسامبلى وزدەرىنىڭ ونەرىمەن جينالعاندارعا كوڭىل كۇي سىيلادى. سەرجانت ايان قالي باستاعان كۋرسانتتار كارابيندەرمەن ساپتىق تاسىلدەر ورىنداپ, دەفيلە كورسەتتى.
بۇل كۇندەرى ۇلتتىق ۇلان اكادەمياسى قۇقىق قورعاۋ ورگاندارىنىڭ جوعارى بىلىكتى وفيتسەرلەرىنىڭ ۇستاحاناسىنا اينالىپ ۇلگەرگەن. سونداي-اق ۇلتتىق ۇلانعا جۇكتەلگەن مىندەتتەردى ورىنداۋعا ۇلكەن ۇلەس قوسىپ كەلەدى. بۇل – ەلدەگى اسكەرلەرگە وفيتسەرلىك كادرلار دايارلاۋدى جۇزەگە اسىراتىن جالعىز اسكەري وقۋ ورنى. ول 1997 جىلى 18 ناۋرىزدا قۇرىلدى. 2022 جىلدىڭ اقپان ايىنان باستاپ وفيتسەرلەر ۇستاحاناسىنا اكادەميا مارتەبەسى بەرىلدى.
26 جىل ىشىندە جوعارى وقۋ ورنىن 4 مىڭنان استام وفيتسەر ءبىتىرىپ شىقتى. ولار ۇلتتىق ۇلاننىڭ كادر قاتارىن تولىقتىرىپ قانا قويماي, ەلدىڭ باسقا اسكەرلەرى مەن اسكەري قۇرىلىمدارىندا دا قىزمەت ەتىپ جاتىر. بىرقاتارى جوعارى لاۋازىمعا تاعايىندالسا, كوپتەگەن وفيتسەرگە مەرزىمىنەن بۇرىن اسكەري اتاقتار بەرىلدى.
اكادەميا بازاسىندا سەگىز ماماندىق بويىنشا وفيتسەرلەر دايارلانادى, وقىتۋ ون كافەدرادا جۇرگىزىلەدى. مۇندا جوعارى وقۋ ورنىنان كەيىنگى جانە قوسىمشا ءبىلىم بەرۋ فاكۋلتەتى جۇمىس ىستەيدى. ۇكىمەتارالىق شارتتارعا سايكەس 2009 جىلعى قىركۇيەكتەن باستاپ اسكەري وقۋ ورنىنىڭ بازاسىندا جىل سايىن تاجىكستان رەسپۋبليكاسىنىڭ وكىلدەرى وتەۋسىز نەگىزدە اسكەري ماماندىقتى يگەرەدى.
ايتا كەتەيىك, بيىل اكادەميادا ماگيستراتۋرا باعدارلاماسى بويىنشا جوو وفيتسەر-تىڭداۋشىلارى العاش رەت وقۋعا قابىلداندى.
