«قازاقستان ەۋرازيا قۇرلىعىنداعى باستى ترانزيت حابى رەتىندەگى ءرولىن ارتتىرۋى كەرەك. وسىلايشا, ۋاقىت وتە كەلە كولىك-لوگيستيكا سالاسىنداعى ءىرى مەملەكەتكە اينالۋىمىز قاجەت. كولىك-لوگيستيكا سالاسىن قارقىندى دامىتۋ – بۇل ستراتەگيالىق مىندەت. ءۇش جىل ىشىندە ونىڭ ىشكى جالپى ونىمدەگى ۇلەسى كەمىندە 9 پايىزعا جەتۋگە ءتيىس», دەدى وسى جولى مەملەكەت باسشىسى.
راسىندا قازىرگى گەوساياسي جاعداي مەن تاريحي تۋىنداعان مۇمكىندىكتى ۇكىمەتىمىز ءساتتى پايدالانا بىلسە, قازاقستان كولىك-لوگيستيكا دەرجاۆاسىنا اينالۋىنا مول مۇمكىندىگى بار. وعان كۇمانىمىز بولماۋعا ءتيىس. مىسالى, پرەزيدەنت قاسىم-جومارت توقاەۆ قىتايعا مەملەكەتتىك ساپارى اياسىندا سيان قۇرعاق پورتىندا وتاندىق لوگيستيكالىق ورتالىق قۇرىلىسىنىڭ ونلاين ىسكە قوسۋ راسىمىنە قاتىسقانى بەلگىلى. سوندا سويلەگەن سوزىندە قۇرلىقتاعى كولىك دالىزدەرىن دامىتۋ ماسەلەسىن دە قوزعادى. قىتاي باتىس ەۋرازيانىڭ اۋقىمدى نارىقتارىنا قازاقستان اۋماعى ارقىلى شىعا الاتىنىنا ينۆەستورلاردىڭ دا نازارىن اۋداردى.
«مۇنداي تاسىمال جولى وتە ۇتىمدى ەكەنى ءسوزسىز. ءبىز سيان قالاسىنداعى قۇرعاق پورتتا قازاقستاننىڭ لوگيستيكا ورتالىعىن سالۋعا باسا ءمان بەرىپ وتىرمىز. ورتالىق ازياعا, ەۋروپاعا, تۇركيا مەن يرانعا كونتەينەر پويىزدارىن تىكەلەي جونەلتۋ ىسىندە وسى ورتالىق نەگىزگى حاب بولادى. ءبىز قىتايعا قاراي «اياگوز – باقتى» تەمىرجولىن ىسكە قوسۋدى جوسپارلاپ وتىرمىز. «دوستىق – مويىنتى» اراسىنداعى تەمىر جولعا كۇردەلى جوندەۋ جۇرگىزىلەدى. سوندا تەمىرجول ارقىلى جىل سايىن 20 ميلليون تونناعا دەيىن جۇك تاسىمالداۋعا مۇمكىندىك تۋادى. ەۋروپا مەن ازيا اراسىنداعى ءترانزيتتى جانداندىرۋ ءۇشىن ترانسكاسپي باعدارىن دامىتۋ ماڭىزدى دەپ سانايمىن. بۇل باعىتتىڭ بولاشاعى زور», دەگەن ەدى پرەزيدەنت.
وسىناۋ حالىقارالىق ماڭىزى بار اۋقىمدى جۇمىستاردى ويداعىداي ىسكە اسىرۋ ۇشىندە كولىك مينيسترلىگىن قايتا قۇرۋدى ۇسىندى. ەندى اتقارۋشى بيلىك وسى باعىتتاعى ءىستىڭ كوزىن تاپسا, ۇكىلەنگەن ءۇمىت تولىق اقتالادى دەپ ويلايمىن.
باحادىر قارسىبەك ۇلى,
كاسىپكەر
