«ايماقتاعى اتقارۋشى بيلىكتىڭ شەشىم قابىلداۋ ىسىنە ازاماتتاردىڭ تىكەلەي قاتىسۋ مۇمكىندىگىن بىرتىندەپ ارتتىرۋ دا ماڭىزدى. اۋىل, كەنت جانە اۋىلدىق وكرۋگ اكىمدەرىن تۇرعىندار وزدەرى سايلاي باستاعانىنا ەكى جىلدان استى. سودان بەرى اۋىلدىق دەڭگەيدەگى اكىمدەردىڭ تورتتەن ءۇشى سايلاندى. ەندى اۋدان جانە وبلىستىق دەڭگەيدەگى قالا اكىمدەرىن سايلاپ كورەمىز», دەدى مەملەكەت باسشىسى.
وسىعان وراي ورتالىق سايلاۋ كوميسسياسىنىڭ توراعاسى نۇرلان ءابدىروۆ جۋرناليستەرمەن وتكىزگەن بريفينگتە اۋدان جانە وبلىستىق دەڭگەيدەگى قالا اكىمدەرىن سايلاۋعا قاتىستى پىكىرىن ءبىلدىردى.
«ورتالىق سايلاۋ كوميسسياسى اۋماقتىق سايلاۋ كوميسسيالارىمەن بىرىگىپ, اۋدان جانە وبلىستىق دەڭگەيدەگى قالا اكىمدەرىن سايلاۋعا ءتيىستى دايىندىق جۇمىستارىن جۇرگىزىپ جاتىر. سايلاۋدى وتكىزۋگە تولىق دايىنبىز. قاي وبلىستاردا, اۋدانداردا سايلاۋ وتكىزەتىنىن جەرگىلىكتى وبلىستىق ءماسليحاتتار شەشەدى. ورتالىق سايلاۋ كوميسسياسى بۇل سايلاۋدىڭ قاتاڭ تۇردە زاڭعا ساي وتۋىنە بار كۇشىن سالادى», دەگەن كوميسسيا توراعاسى جۋرناليستەردىڭ سۇراقتارىنا جاۋاپ بەردى. «سايلاۋ ءار وڭىردە ءارتۇرلى مەرزىمدە وتە مە؟» دەگەن ساۋالعا نۇرلان ءابدىروۆ: «ارينە, سايلاۋدى ۇيىمداستىرۋشى ورگان رەتىندە بىزگە سايلاۋدىڭ ءبىر ۋاقىتتا وتكەنى قولايلى بولار ەدى. ايتسە دە, وبلىستىق ءماسليحاتتاردىڭ شەشىمىن كۇتەمىز. زاڭ بويىنشا سايلاۋعا دايىندىق جانە ونى وتكىزۋ مەرزىمى 50 كۇننەن كەم بولماۋى كەرەك. سايلاۋدى كەمىندە ەكى اي ىشىندە وتكىزۋىمىز كەرەك», دەپ جاۋاپ بەردى.
ال «سايلاۋ وسى جىلدىڭ سوڭىنا دەيىن وتە مە؟» دەگەن سۇراققا: ء«بىز دە جىلدىڭ سوڭىنا دەيىن وتەدى دەپ بولجاپ وتىرمىز», دەپ جاۋاپ بەرگەن نۇرلان ءابدىروۆ قالاي بولعاندا دا ءبارى وبلىستىق ءماسليحاتتاردىڭ شەشىمدەرىنە بايلانىستى ەكەنىن ەسكە سالدى.
ورتالىق سايلاۋ كوميسسياسى توراعاسىنىڭ پىكىرىنشە, «قازاقستان رەسپۋبليكاسىنداعى سايلاۋ تۋرالى» زاڭعا سايكەس ەلىمىزدە تىركەلگەن ساياسي پارتيالار اۋدان جانە وبلىستىق دەڭگەيدەگى قالا اكىمدەرى سايلاۋىندا وزدەرىنىڭ وكىلدەرىن ۇسىنۋعا قۇقىلى. بىراق ءاربىر وكرۋگ ءبىر عانا كانديدات ۇسىنا الادى. سونداي-اق نۇرلان ءابدىروۆ ەلىمىزدە تاۋەلسىز بايقاۋشىلار ينستيتۋتى جاقسى دامىپ كەلە جاتقانىن, جىلدان-جىلعا ولاردىڭ قاتارى دا, قىزمەت ساپاسى دا ارتقانىن اتاپ ءوتتى.
«تاۋەلسىز بايقاۋشىلار ءوز قىزمەتىن جوعارى دەڭگەيدە زاڭعا ساي وتكىزۋى كەرەك. سول سەبەپتى, قوعامدىق بىرلەستىكتەر ولاردى ساپالى دايىنداپ جاتىر», دەدى ورتالىق سايلاۋ كوميسسياسىنىڭ توراعاسى.
