ويتكەنى الەمدە بولىپ جاتقان قايشىلىقتار, دامىعان ەلدەردىڭ ءبىر-بىرىمەن قىرعي-قاباق ەرەگەسۋى, قارۋلى قاقتىعىستار قالىپتاسقان ەكونوميكالىق جانە ساياسي جۇيەنى ىدىراتىپ, السىرەتىپ جاتىر. وسىنىڭ بارلىعى الەمنىڭ دامۋىن تەجەپ, كەي جاعدايدا اۋىر جاعدايعا اكەلىپ وتىرعانى انىق. تىنىشسىز الەم جاعدايىندا ەلىمىز بۇگىن جانە الداعى ۋاقىتتا قالاي دامۋى كەرەك؟ بۇكىل حالقىمىزدى الاڭداتىپ وتىرعان وسى سۇراققا پرەزيدەنت تولىق جاۋاپ بەردى. الداعى ۋاقىتتا ەلىمىزدىڭ ەكونوميكالىق قۋاتىن ارتتىرۋدىڭ ەڭ وزەكتى, ومىرشەڭ دەگەن ماسەلەلەردى شەشۋدىڭ ناقتى جولدارىن, شەشىلۋگە ءتيىس مەرزىمى مەن ۋاقىتىن دا ناقتىلاپ كورسەتتى. پرەزيدەنتىمىزدىڭ حالىقتى تولعاندىرىپ وتىرعان جانە ايتىلىپ جۇرگەن جايدى تولىق بىلەتىندىگىنە كوزىم جەتتى.
بۇل قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت قۇرۋ» ساياساتىنىڭ العاشقى ءبىر جەمىسى بولسا كەرەك. بىزدە جەدەل قولعا الىپ, جاپپاي كىرىسەتىن شارۋا جەتىپ ارتىلادى. وسى ورايدا پرەزيدەنت حالقىمىزدىڭ تۇرمىسىن جاقسارتۋدىڭ جانە ەلىمىزدى دامىتۋدىڭ بارلىق وزەكتى ماسەلەسىن ۇلكەن جاۋاپكەرشىلىكپەن جانە شىنايى جاناشىرلىقپەن قوزعادى.
مەملەكەت باسشىسى اۋىل شارۋاشىلىعى ونىمدەرىن تەرەڭدەتە وڭدەۋ, ونەركاسىپ ءوندىرىسىنىڭ قۋاتىن ارتتىرۋ, وتاندىق ونىمدەردى الەمدىك رىنوكقا شىعارۋ, بانك-قارجى جۇيەسىن جەتىلدىرۋ, سۋدى ۇقىپتى جۇمساۋ سياقتى بۇگىنگى كۇننىڭ كۇيىپ تۇرعان ماسەلەلەرىن شەشۋ ءۇشىن عىلىم مەن وزىق تەحنولوگيالاردى قولدانۋ قاجەتتىگىن تاعى دا العا تارتتى.
قوعامدى ءبىرازدان بەرى الاڭداتىپ, ءتۇرلى پىكىرلەر تۋعىزىپ جۇرگەن اتوم ەلەكتر ستانساسىن سالۋ-سالماۋ ماسەلەسى جالپىحالىقتىق رەفەرەندۋم ارقىلى شەشىلەتىندىگى اقىلعا قونىمدى. بۇل جايلى وتانداستارىمىز ويلارىن انىق ايتاتىن بولادى. بۇل مەملەكەت باسشىسىنىڭ اسا ماڭىزدى ءارى كۇردەلى ماسەلەنىڭ بارلىعى دا تەك حالىقپەن اقىلداسىپ, كەلىسىپ جاسايمىز دەگەن دەموكراتتىق ۇستانىمىنا بەرىك ەكەندىگىن تاعى ءبىر دالەلدەپ وتىر.
جولداۋدا ايتىلعان ءار ماسەلەنىڭ وزەگىندە حالقىمىزدىڭ بۇگىنى مەن بولاشاعى جاتىر. قازىرگىدەي الماعايىپ الەمدە الاڭسىز ءومىر ءسۇرىپ, مەملەكەتىمىزدى نىعايتىپ, ونىڭ تۇراقتى دامىپ, قۋاتتى مەملەكەت بولۋىمىزدىڭ تاريحي جولى ايقىندالىپ وتىر.
جابال ەرعاليەۆ,
قازاقستاننىڭ ەڭبەك سىڭىرگەن قايراتكەرى, سەناتورلار كەڭەسىنىڭ مۇشەسى
