پرەزيدەنت ايتقان «حالىق ۇنىنە قۇلاق اساتىن مەملەكەت» قاعيداتىن ىسكە اسىرۋ بويىنشا «Amanat» پارتياسىنىڭ حالىقپەن تىعىز بايلانىستا جۇمىس ىستەپ, بىرقاتار يگى شارانى جۇزەگە اسىرىپ كەلە جاتقانىن ايتا كەتكەن ءجون. مىسالى, «اۋىل اماناتى», «جەر اماناتى» باعدارلامالارىنىڭ جۇزەگە اسىرىلۋىنا قوماقتى ۇلەس قوسۋدا. سونداي-اق پارتيانىڭ «قۇقىقتىق كومەك», «قارىزسىز قوعام» سىندى جوبالارىنىڭ دا كوپشىلىككە كوپ كومەگى ءتيىپ كەلەدى. مەملەكەت باسشىسى جولداۋدا «Amanat» پارتياسىنىڭ «قارىزسىز قوعام» جوباسىن ەرەكشە اتاپ ءوتتى.
تۇرعىنداردىڭ قارجىلىق ساۋاتىن ارتتىرۋ ماقساتىندا تۇركىستان وبلىسىنىڭ اۋدان, اۋىلدارىندا كوپتەگەن ءىس-شارا وتكىزىپ, ءبىلىمىن ارتتىرعان تۇرعىندارعا سەرتيفيكاتتار تابىس ەتكەن بولاتىنبىز. قولجەتىمدى نەسيەلەر, قارجى ۇيىمدارىنىڭ جوعارى پايىزدىق مولشەرلەمەلەرى, ەڭ باستىسى, قارجىلىق ساۋاتتىلىقتىڭ تومەندىگى – جىل سايىن حالىقتىڭ قارىزىنىڭ ءوسۋىن ارتتىرادى. تۇرعىنداردىڭ قارىز اۋىرتپالىق ماسەلەسى جۇيەلى شەشىمدى قاجەت ەتەدى. ياعني قارجىلىق ساۋات بويىنشا جۇزەگە اسىرىلىپ جاتقان پارتيالىق جوبا تۇرعىندارعا ءتيىمدى قىزمەت ەتەرى ءسوزسىز.
سونداي-اق جولداۋدا ايتىلعان فيسكالدىق ورگاندار مەن سالىق تولەۋشىلەر اراسىنداعى ءوزارا ءىس-قيمىلدىڭ سەرۆيستىك مودەلىنە كوشۋدى قامتاماسىز ەتۋ قاجەتتىگى دە حالىق قولداۋىنا يە بولارى انىق. پرەزيدەنت سالىقتىق باقىلاۋدى تولىق تسيفرلاندىرۋدى جۇرگىزۋ جانە سالىقتىق ەسەپتىلىك نىساندارىن 30 پايىزعا قىسقارتۋ قاجەتتىگىن ايتتى. سالىق ساياساتىنداعى باستامالار ەل ەكونوميكاسىنىڭ دامۋىنا وڭ سەپتىگىن تيگىزەرى ءسوزسىز. ترانسشەكارالىق سۋ ماسەلەسىنىڭ وڭ شەشىمىن تابۋىنا قاتىستى, اگروونەركاسىپتى دامىتۋدا قولدا بار مۇمكىندىكتەردى تولىق پايدالانۋ, اۋدان, قالا اكىمدەرىن سايلاۋعا بايلانىستى ايتىلعان ناقتى تاپسىرمالار جۇزەگە اسىرىلۋىمەن قۇندى بولماق. بۇل – حالىق ورىندالۋىن جانە شەشىمىن تابۋىن كۇتىپ وتىرعان ماسەلەلەر. مەملەكەت باسشىسىنىڭ كرەاتيۆتى يندۋستريا وندىرىسىنە قارجى تارتۋ جولدارىن جەڭىلدەتۋ جونىندەگى باستاماسى دا ماڭىزدى. «قازىر كرەاتيۆتى يندۋستريا ورتالىقتارى ءۇش ءىرى قالادا (استانا, الماتى, شىمكەنت) شوعىرلانعان. وڭىرلەر بۇل تۇرعىدا نازاردان تىس قالىپ وتىر. مۇنى تۇزەتۋ كەرەك. تالانتتاردى تارتاتىن شىعارماشىلىق يندۋستريانىڭ ورتالىقتارى ءاربىر وبلىس ورتالىعىندا, ءاربىر ءىرى قالادا بولۋعا ءتيىس. ول ورتالىقتار قاتىسۋشىلارعا ءوز ونىمدەرىن كوممەرتسيالاندىرۋ ماسەلەلەرىنە كومەكتەسۋ كەرەك», دەدى قاسىم-جومارت توقاەۆ. بۇل ورايدا تۇركى الەمىنىڭ رۋحاني استاناسى مارتەبەسىنە يە بولۋ, سونداي-اق تاريحي قۇندىلىعىن ەسكەرە وتىرىپ, تۇركىستان قالاسى كرەاتيۆتى كلاستەردى دامىتۋدا جوعارى الەۋەتكە يە ەكەنىن ايتا كەتەلىك. تۇركىستاندى جاھاندىق يننوۆاتسيالىق مادەني ورتالىققا اينالدىرۋ ماقساتىندا تۇركى حالىقتارىنا ورتاق كرەاتيۆتى يندۋستريا قاۋىمداستىعى قۇرىلعان بولاتىن. كرەاتيۆتى ەكونوميكانى دامىتۋ – ءوڭىردىڭ باسەكەگە قابىلەتتىلىگىن ارتتىرۋعا جاسالاتىن ماڭىزدى قادام.
التىنسارى ۇمبەتاليەۆ,
«Amanat» پارتياسى تۇركىستان وبلىستىق فيليالىنىڭ توراعاسى, وبلىستىق ءماسليحات دەپۋتاتى
