وسى وزەكتى ماسەلەلەردىڭ ىشىندە جاستار ماسەلەسى دە تىس قالمادى. جولداۋدا جاستار تۋرالى بىرنەشە تاقىرىپ كوتەرىلدى. بۇگىندە بالا قۇقىعى مەن ونىڭ قاۋىپسىزدىگى, جاستار اراسىنداعى بۋللينگ ماسەلەسى وزەكتى بولىپ وتىر.
پرەزيدەنتتىڭ بۇعان دەيىنگى جولداۋلارىندا دا جاستاردى اۋىلعا تارتۋ ماسەلەسى ءجيى ايتىلاتىن. اۋىلدىق جەرلەرگە جاستار باراتىنداي قولايلى جاعداي جاسالماعان. اۋىل مەن قالا مەكتەبىنىڭ الشاقتىعى بىلىنەدى. اۋىلداردا ءارتۇرلى ويىن-ساۋىق جانە دەمالىس ورىندارىنىڭ جوقتىعى دا وزەكتى. ءۇي بەرۋ ماسەلەسى, نەسيە, جۇمىسپەن قامتۋ ماسەلەلەرى جولعا قويىلماعان.
جوعارى وقۋ ورنىن نەمەسە كوللەدجدى جاڭا تامامداعان جاستارعا جۇمىس تابۋ وڭاي ەمەس. وسى ماسەلەنى شەشۋدى قولعا الۋىمىز كەرەك. ماماندىق الىپ, ۇلكەن ومىرگە جاڭادان قادام باسقان جاستار ءۇشىن بۇل پروبلەما بولماۋى ءتيىس. مەملەكەت تاراپىنان ياكي اگروونەركاسىپتەردەن نەمەسە ءىرى كومپانيالاردىڭ تاراپتارىنان قولداۋلار بولۋى كەرەك. سونىمەن قاتار ناسيحات جۇمىستارى جۇرگىزىلگەنى ءجون. 9-سىنىپتا, ءتىپتى 8-سىنىپتا كاسىپتىك باعدارلار بەرەتىن بولساق, بۇل ۇلكەن ناتيجەگە جەتكىزەدى دەگەن ويدامىن. ويتكەنى اگروونەركاسىپ بويىنشا, كەيبىر باسقا دا سالالار بويىنشا كادرلار جەتىسپەۋشىلىگى, جاستاردىڭ بولماۋى, جاستاردىڭ شەتەلدەرگە كەتىپ قالۋى سياقتى ماسەلەلەردى دە قاراۋىمىز كەرەك. ناسيحات جۇمىستارىن جاقسىلاپ جۇرگىزسەك, بارلىق قاجەتتى ماماندىقتارعا جەتكىلىكتى گرانتتار ءبولىپ, شاكىرتاقىنى ارتتىرىپ, جاعداي جاسالاتىن بولسا, وقۋ بىتىرگەنننەن كەيىن جۇمىسپەن قامتۋ, ءۇي بەرۋ, جەڭىلدەتىلگەن نەسيەلەر بەرۋ ماسەلەلەرى وڭىمەن شەشىلىپ جاتسا, جاستار اۋىلدارعا بارار ەدى. سوندىقتان دا اۋىلداردىڭ دارەجەسىن, ماڭىزىن ارتتىرۋىمىز كەرەك.
قازىر استانا جانە الماتى قالالارىندا جاتاقحانا جانە وقۋ اۋديتوريالارىنىڭ جەتىسپەۋشىلىگى سىندى ماسەلەلەر بار. وسى ەكى مەگاپوليسكە جاستار كوپ كەلەدى. ماسەلەن, ەۋرازيا ۋنيۆەرسيتەتىنە 7 مىڭنان استام ستۋدەنت ءتۇستى, بۇل ۇلكەن كورسەتكىش. مونوقالالاردا, وبلىس ورتالىقتارىندا جاتاقحانامەن قامتىلۋعا مۇمكىندىك بولا تۇرا جاستاردىڭ قالماۋى, جاستاردىڭ ۇلكەن قالالارعا بارىپ, جاتاقحانا ماسەلەسى, ت.ب. پروبلەمالارعا تاپ بولۋى كوكەيكەستى ماسەلەلەر. ماسەلەن, اريزونا مەن م.قوزىباەۆ ۋنيۆەرسيتەتتەرى مەموراندۋمدارعا قول قويدى. وسى سياقتى كوپتەگەن قوس ديپلومدىق تۇرعىسىندا مەموراندۋمدار جاسالسا ەكەن. جاستارعا تاعى دا باسقا جەڭىلدەتىلگەن, ءتيىمدى, ءارتۇرلى باعدارلامالار جاسالسا, جاستار مونوقالالاردا, وبلىس ورتالىقتارىندا وقيتىن ەدى.
پرەزيدەنت كوتەرىپ وتىرعان ماسەلەلەر وتە وزەكتى. جاستار مەملەكەت باسشىسىن قولدايدى. جاستارعا جاڭا مۇمكىندىكتەر بەرىلسە, ولار بارلىعىن دا جاسايدى دەگەن سەنىمدەمىن. ەلىمىزگە جانى اشيتىن پاتريوت جاستار كوپ بولسا ەكەن دەيمىن.
ەلىمىزدە وتباسى جانە جاستار مينيسترلىگى قۇرىلسا دەگەن ۇسىنىسىم بار. جاستارعا كوبىرەك كوڭىل بولىنسە, جاڭا مۇمكىندىكتەرگە جول اشىلسا قۇبا قۇپ بولار ەدى.
جالپى پرەزيدەنت جولداۋىندا ايتىلعان سوزدەرگە تولىقتاي كەلىسەمىز, قولدايمىز. جاستار ءۇشىن مۇمكىندىكتەر كوبەيە بەرسە ەكەن دەپ تىلەيمىز.
ۇلان امانقازى ۇلى,
«قازاقستان ستۋدەنتتەرى اليانسىنىڭ» توراعاسى
