فوتو:gov.kz
ءىس-شارا اكت زالىندا وتكىزىلىپ, وندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ۇندەۋى ۇلكەن ەكراندا كورسەتىلدى.
ەل قارۋلى كۇشتەرىنىڭ جوعارعى باس قولباسشىسى مەملەكەتتىڭ ۇلتتىق قاۋىپسىزدىگىن قامتاماسىز ەتۋ ءۇشىن قورعانىس-ونەركاسىپ كەشەنىن جان-جاقتى نىعايتۋ قاجەتتىگىن جەتكىزدى.
ونىڭ پىكىرىنشە, قارۋ-جاراق پەن اسكەري تەحنيكانىڭ يمپورتتىق جەتكىزىلىمدەرىنە تاۋەلدىلىكتى ازايتۋ ءۇشىن لوكاليزاتسيانىڭ جوعارى ۇلەسى بار ءوندىرىس تسيكلىن قۇرۋ ماڭىزدى مىندەت بولىپ وتىر.
تەحنيكانى شۇعىل جوندەيتىن ءوندىرىس ورىندارىنىڭ قۋاتىن ارتتىرىپ, وتاندىق كاسىپورىندارعا بارىنشا قولداۋ كورسەتكەن ءجون. بىزدە وعان قاجەتتى ماتەريالدىق-تەحنيكالىق بازا, بىلىك پەن تاجىريبە جانە ماماندار بار. تەك ولارعا قۇزىرلى مەكەمەلەردىڭ تاپسىرىسى كەرەك.
زاماناۋي تەحنولوگيا ترانسفەرتىن جاساۋ جانە جاڭا وندىرىستەر اشۋ جۇمىسىن جالعاستىرعان ءجون.
ارناۋلى قورعانىس-ونەركاسىپ كەشەنىن دامىتۋ قورى ارقىلى ءوز كاسىپورىندارىمىزعا تىكەلەي قارجىلىق قولداۋ كورسەتىلەدى, دەپ اتاپ ءوتتى پرەزيدەنت.
جولداۋ بويىنشا ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى حالىق قاھارمانى گەنەرال-مايور قايرات ۇمبەتوۆ جالپىلاما تۇسىنىك بەردى.
مەملەكەت باسشىسىنىڭ جولداۋىندا كورسەتىلگەن ەل دامۋىنىڭ نەگىزگى باعىتتارىن بايانداي وتىرىپ, گەنەرال-مايور قايرات ۇمبەتوۆ مەملەكەت باسشىسىنىڭ جۇرگىزىپ جاتقان ساياساتىنىڭ ماڭىزدىلىعىن اتاپ ءوتتى.
«پرەزيدەنتتىڭ جولداۋى ءادىل قازاقستاندى قۇرۋعا باعىتتالعان. الايدا, بۇل ءۇشىن تەك ساياسي جانە ەكونوميكالىق رەفورمالار جەتكىلىكسىز. ەڭ الدىمەن, ازاماتتاردىڭ قوعامدىق ساناسى مەن ۇمتىلىسىن وزگەرتۋ قاجەت», دەپ تۇيىندەدى سوزىن قۇقىقتىق ءتارتىپ اسكەرلەرىنىڭ باس تاربيەشىسى قايرات ۇمبەتوۆ.
ەلىمىزدە كونستيتۋتسيالىق جانە قوعامدىق تارتىپ ۇستەمدىك قۇرعان. ونىڭ ساقتالۋى مەن قازاقستاندىقتاردىڭ بەيبىت عۇمىر كەشۋىنە ۇلاندىق جاۋىنگەرلەر تىكەلەي اتسالىسادى.
