ماۋلەن اشىمباەۆ جولداۋدا بەرىلگەن تاپسىرمالار قازىرگى جاعدايدا وزەكتى ەكەنىن اتاپ ءوتتى. سونداي-اق ول مەملەكەت باسشىسى ۇسىنعان رەفورمالاردى ىسكە اسىرۋ جولىندا ازاماتتاردىڭ جۇدىرىقتاي جۇمىلۋى ماڭىزدى ەكەنىنە نازار اۋداردى.
«مەملەكەت باسشىسى جولداۋدا ەلىمىزدەگى ەكونوميكالىق ساياساتتىڭ جاڭا مودەلىن قالىپتاستىرۋعا باسىمدىق بەردى. قازىرگى تاڭدا الەمدەگى كۇردەلى احۋال مەملەكەتتەردىڭ دامۋىنا ءوز اسەرىن تيگىزۋدە. وسىنداي قيىن كەزەڭدە پرەزيدەنتىمىز حالىقتىڭ تۇرمىس ساپاسىن ارتتىرۋعا ۇلكەن كوڭىل ءبولىپ وتىر. جولداۋدا شاعىن جانە ورتا كاسىپكەرلىكتى قولداۋدىڭ جۇيەلى مەحانيزمدەرى كورسەتىلدى. بارىنە بىردەي تۇسىنىكتى, اشىق, ادىلەتتى سالىق ساياساتىن قامتاماسىز ەتۋ قاجەتتىگى ايتىلدى. ينۆەستيتسيا تارتۋعا قولايلى بيزنەس كليمات قالىپتاستىرۋعا باسا ءمان بەرىلدى. سونداي-اق پرەزيدەنتىمىز ەلىمىزدى يندۋستريالاندىرۋ كەزەڭدەرىندە قوردالانعان پروبلەمالاردى شەشىپ, بۇل ۇدەرىستى ساپالى جۇرگىزۋدى تاپسىردى. اۋقىمدى ينفراقۇرىلىمدىق سەرپىلىس جاساۋ ارقىلى وڭىرلەردىڭ دە دامۋىنا جاڭا تىنىس بەرۋ كوزدەلىپ وتىر. مۇنىڭ ءبارى حالىقتىڭ ءومىر ءسۇرۋ ساپاسىن ارتتىرىپ, ادىلەتتىلىك قاعيداتىنىڭ بارلىق سالادا جۇزەگە اسۋىنا مۇمكىندىك بەرەتىنى ءسوزسىز. الداعى ۋاقىتتا سەنات پرەزيدەنتىمىز بەلگىلەپ بەرگەن مىندەتتەردى زاڭنامالىق تۇرعىدان ساپالى ءارى ۋاقتىلى قامتاماسىز ەتۋ جولىندا بەلسەندى جۇمىسىن جالعاستىرا بەرەدى», دەدى ماۋلەن اشىمباەۆ.
سونىمەن قاتار پالاتا سپيكەرى سەناتورلاردىڭ وڭىرلەرگە ساپارلارىن قورىتىندىلاپ, بارلىق دەڭگەيدەگى دەپۋتاتتارمەن جانە جۇرتشىلىقپەن جۇيەلى ءوزارا بايلانىس ورناتۋدىڭ ماڭىزدىلىعىنا توقتالدى.
ماۋلەن اشىمباەۆ جاز ايلارىندا سەناتورلار وڭىرلەردە جەرگىلىكتى حالىقپەن, قوعام وكىلدەرىمەن جانە ءماسليحات دەپۋتاتتارىمەن 580-نەن استام كەزدەسۋ وتكىزگەنىن اتاپ ءوتتى. اتالعان كەزدەسۋلەردە ايتىلعان ۇسىنىستار, مۇددەلى تاراپتاردىڭ, ءتۇرلى الەۋمەتتىك توپتاردىڭ, ساراپشىلاردىڭ, قوعامدىق ينستيتۋتتاردىڭ جانە عالىمداردىڭ پىكىرلەرى زاڭ شىعارۋ قىزمەتىندە نازاردان تىس قالماۋ كەرەكتىگى دە اتاپ ءوتىلدى.
سونداي-اق پالاتا وتىرىسىندا دەپۋتاتتار ەلەكتروندىق جۇيەنىڭ پايدالانىلۋىن جانە وعان قىزمەت كورسەتەتىن پەرسونالدىڭ جۇمىسىن باقىلاۋ جونىندەگى كوميسسيانى قۇرۋ تۋرالى ماسەلەنى قارادى.
