بۇل باعىتتاردا, ارينە, بۇرىننان جۇمىس جۇرگىزىلىپ كەلەدى. الايدا بۇل جۇمىستاردى جاڭا ۋاقىت تالاپتارىنا ساي جەتىلدىرۋ كەرەك. مەملەكەت باسشىسى «ادال ازامات جانە تۇعىرلى تۇلعا بولۋدىڭ نەگىزى بالا كەزدەن قالىپتاسادى. سوندىقتان ءبىز جاس ۇرپاقتىڭ قاۋىپسىز ءارى الاڭسىز ءومىر ءسۇرۋىن قامتاماسىز ەتۋگە ءتيىسپىز», دەپ اتاپ ءوتتى.
كەيىنگى ۋاقىتتا بالالار اراسىنداعى زورلىق-زومبىلىق پروبلەماسى قوعامدى الاڭداتىپ جۇرگەنىن بىلەسىزدەر. ءبىز ءوز تاراپىمىزدان بۋللينگ جاعدايىن بولدىرماۋ ءۇشىن فين تاجىريبەسىن زەرتتەپ جاتىرمىز. ول ەلدە «كيۆي» دەگەن باعدارلاما قابىلدانعان. كەيىنگى ون جىلدىڭ ىشىندە اتالعان باعدارلامانىڭ ارقاسىندا فينليانديادا بۋللينگ بىرنەشە ەسە تومەندەگەن. ءبىز بۇل تاجىريبەنى ءوزىمىزدىڭ ءبىلىم سالاسىندا قولدانۋ جاعىن پىسىقتاپ, زەردەلەپ جاتىرمىز.
ايتا كەتسەك, باعدارلاما مەكتەپ اكىمشىلىگى مەن اتا-انا اراسىنداعى ارىپتەستىكتى كۇشەيتۋ ارقىلى بۋللينگكە ۇشىراعان بالالاردى تىعىرىقتان الىپ شىعۋعا باعىتتالعان. ونىڭ ىشىندە مەكتەپتەگى پسيحولوگيالىق جۇمىستى كۇشەيتۋ باعىتى دا بار. بۇگىنگى تاڭدا وسى پسيحولوگيالىق جۇمىستار بويىنشا دا مەكتەپتەردە ناقتى ءىس-شارالار وتكىزۋدى جوسپارلاپ وتىرمىز. ونىڭ ىشىندە پەداگوگ-پسيحولوگتەردىڭ بىلىكتىلىگىن ارتتىرۋ, ولاردىڭ جۇمىس ىستەيتىن باعدارلامالارىن جاڭعىرتۋ, سونىمەن قاتار ءار وڭىردە پسيحولوگتەرگە ارنالعان ورتالىقتار قۇرۋ سەكىلدى باستامالار بار.
عاني بەيسەمباەۆ,
وقۋ-اعارتۋ ءمينيسترى
