بىرىنشىدەن, قازىرگى اۋىل شارۋاشىلىعى – جوعارى تەحنولوگيالىق سالا. شارۋالاردى جەر جاعدايى نەمەسە اۋا رايى ەمەس, يننوۆاتسيالىق امال-تاسىلدەر تابىسقا جەتكىزەدى. زاماناۋي عىلىمعا سۇيەنبەسە, اۋىل شارۋاشىلىعى جاي توقىراۋعا ەمەس, قۇردىمعا كەتەدى. سول سەبەپتى مەملەكەت باسشىسى باعدار بەرگەندەي, اگروعىلىمدى دامىتۋ جانە ەڭ باستىسى, ونى ءىس جۇزىندە قولدانۋ ءۇشىن شارالار قابىلداۋ قاجەت. ۇلتتىق اگرارلىق عىلىمي-ءبىلىم بەرۋ ورتالىعىن زەرتتەۋ ءىسىنىڭ بارلىق ساتىسىن قامتيتىن اگروتەحنولوگيا حابىنا اينالدىرۋ كەرەگىن باسا ايتقانى ءبىز ءۇشىن وتە ماڭىزدى. بۇل ماسەلەنى شەشپەي, ەلىمىزدىڭ ەكونوميكاسىن تولىققاندى دامىتۋ كۇردەلى بولماق. سوندىقتان پرەزيدەنت اۋىل شارۋاشىلىعىن زامانعا سايكەس دامىتۋ ماقساتىندا ناقتى ۇسىنىستار, تاپسىرمالار بەردى. بۇل ءۇشىن مەملەكەتتىك رەتتەۋ جانە وسى سالاعا سالىقتىق, باسقا دا جەڭىلدىكتەر قاراستىرىلعانى قۋانتادى.
اتالعان سالانى دامىتۋدىڭ تاعى ءبىر جولى رەتىندە پرەزيدەنت شەتەلدىڭ تانىمال اگرو-عىلىمي ورتالىقتارىمەن تولىققاندى عىلىمي-تاجىريبەلىك ىنتىماقتاستىق ورناتۋ كەرەگىن اتاپ ءوتتى. سونداي-اق مەملەكەت باسشىسى جولداۋدا ء«بىز جەكە عىلىمي-تەحنولوگيالىق باستامالاردى قولدايمىز. ءبىلىم بەرۋ باعدارلامالارىن اۋىل شارۋاشىلىعى تالاپتارىنا بەيىمدەيمىز. ەگىن شارۋاشىلىعىندا ماڭىزدى رەفورما جاسايتىن كەز كەلدى. ەگىس تۇرلەرىن كوبەيتۋىمىز كەرەك. كوبىرەك پايدا اكەلەتىن داقىلدار ەككەن ءجون. سۋدى كوپ قاجەت ەتەتىن ەگىس القابىن بىرتىندەپ ازايتىپ, ءبىر عانا داقىل ءتۇرىن ەگۋدى شەكتەۋ قاجەت. ديقانداردى جەرگىلىكتى تۇقىممەن قامتاماسىز ەتۋ ماڭىزدى. سونىمەن قاتار جاڭا سۇرىپتاردى شىعارىپ, ونى ءوسىرۋ ماسەلەسىن شەشكەن ءجون», دەدى. س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى مەن ۋنيۆەرسيتەت قۇرامىنداعى توعىز عىلىمي-زەرتتەۋ ينستيتۋتى عالىمدارىنىڭ بۇل رەتتەگى عىلىمي ىزدەنىستەرى وراسان زور. قازىرگى تاڭدا ۋنيۆەرسيتەتىمىز اۋىل شارۋاشىلىعى سالاسىنىڭ كوشباسشىلارى نيدەرلاند كورولدىگىندەگى ۆاگەنينگەن ۋنيۆەرسيتەتى, فرانتسياداعى اگروپاريجتەح ۋنيۆەرسيتەتى, شۆەتسيا اۋىل شارۋاشىلىعى ۋنيۆەرسيتەتى, رەسەي حالىقتار دوستىعى جانە 188 حالىقارالىق ۋنيۆەرسيتەتپەن تىعىز جۇمىس ىستەيتىنىن اتاپ وتكىم كەلەدى.
ەكىنشىدەن, قازاقستاندا سۋ ماسەلەسى جىلدان-جىلعا كۇردەلەنىپ كەلەدى. سۋ ماسەلەسى – جالپى پلانەتارلىق ماسەلە. ەلىمىز بۇل پروبلەماعا قازىردىڭ وزىندە تاپ بولىپ وتىر. بۇل ماسەلەنى شەشۋدىڭ كوپتەگەن جولى ايتىلدى. ەڭ نەگىزگىسى, سۋ ماسەلەسىمەن كەشەندى تۇردە اينالىساتىن سۋ شارۋاشىلىعى جانە يرريگاتسيا مينيسترلىگى قۇرىلادى. بۇل – وتە دۇرىس شەشىم.
قورىتا ايتقاندا, پرەزيدەنت جولداۋىندا ايتىلعان ماسەلەلەر بولاشاعىمىزعا دەگەن مۇمكىندىگىمىز بەن سەنىمىمىزدى نىعايتادى. ال جولداۋدا ايتىلعان تاپسىرمالاردىڭ جۇزەگە اسۋىنا بارلىعىمىز ۇلكەن جاۋاپكەرشىلىكپەن اتسالىسۋىمىز قاجەت.
قانات تىرەۋوۆ,
س.سەيفۋللين اتىنداعى قازاق اگروتەحنيكالىق
زەرتتەۋ ۋنيۆەرسيتەتىنىڭ باسقارما توراعاسى-رەكتورى,
ۇعا اكادەميگى
