بىلتىر اتالعان كوللەدجگە پەداگوگ-عالىم بولات ابدىكارىم ۇلىنىڭ ەسىمى بەرىلگەن بولاتىن. بۇل جولعى شاراپاتتى شارۋا, كورسەتىلىپ جاتقان قۇرمەت – سول ءىستىڭ جالعاسى. نۇرا وڭىرىنەن ءوسىپ-ءونىپ, ەلىمىزدەگى ءبىلىم مەن عىلىمنىڭ دامۋىنا ەلەۋلى ۇلەس قوسقان عالىمدى جەرلەستەرى ايرىقشا قۇرمەتتەيدى. سالتاناتتى ءىس-شاراعا ب.ابدىكارىم ۇلىنىڭ تۋعان-تۋىستارى دا قاتىستى.
قاراعاندى وبلىسى اكىمىنىڭ ورىنباسارى باۋىرجان اسانوۆ ارداقتى ازاماتقا كورسەتىلىپ جاتقان قۇرمەتكە ريزاشىلىعىن ايتىپ, وبلىس اكىمى ەرماعانبەت بولەكپاەۆتىڭ قۇتتىقتاۋىن جەتكىزدى. ءمۇسىندى قازاقتىڭ تۇڭعىش عارىشكەرى توقتار اۋباكىروۆ, مەملەكەت جانە قوعام قايراتكەرى, ەكونوميكا عىلىمىنىڭ دوكتورى ەلەۋسىن ساعىندىقوۆ, نۇرا اۋدانىنىڭ اكىمى باقىتجان مۇقانوۆ, اقتوعاي اۋدانىنىڭ قۇرمەتتى ازاماتى ساعادات دۇيسەبەكوۆ جانە عالىمنىڭ پەرزەنتى ايان بولات ۇلى سالتاناتتى تۇردە اشتى.
– ارداقتى ازاماتتىڭ يگى ىستەرى مەن ەرەن ەڭبەگىن جاستارعا ۇلگى ەتۋ ماقساتىندا كوللەدجگە بولات ابدىكارىم ۇلى ەسىمىنىڭ بەرىلۋى – ماڭىزدى وقيعا. بۇعان قوسا ءبىلىم ورداسىنىڭ الدىنا ءبيۋستىن قويۋ – ۇلكەن قۇرمەت. سەبەبى نۇرا وڭىرىندە تۋىپ-وسكەن, ءبىلىم العان, بار عۇمىرىن ەلىمىزدىڭ ءبىلىم مەن عىلىم سالاسىنا ارناعان بولات ابدىكارىم ۇلىنىڭ ەسىمىمەن ەل ماقتانادى, – دەدى ت.اۋباكىروۆ.
ال عالىمنىڭ زامانداس دوسى ەلەۋسىن ساعىندىقوۆ عالىممەنەن العاش تانىستىعىنان باستاپ, ونىڭ قايراتكەرلىگىنە توقتالدى.
– «جاقسىنىڭ اتى, عالىمنىڭ حاتى ولمەيدى» دەگەنگە تاعى دا كوزىمىز جەتىپ وتىر. بولات ابدىكارىم ۇلى سياقتى عاسىر ارالاتىپ تۋاتىن تۇلعانى بۇگىنگى جانە ودان كەيىنگى ۇرپاقتىڭ ساناسىنا ءسىڭىرۋ – پارىز. ونىڭ ەڭ ەلەۋلى ىستەرىنىڭ ءبىرى – كاسىپتىك-تەحنيكالىق مەكتەپتەردى ساقتاپ قالۋعا جان سالىپ باقتى. سولاي ەتىپ قانا قويماي, كاسىپتىك-تەحنيكالىق ليتسەيلەر, گيمنازيالار, اۆتورلىق مەكتەپتەر, قازاق-تۇرىك ليتسەيلەرىن اشۋعا قول جەتكىزدى. بولات ابدىكارىم ۇلى – بۇل سالادا قاراپايىم عانا قىزمەت ەتىپ قويماي, كاسىپتىك ءبىلىم بەرۋدى عىلىمي تۇرعىدا زەرتتەپ, زەردەلەپ, بەلگىلى ءبىر تۇجىرىم جاساعان عالىم. بوكەڭنىڭ ەڭبەكتەگى جەتىستىكتەرىنىڭ قۇپياسى – عىلىمي-تەوريالىق نەگىزدەمەدە. «ادامنىڭ داڭقىن ەڭبەك شىعارادى» دەگەندەي, بوكەڭ ەڭبەگىمەن داڭققا بولەندى, سونىمەن بىرگە ول ەڭبەكتى كوتەرەتىن دە ادام ەكەنىن ءوزىنىڭ ءىس-تاجىريبەسىمەن دالەلدەدى, – دەدى ە.ساعىندىقوۆ.
سونىمەن قاتار پارلامەنت ءماجىلىسىنىڭ دەپۋتاتى قۇدايبەرگەن بەكسۇلتانوۆ, قازاقستان رەسپۋبليكاسىنىڭ ەڭبەك سىڭىرگەن ءارتىسى سەرىك وسپانوۆ تا اقجارما لەبىزدەرىن جەتكىزدى.
ايان بولات ۇلى مەيماندارعا العىسىن ءبىلدىرىپ: «جاقسى اكە بالاعا قىرىق جىل ازىق ەمەس پە؟ اكەمنىڭ كوزىن كورگەن, سىيلاسقان, ءىس-شاراعا ارنايى كەلىپ, اكەمىز تۋرالى جىلى ەستەلىكتەرىمەن بولىسكەن سىزدەرگە ۇلكەن راحمەت. وسى شارۋامىزدى بىردەن قولداعان اۋدان باسشىلىعىنا دا ايرىقشا العىس ايتقىمىز كەلەدى», دەدى.
سالتاناتتى ءىس-شارا سوڭىندا قوناقتار ۇستاز-عالىمنىڭ ەسكەرتكىشىنە گۇل شوقتارىن قويدى. ودان سوڭ كوللەدجدىڭ تىنىس-تىرشىلىگىمەن تانىستى.
ايتا كەتكەنىمىز ءجون بولار, ۇكىمەتتىڭ 2021 جىلعى 15 جەلتوقسانداعى № 890 قاۋلىسىنا سايكەس, «نۇرا كوپسالالى كوللەدجى» «بولات ابدىكارىم ۇلى اتىنداعى نۇرا كوپسالالى كوللەدجى» دەپ اتالدى.
قاراعاندى وبلىسى,
نۇرا اۋدانى
