العاشقى قۇتتىقتاۋ ءسوزدى مەكتەپ ديرەكتورى عاني باقىت ۇلى باستاپ, «التىنگۇل مومىسقىزىنىڭ اتىنا اۋديتوريا بەرۋدى ۇجىمدىق پەداگوگيكالىق كەڭەستە ۇيعاردىق. وقۋشى جۇرەگىڭە جول تاپقان ۇستاز قانداي بولاتىنىن كورسەتۋ ماقساتىندا وسىنداي ءىس-شارا ۇيىمداستىردىق» دەي كەلە, ءبىلىم كۇنىمەن جانە اۋديتوريانىڭ اشىلۋىمەن قۇتتىقتاپ, ارداقتى ۇستازعا مىقتى دەنساۋلىق, ۇزاق عۇمىر تىلەدى.
ء«بىزدىڭ كافەدرا بىرنەشە جىلدان بەرى وسى مەكتەپپەن بىرلەسىپ جۇمىس ىستەپ كەلە جاتىر. بۇل ءبىلىم ورداسى شاكىرت تاربيەلەۋدە ۇلكەن ۇلەس قوسىپ جاتىر, وسى جاعىنان بىزگە وتە جاقىن, سونىڭ ىشىندە اتى مەن زاتى وزىڭە ساي التىن اپاي - قيىن كەزدە جول تابا بىلەتىن, شاكىرت جۇرەگىنەن ورىن العان ۇستاز. بولاشاق تاعدىرىمىز بىلىمدە. ۇجىم التىن اپايدىڭ جولىن جالعاستىرسىن, قازاقتىڭ عىلىم كەڭىستىگى نەعۇرلىم كەڭەيە بەرسىن دەپ تىلەيمىن», دەدى ل.ن.گۋميلەۆ اتىنداعى ەۇۋ «قازاق ءتىل ءبىلىمى» كافەدراسىنىڭ پروفەسسورى, فيلولوگيا عىلىمدارىنىڭ دوكتورى بەكجان ءابدۋالي ۇلى.
استانا قالاسىنىڭ ءبىلىم باسقارماسى ادىستەمەلىك ورتالىعىنىڭ باسشىسى سىندار مۇراتقىزى دا قۇتتىقتاۋ ءسوز سويلەپ: «احمەت بايتۇرسىن ۇلىنىڭ ەسىمىمەن اتالعان بۇل مەكتەپ - كيەلى, اتامىزدىڭ ارۋاعى قولداسىن. كوپ كورگەننەن سۇرا دەگەندەي, سىزدەن الىپ جاتقانىمىز وتە جوعارى, ءدارىسحانا اشىلىپ قانا قويماي, ءسىزدىڭ ومىرلىك تاجىريبەڭىزدى ۇستازدار قاۋىمى جالعاستىرا بەرسىن, ءبىز قازاقتىڭ ءسوزىن تۇسىنەتىن ۇرپاق تاربيەلەۋىمىز كەرەك, ەشقانداي وكسفورد ۋنيۆەرسيتەتىن وقىماي-اق اتا-بابالارىمىز بارلىعىن زەرتتەپ ايتىپ كەتكەن, سونى ارى قاراي جالعاستىرىپ وتىرسىز», دەدى.
ول سونداي-اق «سىن تۇرعىسىنان ويلاۋدىڭ ۇلكەن تەحنولوگياسى» ترەنەرلىگىن ەلدەن بۇرىن جاساعان ا.مومىسقىزىنىڭ سىني ويلاۋ, ومىردە العان ءبىلىمدى پايدالانا ءبىلۋ تۇرعىسىندا مۇعالىمدەردى باعىتتايتىن ادىسكەر ترەنەر ەكەنىن اتاپ ءوتتى.
ل.ن.گۋميلەۆ اتىنداعى ەۇۋ «قازاق ءتىل ءبىلىمى» كافەدراسىنىڭ پروفەسسورى, فيلولوگيا عىلىمدارىنىڭ دوكتورى بەكجان ءابدۋالي ۇلى مەن استانا قالاسى اكىمدىگىنىڭ «ادىستەمەلىك ورتالىعى» مكقك ادىسكەرى كۇنىمبالا ىزتىلەۋقىزى اۋديتوريانىڭ قىزىل لەنتاسىن كەستى.
سالتاناتتى ءىس-شاراعا اعىلشىن ءتىلىنىڭ وقىتۋشىسى, اۋدارماشى, «حابار 24» تەلەارناسىنىڭ ءتىلشىسى ءارى ۆەلوشاباندوز, قازاقستاننىڭ 2 دۇركىن رەكوردشىسى ەرنات مەلس ۇلى, «قازاق راديوسىنىڭ» رەداكتور-جۇرگىزۋشىسى تولقىن سۇلتانقىزى جانە قالا مەكتەپتەرىنىڭ ۇستازدارى, وقۋشىلارى, اتا-انالارى قاتىستى.
اشىلۋ راسىمىنەن كەيىن جيىنعا قاتىسۋشىلار نازارىنا بار عۇمىرىن بالا وقىتىپ, شاكىرت تاربيەسىنە ارناعان ارداقتى ۇستازدىڭ ەڭبەك جولى جونىندە تىڭ دەرەكتەر ۇسىنىلدى.
التىن مومىسقىزىنىڭ 50 جىلدىق ۇستازدىق ەڭبەك جولىندا جەتكەن جەتىستىكتەرىن ايتا كەتەيىك. ول ەڭبەك جولىن تاراز قالاسىندا م.گوركي اتىنداعى مەكتەپتە باستاعان. سول كەزەڭدەردە-اق ونىڭ مەكتەپتەگى تىنىمسىز ەڭبەگى باستالىپ تا كەتكەن ەدى. جاس تالانتتىڭ توگىلگەن تەرى اقتالىپ, 1986 جىلى 20 تامىزدا كسرو جوعارعى كەڭەس پرەزيدۋمىنىڭ جارلىعىمەن نەبارى 33 جاسىندا ءبىلىم سالاسىنداعى جەتكەن جەتىستىكتەرى مەن قوعامدىق جۇمىستا اتقارعان قىزمەتى ءۇشىن «قۇرمەت بەلگىسى» وردەنىمەن ماراپاتتالعان.
وقىتۋدىڭ وزىق تەحنولوگياسىن ۇيرەنىپ, تاعىلىمدامادان ءوتىپ, «حالىقارالىق دارەجەدەگى ادىسكەر» اتانادى.
اباي وقۋلارىندا شاكىرتى تۇراربەك ماعجان جەڭىمپاز اتاندى. ۇلىلار مەكەنىنە ساياحات ەكسپەديتسياسىمەن ۇلى اباي ەلىنە بارۋ قۇرمەتىنە يە بولدى.
2020 جىلى مەكتەپكە ۇلت ۇستازى احمەت بايتۇرسىن ۇلى اتى بەرىلەدى. زاۋرە جاكانوۆنا باستاعان, ۇزەڭگىلەس ارىپتەسى التىن ۇستاز قولداعان مەكتەپ ۇجىمى ۇلى تۇلعانىڭ ءومىرىن زەرتتەپ-زەردەلەپ مۋزەي اشتى. ءبىر جىل بويى سول مۋزەيدىڭ جەتەكشىسى بولعان التىن مومىسقىزى تىنىمسىز ەڭبەك ەتىپ, مۋزەي قورىنىڭ دامۋىنا زور ۇلەس قوستى.
مەكتەپتە جارتى عاسىرعا جۋىق ەڭبەك ەتكەن ۇلاعاتتى ۇستاز التىنگۇل مومىسقىزى - بار باقىتىن بالا وقىتىپ, تاربيەلەۋدەن تاپقان ارداقتى جان. قازىر قوعامدا عىلىم مەن تەحنيكا دامىپ, اقپاراتتار اعىنى ۇدەگەن كەزەڭدە وقۋشىلاردىڭ كوركەم ادەبيەتتەر وقىماۋى التىن ۇستازدى تولعاندىردى. ناتيجەسىندە 5-8 سىنىپتارعا ارنالعان «وتباسىلىق ساۋاتتىلىق» وقۋ جوباسى جاسالىنىپ, باعدارلاماسى قۇرىلدى. رەسپۋبليكالىق اۆتورلىق باعدارلامالار كونكۋرسىنىڭ جەڭىمپازى التىن مومىنقۇلوۆانىڭ «وتباسىلىق ساۋاتتىلىق» اۆتورلىق باعدارلاماسى رەسپۋبليكاعا تانىمال. «وتباسىلىق ساۋاتتىلىق» وقۋ كلۋبى استانا قالاسى, ببجكبا قدي عىلىمي كەڭەسىندە ماقۇلدانعان.
پرەزيدەنتىمىز قاسىم-جومارت توقاەۆتىڭ ۇلتتىق قوعامدىق سەنىم كەڭەسىندە بەرگەن تاپسىرماسىنا سايكەس بعم «وقۋعا قۇشتار مەكتەپ» جوباسىن بەكىتكەن بولاتىن. جوبا اياسىندا 4 باعىت بويىنشا جۇمىستار جۇزەگە اسىرىلدى. ۇلاعاتتى ۇستازدىڭ وقۋشىلارى مەن اتا-انالارى بىرلەسە كىتاپقا قۇشتار بولىپ, تالاي جەڭىسكە جەتتى. وتكەن وقۋ جىلىنىڭ قورىتىندىسى بويىنشا «وقۋعا قۇشتار مەكتەپ» جوباسىمەن مەكتەپتە وتكىزىلگەن سايىستا ۇستازدىڭ شاكىرتى 8 سىنىپ وقۋشىسى نارۇل احات ۇلى جەڭىسكە جەتتى.
شارا سوڭىندا التىنكۇل مومىسقىزى ءسوز الىپ, وقۋشىعا, ۇستازعا, اتا-اناعا اۋديتوريانىڭ پايداسى ءتيىپ جاتسا, ءۇمىتتىڭ اقتالعانى دەپ ويلايمىن دەي كەلە, وسى اۋديتوريانىڭ مۇعالىمگە, اتا-اناعا, وقۋشىعا نەندەي پايدالارى بار ەكەنىنە توقتالىپ, اۋديتوريانىڭ اشىلۋ ماقساتىن ايتىپ ءوتتى. اۋديتوريادا ۇزتازداردىڭ, وقۋشىلاردىڭ, اتا-انالاردىڭ كومەكتەرىمەن جينالعان 120 كىتاپ بار ەكەنىن اتاپ, الداعى ۋاقىتتا تاعى دا كىتاپتارمەن تولىقتىرىلاتىنىن تىلگە تيەك ەتتى. اۋديتوريانىڭ بىرنەشە پاراقشادان تۇراتىن تۇجىرىمداماسىن تاراتىپ, شاراعا كەلگەندەردىڭ بارلىعىنا ريزاشىلىعىن ءبىلدىرىپ, العىس ايتتى.
