«مەملەكەتتىڭ ءبىلىم سالاسىنا قاتىستى جۇمىسىندا تۇتاستىق, ياعني جۇيە جوق. ءتىپتى, ءوزارا بايلانىس جوق دەۋگە بولادى. سوندىقتان بەس جاستان اسقان بالالارعا ارنالعان «كەلەشەك» اتتى بىرىڭعاي ەرىكتى جيناقتاۋ جۇيەسىن ەنگىزۋدى تاپسىرامىن. بۇل باعدارلامادا مەملەكەت تاراپىنان ۇسىنىلاتىن باستاپقى ءبىلىم بەرۋ كاپيتالى, جىل سايىنعى مەملەكەتتىك سىياقى جانە ينۆەستيتسيالىق تابىس قاراستىرىلۋعا ءتيىس. وسى جيناق پەن «ۇلتتىق قور – بالالارعا» جوباسىنىڭ قاراجاتى قوسىلعاندا جاس ۇرپاقتىڭ ساپالى ءبىلىم الۋىنا مۇمكىندىك تۋادى», دەدى ق.توقاەۆ.
بۇدان سوڭ ول قازىر ەڭبەك نارىعىندا اۋقىمدى وزگەرىستەر بولىپ جاتقانىن ايتتى. وندا تسيفرلى ەكونوميكانىڭ ءرولى ارتا تۇسپەك.
«پلاتفورمالىق جۇمىسپەن قامتۋ جۇيەسىنە قىزىعۋشىلىق ارتىپ كەلەدى. وسى سەكتوردا قازىردىڭ وزىندە جارتى ميلليوننان استام ادام جۇمىس ىستەيدى. الايدا ولاردىڭ ەڭبەك قۇقىقتارى تولىق قورعالماعان. سوندىقتان وسى ساناتتاعى ازاماتتاردىڭ ەڭبەك قۇقىقتارىن قورعاۋدىڭ ناقتى تاسىلدەرىن ازىرلەپ, پلاتفورمالىق جۇمىسپەن قامتۋ ماسەلەسىن تۇگەل رەتتەۋ قاجەت», دەدى پرەزيدەنت.
