فوتو: اشىق دەرەككوز
«سۋ ۇنەمدەيتىن تەحنولوگيالاردى ەنگىزۋ – اسا ماڭىزدى جانە شۇعىل مىندەت. سوندىقتان ءتيىمدى تاسىلدەر ۇسىنۋ قاجەت. دەگەنمەن ءبىز ءدال قازىرگى جاعدايدا جاڭا تاريف ساياساتىنان دا اتتاپ وتە المايمىز. ابدەن ەسكىرگەن ينفراقۇرىلىم ارەڭ جۇمىس ىستەپ تۇر. سوندىقتان جاڭا ينفراقۇرىلىم سالۋ – وتە ماڭىزدى مىندەت, قازىرگى نارىقتىڭ تالابى», دەپ اتاپ ءوتتى مەملەكەت باسشىسى.
پرەزيدەنتتىڭ ايتۋىنشا, سۋدى بارىنشا ۇنەمدەۋىمىز قاجەت, ال ونى نورماتيۆتەن ارتىق جۇمساعاندار اقىسىن جوعارى تاريفپەن تولەۋى كەرەك.
ء«بىر سوزبەن ايتساق, سۋدى بارىنشا ۇنەمدەۋىمىز قاجەت. وعان قوسا سۋدىڭ «كولەڭكەلى» نارىعى تۇبىرىمەن جويىلۋعا ءتيىس. حالقىمىز «سۋدىڭ دا سۇراۋى بار» دەپ بەكەر ايتپاعان. سۋ دەگەنىمىز – ۇنەمدەپ پايدالانباسا, تەز تاۋسىلاتىن شەكتەۋلى رەسۋرس. ونسىز شارۋالاردىڭ كۇنى قاراڭ. سول سەبەپتى بۇل سالادا زاڭسىزدىققا جول بەرىلمەيدى. تالاپقا باعىنبايتىندار قاتاڭ جازاعا تارتىلادى. ەلىمىز ءۇشىن سۋدىڭ ماڭىزى مۇناي, گاز نەمەسە مەتالدان كەم ەمەس. سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت دەپ سانايمىن. سوندىقتان سۋ رەسۋرستارى جانە يرريگاتسيا مينيسترلىگى قۇرىلادى», دەدى قاسىم-جومارت توقاەۆ.
جولداۋ بارىسىندا ۇلتتىق گيدروگەولوگيا قىزمەتى قايتا جۇمىس ىستەيتىنى دە بەلگىلى بولدى. سونداي-اق پرەزيدەنت قازاقستاننىڭ سۋ شارۋاشىلىعىن باسقارۋ جۇيەسىنە تۇگەل رەفورما جاسالاتىنىن قوسا ايتتى.
«مينيسترلىكتىڭ اياسىندا ۇلتتىق گيدروگەولوگيا قىزمەتى قايتا جۇمىس ىستەيتىن بولادى. ەلىمىزدىڭ سۋ شارۋاشىلىعىن باسقارۋ جۇيەسىنە تۇگەل رەفورما جاسالادى. «قازسۋشار», «نۇرا توپتىق سۋ قۇبىرى» جانە باسقا دا نەگىزگى كومپانيالاردا وزگەرىس بولادى. جالپى, وسى سالانىڭ ماتەريالدىق جاعدايىن جاقسارتىپ, كادر ماسەلەسىن شەشۋ كەرەك. سۋ تاپشىلىعىنىڭ ارتۋى – ورتالىق ازيا مەملەكەتتەرىنە ورتاق ماسەلە. سۋدى ۇنەمدەپ پايدالانۋ ەنەرگەتيكا نەمەسە كولىك سالاسى سياقتى ايماقتاعى ىنتىماقتاستىقتىڭ تاعى ءبىر جاڭا باعىتىنا اينالماق. ۇكىمەتكە كورشى ەلدەرمەن بىرلەسىپ, بۇل ماسەلەنى جان-جاقتى پىسىقتاۋدى تاپسىرامىن», دەپ تۇيىندەدى مەملەكەت باسشىسى.
