فوتو: اشىق دەرەككوز
1 قىركۇيەكتەن باستاپ مەملەكەتتىك بيۋدجەت ەسەبىنەن قارجىلاندىرىلاتىن ۇيىمداردىڭ ياعني دارىگەرلەر مەن بالاباقشا تاربيەشىلەرىنىڭ جالاقىسى ارتادى. مەملەكەت باسشىسى قاسىم-جومارت توقاەۆتىڭ تاپسىرماسى بويىنشا 2020 جىلدان باستاپ تاربيەشىلەردىڭ جالاقىسى جىل سايىن 25 پايىزعا ءوستى. بيىل 30 پايىزعا ۇلعايادى. ەلىمىزدەگى جالپى ءبىلىم بەرەتىن مەكتەپتەردەگى باستاۋىش سىنىپ وقۋشىلارى تەگىن تاماقپەن قامتىلادى. تەگىن تاماقتاندىرۋدا الماتى قالاسى بويىنشا ءار بالاعا 800 تەڭگە بولىنسە, باسقا وڭىرلەردە 577 تەڭگە. قىركۇيەك ايىنان ستۋدەنتتەردىڭ, ماگيسترانتتاردىڭ جانە دوكتورانتتاردىڭ شاكىرتاقىسى دا ارتادى. باكالاۆريات دارەجەسى بويىنشا ءبىلىم الۋشى ستۋدەنتتەردىڭ شاكىرتاقىسى 20 پايىزعا, ماگيسترانتتار مەن دوكتورانتتارعا 15 پايىز, تەحنيكالىق جانە كاسىپتىك ءبىلىم الۋشى ستۋدەنتتەرگە 50 پايىز قوسىلادى. جوعارى وقۋ ورىندارىنىڭ پروفەسسور-وقىتۋشىلارىنىڭ دا ەڭبەكاقىسى 20 پايىزعا وسەدى. مەملەكەت باسشىسىنىڭ تاپسىرماسىنا سايكەس الەۋمەتتىك از قامتىلعان وتباسى ستۋدەنتتەرىنىڭ جاتاقحاناعا جۇمسايتىن شىعىنى سۋبسيديا ەسەبىنەن تولەنەدى. جاڭارتىلعان ء«بىلىم تۋرالى» زاڭ كۇشىنە ەنەدى. سوعان سايكەس جوعارى وقۋ ورىندارى ستۋدەنتتەردى جاتاقحاناعا ورنالاستىرۋعا مىندەتتى بولادى. زاڭ تالابى ورىندالماسا, ايىپپۇل سالىنادى.
سونىمەنت قاتار وسى ايدان باستاپ «ونلاين-پلاتفورمالار جانە ونلاين-جارناما» تۋرالى زاڭ قولدانىسقا ەنگىزىلەدى. بۇل زاڭدا «ونلاين-پلاتفورما پايدالانۋشىسى» جانە «ينفليۋەنسەر (بلوگەر)» دەگەن ۇعىمداردىڭ انىقتاماسى ايقىندالىپ, ينفليۋەنسەردىڭ قۇقىقتارى مەن مىندەتتەرى ناقتى جازىلعان. بۇدان بىلاي عالامتور ارقىلى اقشا تابۋشى بلوگەر بىتكەن جەكە كاسىپكەر رەتىندە تىركەلىپ, تابىس سالىعىن تولەيتىن بولادى.
«جانۋارلارعا جاۋاپكەرشىلىكپەن قاراۋ تۋرالى» زاڭنىڭ 11-بابىنا ساي يت پەن مىسىق اسىراۋشىلار ءۇي جانۋارىن ەسەپكە قويىپ, چيپ سالدىرۋعا مىندەتتى بولادى, ورىنداماسا ايىپپۇل ارقالايدى. بىراق بۇل قىزمەت اقىلى نەگىزدە جۇزەگە اسىرىلادى. ۆەتەرينارلار يت, مىسىققا چيپ سالعانى ءۇشىن 3,5-8 مىڭ تەڭگە ارالىعىندا اقشا الادى. حالىقتىڭ الەۋمەتتىك وسال توپتارى اسىراپ وتىرعان ءۇي جانۋارىنا چيپ سالدىرۋ اقىسى بيۋدجەت ەسەبىنەن وتەلەدى.
