القالى جيىنعا قازاقستان مادەنيەت جانە سپورت ءمينيسترى اسحات ورالوۆ, تاجىكستان مادەنيەت ءمينيسترى زۋلفيا داۆلاتزودا, قازاقستان جازۋشىلار وداعىنىڭ توراعاسى مەرەكە قۇلكەنوۆ, تاجىكستان جازۋشىلار وداعىنىڭ توراعاسى كوسيم نوزيم, سونداي-اق ەكى ەلدىڭ كورنەكتى مادەنيەت قايراتكەرلەرى مەن زيالى قاۋىم وكىلدەرى قاتىستى.
ء«بىز مەملەكەتتەرىمىزدىڭ ادەبيەت سالاسىنداعى ءوزارا ىنتىماقتاستىعى ماسەلەلەرىن تالقىلادىق. اتاپ ايتقاندا, جازۋشىلار وداعى قازاقستاندىق اۆتورلاردىڭ بەس شىعارماسىن تاجىك تىلىنە اۋدارۋ تۋرالى ۇسىنىس ايتتى. سونداي-اق قازاقستاندا تاجىك ادەبيەتشىلەرىنىڭ بەس ەڭبەگىن شىعارۋ ۇسىنىلدى. بۇل قازاقستان مەن تاجىكستان اراسىنداعى مادەني بايلانىستاردى نىعايتۋعا ىقپال ەتەدى دەپ سانايمىن», دەدى اسحات ورالوۆ.
سونىمەن قاتار مەرەكە قۇلكەنوۆ پەن كوسيم نوزيم ەكى ەلدىڭ جازۋشىلار وداقتارى اراسىنداعى ىنتىماقتاستىق تۋرالى مەموراندۋمعا قول قويدى.
كەزدەسۋ تاجىك دەلەگاتسياسىنا ەستەلىك كىتاپتار تابىستاۋ راسىمىمەن اياقتالدى. قوناقتارعا سىيلىق رەتىندە قازاق اقىندارىنىڭ «قازاق پوەزياسىنىڭ ءىنجۋ-مارجاندارى» اتتى 13 تومدىق ولەڭدەر جيناعى جانە باسقا دا كىتاپتار تابىستالدى.
قازاقستان مەن تاجىكستاندى گەوگرافيالىق كورشىلەستىك قانا ەمەس, سونداي-اق عاسىرلار بويعى تاريح تا بايلانىستىرادى. مادەني الماسۋ ارقاشان ەكى ەلدىڭ تىعىز قارىم-قاتىناسىنىڭ ماڭىزدى بولىگى بولدى. سوندىقتان ادەبيەتتى دامىتۋ سالاسىنداعى ءوزارا ءىس-قيمىلدىڭ كۇشەيۋى بۇكىل ورتالىق ازيا ايماعىنا وراسان زور پايدا اكەلۋى مۇمكىن.
«قاجەتتى قادامدار قازىردىڭ وزىندە جاسالىپ جاتىر. ماسەلەن, كەلەسى جىلى ۇلتتىق اكادەميالىق كىتاپحانادا تاجىك ادەبيەتىنىڭ بۇرىشى اشىلادى. سونىمەن قاتار ءبىزدىڭ ەلدەرىمىزدىڭ ۇلتتىق كىتاپحانالارى اراسىندا ىنتىماقتاستىق تۋرالى شارت بار, ونىڭ شەڭبەرىندە كىتاپحانا, ارحيۆ جانە مۋزەي قورلارىنىڭ جازباشا جانە باسپا قۇجاتتارىن ساقتاۋ باعىتىندا جۇمىستار جۇرگىزىلۋدە. ال تاجىك تاراپى ءوز كەزەگىندە قازاقستان باسپالارى مەن كىتاپ ساۋدا ۇيىمدارىن وسى جىلدىڭ قازان ايىندا تاجىكستان استاناسىندا وتەتىن XI حالىقارالىق «دۋشانبە كىتابى» كورمەسىنە شاقىردى», دەدى مينيستر.
ايتا كەتەيىك, كەلەسى جىلى تاجىكستاندا قازاقستاننىڭ مادەنيەت كۇندەرىن وتكىزۋ جوسپارلانىپ وتىر.
