ۋنيۆەرسيتەت رەكتورى سالامات ءيدريسوۆتىڭ ايتۋىنشا, بايقاۋدىڭ ماقساتى – ستۋدەنتتەر اراسىندا اتا زاڭدى ۇلىقتاپ, جاستاردىڭ قۇقىقتىق ساۋاتىن ارتتىرۋ. بيىل بايقاۋعا قاتىسۋعا ءار ماماندىقتا وقيتىن 250 ستۋدەنت نيەت ءبىلدىرىپتى.
«بايقاۋعا قاتىسۋشىلار العاشقى كەزەڭدە كونستيتۋتسيانىڭ ەرەجەلەرىن ءبىلۋ دەڭگەيىن انىقتاۋ ءۇشىن 25 سۇراققا جاۋاپ بەردى. ال ەكىنشى كەزەڭگە وتكەندەرگە اتا زاڭنىڭ بارلىق بابىن جاتقا ايتۋ تالابى قويىلدى», دەيدى سالامات يدريسوۆ.
ستۋدەنتتەر سايىسىنا اتىراۋ قالالىق سوتىنىڭ, پروكۋراتۋرا مەن جەكە سوت ورىنداۋشىلاردىڭ وكىلى, ۋنيۆەرسيتەتتىڭ ازاماتتىق-قۇقىقتىق پاندەر كافەدراسىنىڭ وقىتۋشىلارى قازىلىق ەتتى. بايقاۋ قورىتىندىسىمەن ءۇش ستۋدەنت قاتارلاستارىنان وزىپ شىقتى.
ماسەلەن, ءۇشىنشى ورىندى يەلەنگەن ەكولوگيا ماماندىعىنىڭ ستۋدەنتى بوتاكوز ينتيماحوۆاعا بىرجىلدىق وقۋ اقىسىنا 30 پايىز جەڭىلدىك بەرىلدى. ال ەكىنشى ورىنعا يە بولعان قىلمىستىق-قۇقىقتىق پاندەر كافەدراسىنىڭ ستۋدەنتى مەدينا ابدەش وقۋ اقىسىنىڭ 50 پايىزىن جەڭىلدىكپەن تولەۋگە مۇمكىندىك الىپ وتىر. اتا زاڭنىڭ بارلىق بابىن جاتقا بىلەتىن ازاماتتىق-قۇقىقتىق پاندەر كافەدراسىنىڭ ستۋدەنتى جاڭگىر تەمىرحانوۆ ءبىرىنشى جۇلدەنى ەنشىلەدى. ەندى ول ۋنيۆەرسيتەتتە ءبىر جىل تەگىن وقيدى.
اتىراۋ وبلىسى
