ءىس-شارانى وتكىزۋ كەزىندە اۋماقتىق بولىمشەلەر قۇقىقتىق ءتۇسىندىرۋ جۇمىستارىن بەلسەندى جۇرگىزەدى. سونىمەن قاتار قوعامدىق ورىنداردا, اۆتوبۋستاردا, كينوتەاترلاردا جاياۋ جۇرگىنشى بالالاردىڭ جول ءجۇرۋ قاعيدالارىن ساقتاۋىن جانە بالالاردى تاسىمالداۋ كەزىندە ارنايى قۇرىلعىلارىن پايدالانۋ كەرەكتىگىن ناسيحاتتايتىن اۋديو جانە بەينەروليكتەر كورسەتىلەدى. ودان بولەك, وقۋ جىلىنىڭ باستالۋىمەن ءىس-شارا شەڭبەرىندە پوليتسيا قىزمەتكەرلەرى ءبىلىم بەرۋ ورگاندارى, مەكتەپ جاساقتارىمەن بىرلەسىپ, جول ءجۇرۋ قاۋىپسىزدىگى بويىنشا ساباقتار وتكىزبەك. ايتا كەتۋ كەرەك, وقۋ ورىندارىنىڭ جانىنداعى جول ينفراقۇرىلىمى دا تۇراقتى نەگىزدە تەكسەرىلەدى.
جول جانە كوممۋنالدىق قىزمەتتەردىڭ وكىلدەرىمەن بىرلەسىپ, جالپى ءبىلىم بەرۋ مەكەمەلەرىنە ىرگەلەس اۋماقتا جاياۋ جۇرگىنشىلەر وتكەلدەرىن قاجەتتى جول بەلگىلەرى, جاياۋ جۇرگىنشىلەر قورشاۋلارى جانە جول ءجۇرىسىن رەتتەۋدىڭ باسقا دا تەحنيكالىق قۇرالدارىمەن قامتاماسىز ەتۋ بويىنشا بەس مىڭعا جۋىق تەكسەرۋ جۇرگىزىلگەن بولاتىن. ناتيجەسىندە ۋاكىلەتتى ۇيىمدارعا كەمشىلىكتەردى جويۋ بويىنشا 1500-عا جۋىق ۇيعارىم بەرىلدى. سونداي-اق بالالار مەن جاسوسپىرىمدەردى تاسىمالداۋعا ارنالعان كولىكتەرگە كوپ كوڭىل ءبولىنىپ وتىر.
«بيىل ءبىزدىڭ قىزمەتكەرلەر وقۋ ورىندارىنا تيەسىلى 1200-گە جۋىق تاسىمالداۋ كولىگىن تەكسەردى. انىقتالعان كەمشىلىكتەردى جويۋ بويىنشا 200-دەن استام نۇسقاما بەرىلدى. ەلىمىزدىڭ بارلىق مەكتەبى بىرەر كۇندە بالالارعا ەسىگىن ايقارا اشادى. بۇدان بىلاي بالالاردىڭ نەگىزگى ءجۇرۋ باعدارى ء«ۇي – مەكتەپ – ءۇي» اراسىندا بولماق. جۇرگىزۋشىلەر جول قوزعالىسىن رەتتەيتىن جانە باعدارشام سيگنالدارىنىڭ, جول بەلگىلەرىنىڭ, جول جۇمىستارىندا قولدانىلاتىن دىبىستىق جانە جارىق سيگنالدارىنىڭ تالاپتارىن قاتاڭ ساقتاۋى قاجەت. ال بالالارعا تەك تروتۋارلارمەن نەمەسە جاياۋ جۇرگىنشىلەر جولدارىمەن, ال ولار بولماعان كەزدە جول جيەكتەرىمەن جۇرۋگە كەڭەس بەرەمىز. جولدىڭ ءجۇرىس بولىگىن تەك جاياۋ جۇرگىنشىلەر وتكەلدەرى ارقىلى, ال ولار كورىنبەيتىن جەردە – تروتۋارلار نەمەسە جول جيەكتەرى سىزىعىنىڭ قيىلىستارىندا كەسىپ ءوتۋ كەرەك. جولدا جۇرەتىن بارلىق ادامدى جول ەرەجەلەرىن ساقتاۋعا جانە وسكەلەڭ ۇرپاعىمىزدى قورعاۋعا شاقىرامىز. ىشكى ءتارتىپ, زاڭعا جانە باسقا ادامداردىڭ قۇقىقتارىنا قۇرمەتپەن قاراۋ – قازاق قوعامى ۇمتىلۋعا جانە سوعان سايكەس بولۋعا ءتيىس نورمالار», دەيدى ءىىم اپك ەرەكشە تاپسىرمالار جونىندەگى اعا ينسپەكتور اقتوتى بورانوۆا.
