فوتو: ۇكىمەتتىڭ ءباسپاسوز قىزمەتى
ۆەدومستۆو باسشىسى مارات احمەتجانوۆ پوليتسيانىڭ كۇندەلىكتى قىزمەتىندە زاماناۋي تەحنولوگيالاردى كەڭىنەن قولدانۋ – مەملەكەت باسشىسىنىڭ ىشكى ىستەر ورگاندارىنىڭ الدىنا قويعان باستى مىندەتتەردىڭ ءبىرى ەكەنىن اتاپ ءوتتى.
اتاپ ايتقاندا, ىشكى ىستەر مينيسترلىگى رەسپۋبليكاداعى قالالاردىڭ كوشەلەرى مەن قوعامدىق ورىندارىندا «تولىق قامتۋ» پرينتسيپىمەن بەينەباقىلاۋلار ەنگىزۋدە. جىل باسىنان بەرى پوليتسيانىڭ جەدەل باسقارۋ ورتالىقتارىنداعى (جبو) بەينەكامەرالار ارقىلى 6 مىڭ قىلمىس اشىلدى, 2,7 ملن جول ەرەجەسىن بۇزۋ, سونداي-اق 312 مىڭ باسقا دا اكىمشىلىك قۇقىق بۇزۋشىلىق انىقتالدى. ناتيجەسىندە, بيىل ەلىمىزدەگى قىلمىس كورسەتكىشى 17%-عا تومەندەگەن.
«تسيفرلاندىرۋ ارقىلى ءتيىستى مەملەكەتتىك قىزمەتتەر جۇمىسىنىڭ تيىمدىلىگىن ارتتىرۋعا بولاتىنىنا تالاي رەت كوزىمىز جەتتى. ناتيجەسىندە, ەڭبەك ونىمدىلىگى ارتىپ, جەمقورلىق فاكتىلەرى ازايۋدا. تسيفرلىق تەحنولوگيالاردى ەنگىزۋ ارقىلى ىشكى ىستەر مينيسترلىگى دە جاقسى ناتيجەلەرگە قول جەتكىزىپ وتىر. ەندى مۇنى ايماقتاردا ودان ءارى كەزەڭ-كەزەڭىمەن جۇزەگە اسىرۋ قاجەت», دەدى ءاليحان سمايىلوۆ.
بۇدان بولەك, ۇكىمەت باسشىسى مەكتەپتەردەگى قاۋىپسىزدىكتى قامتاماسىز ەتۋ جۇمىستارىمەن تانىستى. اتاپ ايتقاندا, وقۋ ورىندارىندا ورناتىلعان بەينەكامەرالارداعى جازبالار مەن دابىل تۇيمەشەلەرىنىڭ سيگنالدارىن جەدەل باسقارۋ ورتالىقتارىنا جانە پوليتسيانىڭ كەزەكشى بولىمشەلەرىنە شىعارۋ بارىسى كورسەتىلدى. بۇگىندە مۇنداي شارالارمەن 3 654 مەكتەپ قامتىلعان, بەينەباقىلاۋ كامەرالارى 7 600 مەكتەپتە ورناتىلعان. ولاردى قوسۋ جۇمىستارى جالعاسىپ جاتىر.
سونىمەن قاتار ىشكى ىستەر ورگاندارىنىڭ مەكەمەلەرى دە جاپپاي بەينەباقىلاۋمەن قامتىلعان. بارلىعى 18 مىڭ كامەرا ورناتىلعان. بۇل قىزمەتكەرلەردىڭ جانە جۇمىس پروتسەسىنە باسقا دا قاتىسۋشىلاردىڭ ءىس-ارەكەتىن باقىلاۋعا مۇمكىندىك بەرەدى. ءدال وسىنداي جۇمىستار قىلمىستىق-اتقارۋ جۇيەسى مەكەمەلەرىندە دە جۇرگىزىلۋدە. اتاپ ايتقاندا, 52 كولونياعا 22 مىڭ بەينەكامەرا ورناتىلعان. بەينەباقىلاۋدى قىلمىستىق-اتقارۋ جۇيەسى كوميتەتىنىڭ سيتۋاتسيالىق ورتالىعى مەن پروكۋراتۋرا ورگاندارى جۇرگىزەدى.
بۇدان بولەك, ۇكىمەت باسشىسى «تسيفرلىق پوليتسەي» جوباسى اياسىندا ساتىپ الىنعان جاڭا بەينەجەتونداردىڭ جۇمىسىن باعالادى. قۇرىلعى ۆيدەونى باسشىلار مەن باسقا دا تەكسەرۋشىلەردىڭ جۇمىس ورىندارىنا ونلاين رەجيمدە ترانسلياتسيالايدى. بەينەجەتوندارعا ورناتىلعان باعدارلاما پوليتسيا قىزمەتكەرىنە بەينەجازبالاردى ءوز بەتىنشە جويۋعا, قۇرىلعىنى وشىرۋگە نەمەسە ءوزىنىڭ وتىرعان جەرىن جاسىرۋعا مۇمكىندىك بەرمەيدى.
سونداي-اق پرەمەر-مينيسترگە پوليتسياعا جول ەرەجەسىن بۇزعانداردى انىقتاۋعا كومەكتەسەتىن «قورعاۋ» جۇيەسىنىڭ ەرەكشەلىكتەرى تۋرالى باياندالدى. باعدارلاما كوشە كامەرالارىنان الىنعان دەرەكتەردى تالداي وتىرىپ, جاقىن ماڭداعى پوليتسيا قىزمەتكەرىنىڭ پلانشەتىنە قاۋىپتى جۇرگىزۋشىنىڭ كەلە جاتقانى تۋرالى سيگنال بەرەدى. بۇل جول قوزعالىسى ەرەجەلەرىن قاساقانا بۇزۋشى, يا جوعارى جىلدامدىقپەن كەلە جاتقان كولىك جۇرگىزۋشىسى دە بولۋى مۇمكىن.
ءاليحان سمايىلوۆ تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ شارالارىن جۇزەگە اسىرۋ بارىسىمەن, كوشى-قون سالاسىنداعى مەملەكەتتىك قىزمەتتەردى كورسەتۋ جۇمىستارىنىڭ ناتيجەسىمەن جانە CyberPol ينتەرنەت-الاياقتىقپەن كۇرەس جونىندەگى جوبامەن تانىستى. اتاپ ايتقاندا, پوليتسيا بايلانىس وپەراتورلارىمەن بىرلەسە وتىرىپ, جالعان نومىرلەردەن كەلەتىن قوڭىراۋلارعا تەحنيكالىق توسقاۋىل قويادى, ناتيجەسىندە, بۇگىنگى كۇنى الاياقتاردىڭ 36,5 ملن قوڭىراۋىنا توسقاۋىل قويىلدى.
ەسىرتكى قىلمىسىمەن كۇرەس بويىنشا, بيىل قۇقىق قورعاۋ جانە ارنايى ورگاندار 14 توننادان استام ەسىرتكى تاركىلەدى, ونىڭ ىشىندە 71 كەلىدەن استامى گەروين جانە 652 كەلىسى «سينتەتيكا». قۇنى 24 ملرد تەڭگە بولاتىن 4,7 ملن ءبىر رەتتىك دوزا اينالىمعا جىبەرىلمەدى. 52 ەسىرتكى زەرتحاناسى جويىلدى. سونداي-اق 85 توننا پرەكۋرسور تاركىلەنىپ, ناتيجەسىندە 20 ملن ءبىر رەتتىك «سينتەتيكا» وندىرىسىنە توسقاۋىل قويىلدى. 2,5 مىڭ ەسىرتكى سايتى بۇعاتتالدى.
سونىمەن قاتار كادرلىق پروتسەستەردى اۆتوماتتاندىرۋ قورىتىندىسى, جەدەل-قىزمەت, قوعامدىق ءتارتىپتى قامتاماسىز ەتۋ جانە جالپى قۇقىق بۇزۋشىلىقتىڭ الدىن الۋ بويىنشا وزەكتى ماسەلەلەر قارالدى.
