فوتو: تۇركىستان وبلىسى اكىمىنىڭ ءباسپاسوز قىزمەتى
كورنەكتى مەملەكەت جانە قوعام قايراتكەرى, بەلگىلى ەتنوگراف, تاريحشى عىلىم وزبەكالى جانىبەكوۆكە ارنالعان بيىلعى جىلى ون بەسىنشى مارتە ءوتىپ جاتقان كورمەنىڭ اشىلۋ سالتاناتىنا تۇركىستان قالاسى اكىمىنىڭ ورىنباسارى ەرلان كۇزەمباەۆ, قالالىق ءماسليحاتتىڭ اپپارات باسشىسى جانبولات يبراگيموۆ, ەلىمىزگە بەلگىلى عالىمدار, كىتاپحانا, جوو مەن جالپى ورتا, سالالىق مەكتەپتەر مەن ورتالىق ۇيىم باسشىلارى, قىزمەتكەرلەرى جانە باق وكىلدەرى قاتىستى.
«ازىرەت سۇلتان» مۋزەي-قورىعىنىڭ ديرەكتورى ماۋلەن سادىقبەكوۆ قايراتكەر تۇلعانىڭ قازاق ەلى ءۇشىن اسىرەسە قوجا احمەت ياساۋي كەسەنەسىن ساقتاۋ, قالپىنا كەلتىرۋ, مۋزەيلەندىرۋ بويىنشا اتقارعان ەڭبەگى ۇشان-تەڭىز ەكەندىگىن جەتكىزدى. سونداي-اق بيىلعى كورمەنىڭ ەرەكشەلىكتەرىن اتاپ ءوتتى.
«تار زامان, تايعاق كەشۋ ءداۋىرىنىڭ وزىندە مانسابىن عانا ەمەس, باسىن دا قاتەرگە تىگە ءجۇرىپ, ۇلتى ءۇشىن ۇلى ىستەردى اتقارىپ كەتكەن «رۋح ساردارى» اتانعان قازاق رۋحانياتىنىڭ قارا نارى وزبەكالى جانىبەكوۆتىڭ 28 تامىز – تۋعان كۇنى. وسى داتانى مەرەكە رەتىندە اتاپ ءوتۋدى داستۇرگە اينالدىردىق. مادەنيەت ءمينيسترى بولىپ وتىرعان تۇسىندا ءبىرتۋار ازامات «ازىرەت سۇلتان» مۋزەي-قورىق قورىنا وتكىزگەن جادىگەرلەرى مەن ءوز كىتاپتارىندا اتاپ كورسەتكەن ەلىمىزگە ەڭبەگى سىڭگەن ازاماتتاردىڭ دا جەكە زاتتارىنىڭ كورمەگە قويىلۋى ەدى. ول – كسرو جوعارعى كەڭەسىنىڭ شەشىمىمەن كسرو-نىڭ «حالىق مۇعالىمى» قۇرمەتتى اتاعىمەن ماراپاتتالعان اتىراۋلىق ازامات قۇسني ايتقاليەۆ پەن ەلىمىزگە ەڭبەگى سىڭگەن قۇرىلىسشى, رەستاۆراتور ارىنبەك ورازباي ۇلى. اتالعان كورمە كەلۋشىلەرگە ءبىر اي قىزمەت كورسەتەدى», دەدى مۋزەي ديرەكتورى.
اشىلۋ سالتاناتىنان سوڭ جينالعان كوپشىلىك «وزبەكالى جانىبەكوۆ تاعىلىمى» كورمەسىن تاماشالادى. شارا بارىسىندا مۋزەي-قورىق ديرەكتورى اتالعان ازاماتتاردىڭ ۇرپاقتارىنا كورمە ۇيىمداستىرۋ جۇمىستارىنا اتسالىسقانى ءۇشىن العىس ءبىلدىرىپ, سىي-سياپات جاسادى.
بۇدان سوڭ تۇركىستان قالاسى ارداگەرلەر كەڭەسىنىڭ توراعاسى جارقىنبەك قۇلبايىنبەتوۆ, تۇركىستان قالاسىنىڭ قۇرمەتتى ازاماتى, ارداگەر اقىن نۇرماحان نازاروۆ, تۇركىستان قالاسىنىڭ قۇرمەتتى ازاماتى ماقسۇت اتامباەۆ, تۇلعانىڭ قارىنداسى ايعانىم ابانقىزى, كەزىندە ءوزى جۇمىسقا قابىلداعان, بىرگە قىزمەتتەس بولعان راحيا سۇلەيمەنقىزى, ەلىمىزگە ەڭبەگى سىڭگەن قۇرىلىسشى, رەستاۆراتور ارىنبەك ورازباي ۇلىنىڭ ۇلى ارىستانبەك ارىنبەك ۇلى ءسوز الىپ, ءو.جانىبەكوۆ جايلى ەستەلىك پىكىرلەرىن ايتتى.
