اتاپ ايتقاندا, ەكولوگيا ماسەلەسىندە قالا تۇرعىندارىنىڭ شاعىمىن تۋدىرىپ جۇرگەن قالا شەتىندەگى بۇرىنعى ەت كومبيناتىنىڭ اۋماعىنان كەلەتىن جاعىمسىز ءيىستىڭ سەبەپتەرى ءسوز بولدى. ول جەردەگى الكوگول قالدىقتارىن ميكروبيولوگيالىق زەرتتەۋگە 2019 جىلى وبلىس بيۋدجەتىنەن 23,5 ملن تەڭگە بولىنگەنىمەن, ودان ەشقانداي ناتيجە شىقپاعان. سىبايلاس جەمقورلىققا قارسى قىزمەت اكىمدىككە وسى جەرلەردى توپىراقپەن كومىپ تاستاۋدى ۇسىنىپ وتىر.
سىبايلاس جەمقورلىققا قارسى قىزمەتتىڭ سىنىنا ۇشىراعان تاعى ءبىر ماسەلە – اۋدانارالىق جولاۋشىلار تاسىمالىن سۋبسيديالاۋعا قاتىستى. مونيتورينگ بارىسىندا اۋدانارالىق اۆتوبۋس رەيستەرىنىڭ جارتىسىنا جۋىعى ناقتى كەستە بويىنشا جۇرمەيتىنى جانە جولاۋشىلار تولعاننان كەيىن عانا كەشىگىپ جولعا شىعاتىنى انىقتالعان. مىسالى, اقتوبە قالاسى مەن بايعانين اۋىلى اراسىندا كۇن سايىن ەكى باعىتقا ەكى رەيس قاتىناۋى كەرەك. بىراق شىن مانىندە, اۆتوبۋستاردىڭ كەي كۇندەرى جۇرمەي قالاتىنى ءوز الدىنا, جۇرگەن كۇننىڭ وزىندە ءبىر عانا رەيس قاتىناپ كەلگەن. اۆتوبۋستاردىڭ توزۋى, ياعني جولاۋشىلار ءومىرى مەن دەنساۋلىعىنا قاۋىپتىلىگى ءوز الدىنا بولەك ماسەلە.
سونىمەن قاتار قۇرىلىس سالاسى دا سىبايلاس جەمقورلىققا قارسى قىزمەتتىڭ اۋىر سىنىنا ۇشىرادى. اقتوبە وبلىسىندا سالىنىپ جاتقان 75 نىساننىڭ 23-ءى, ياعني 30 پايىزى ءارتۇرلى سەبەپتەرمەن توقتاپ نەمەسە تەجەلىپ تۇر. سونىڭ ءبىرى – شالقار قالاسىندا 2018 جىلى قۇرىلىسى باستالىپ, 2019 جىلى اياقتالۋعا ءتيىس بولعان مەكتەپ عيماراتى. جوبالاۋ قاتەلىكتەرىنىڭ جيىنتىعى, مەردىگەردىڭ جۇمىستاردى ادال اتقارماۋى جانە تاپسىرىس بەرۋشىنىڭ كەلىسپەۋشىلىگى قۇرىلىس مەرزىمدەرىنىڭ 5 جىلدان استام ۋاقىتقا سوزىلۋىنا جانە جوبانىڭ قۇنى 900 ملن تەڭگەدەن 1,3 ملرد تەڭگەگە دەيىن قىمباتتاۋىنا اكەلىپ سوققان.
وسى جانە وزگە دە كوپتەگەن پروبلەمالار بويىنشا سىبايلاس جەمقورلىققا قارسى قىزمەت اقتوبە وبلىسىنىڭ اكىمدىگىنە قىزمەتتىك تەكسەرۋ جۇرگىزۋدى جانە بارلىق كىنالى لاۋازىمدى ادامداردى اتقاراتىن لاۋازىمدارىنان بوساتۋعا دەيىن قاتاڭ تارتىپتىك جاۋاپكەرشىلىككە تارتۋ تۋرالى ماسەلەنى قاراۋدى ۇسىندى.
