اتسۇيەر قاۋىمنىڭ ەسىندە شىعار, اقتاۋ قالاسىنداعى بىلتىرعى ماۋسىمجابار الامان بايگەسى. باس جۇلدەگە «نيۆا» كولىگى تىگىلىپ, 30-40 ات قيقۋلاپ شاپقاندا قوبىلان تاڭاتاروۆتىڭ «ايكۇرەڭ» تۇلپارى سوڭعى اينالىمدا مارەگە ءسال قالعاندا ءسۇرىنىپ كەتىپ, اجال قۇشقانى. سول «ايكۇرەڭنىڭ» ۇستىندە وسى مەيىر بولعان ەدى. اياق استىنان بولعان جايتقا ابدىراعان جوق. كوزىنىڭ ءمولت ەتكەن جاسىن قايىس قامشىمەن ءسۇرتىپ, اتتىڭ باسىنان جۇگەنىن شەشىپ الىپ, مارەگە جاياۋ جۇگىرىپ كەلگەن ەدى. بۇل وقيعا كوپشىلىكتىڭ جۇرەگىن ەلجىرەتكەن-ءتىن. الەۋمەتتىك جەلىگە وسى ءسات تاسپالانعان ۆيدەو تاراپ, اتسۇيەر قاۋىم مەيىرگە ەرەكشە مەيىرلەنگەن-ءتىن. مىنە, سول قارشاداي بالا قازىر قاراعاندىداعى اتاقتى اتبەگى ەربول جاكەشتىڭ كومانداسىندا.
15 جاستاعى شاباندوز بالانىڭ قانجىعاسىندا 10-15 الاماننىڭ اۆتوكولىگى, 20-30 توپ بايگەنىڭ باعالى جۇلدەسى بار. بۇل بالانىڭ تاقىمى قاراعاندىنىڭ عانا ەمەس, ەلدەگى نەبىر جۇيرىكتىڭ جۇلدىزىن جاققان. مەيىر 2018 جىلدان باستاپ, بايگەگە شابا باستاعان. مىنە, ءۇش جىلدان بەرى ۇلكەن دۇبىرلەرگە قاتىسىپ, قانجىعاسىن قوماقتى جۇلدەلەرمەن قامپايتىپ ءجۇر. ونىڭ ءبىرى – 2020 جىلى استانادا وتكەن پرەزيدەنت كۋبوگى. 30 قارالى ارعىماق اراسىنان «باقتورى» اتپەن باس بايگەنى العانىن جەكە اتاپ تا ءوتۋ كەرەك. ءدال سول جىلى «سومبالاق» اتتى تۇلپارمەن باس جۇلدەگە تىگىلگەن «لادا گرانتا» اۆتوكولىگىن دە قانجىعالاعان.
وسىدان كەيىن مەيىر ات قوسقان ەلدىڭ اۋزىندا ءجۇردى. 2022 جىلى ەركىندىك اۋىلىنىڭ تۋماسى, ارقانىڭ اتاقتى اتبەگىلەرىنىڭ ءبىرى ەربول جاكەشتىڭ ء«ۇمىت», «اجارا» سىندى شاشاسىنا شاڭ جۇقپاعان جۇيرىكتەرىمەن مەيىر بايگەدەن وق بويى وزىق كەلىپ ءجۇردى. سودان بەرى شاباندوز بالا ەربول تۇرسىن ۇلىنىڭ كومانداسىندا بىرنەشە بايگەدە اتقا شابادى.
– مەيىر ءوز بالامداي بولىپ كەتتى. ماڭايىمداعى اتبەگىلەرگە ىلعي ايتارىم – شاباندوز بالانى دۇرىستاپ تاربيەلەۋ كەرەك. ات ۇستىندەگى بالا قۇستىڭ قاۋىرسىنىنداي جەڭىل بولسا, ونىڭ مىنەزى مەن كوڭىل كۇيى دە ءدال سونداي بولۋى شارت. بۇل كەزدە بالاعا دا, اتقا دا جىگەر كەرەك. كەزىندە جىراۋلار جاۋعا شابار الدىندا باتىرلارىن جىگەرلەندىرىپ, جىر ارناپ, قايراپ, ارقالاندىرعان. وسىنىڭ اسەرىنەن باتىرلار رۋحتانىپ ولار الماعان قامال قالماعان. سول سياقتى بالاعا سانالى ءسوز ايتىپ, باپ تاربيەسى مەن باق تاربيەسىن جۇرەگىنە جەتكىزە ءتۇسىندىرۋ كەرەك. سوندا عانا ول استىنداعى اتقا يە بولا الادى, – دەيدى ارقا اتبەگىسى ە.تۇرسىن ۇلى.
بىلتىرعى پرەزيدەنت كۋبوگى دا الدىنا قارا سالماي كەلگەن «قامبار» سايگ ۇلىكتى دە مەيىر تىزگىندەگەن ەدى. قاراعاندىدا وتكەن سايدالى بابا اسىندا دا «تايۆان» دەگەن تۇلپارمەن «دجيپ» اۆتوكولىگىن ۇتقان دا وسى بالا باتىر.
ءجا, جۇلدەنى تىزە بەرۋ ماقسات ەمەس. مەيىردىڭ تاقىمىنا تيگەن تۇلپار الاماننان جۇلدەسىز قالماعانىن اتسۇيەر اعايىن جاقسى بىلەدى.
– ارينە, كەيدە توپ بايگە, الامان بايگەدە العاشىندا توسىرقاۋ, ءسال قوبالجۋ بولادى. بىراق بىردە-ءبىر بايگەمدە مەنىڭ اتىم قاتارىمنان وسالداۋ نەمەسە وزىمە سەنىمىمدى جوعالتۋ دەگەن بولعان جوق. بايگەگە قاتىسقاندا تەك وزىمە جانە استىمداعى اتتىڭ قابىلەت-قاۋقارىنا سەنەمىن. وعان سەنىمىم كامىل ءارى اقتالادى دا, – دەيدى مەيىر شاباندوزدىڭ ءوزى.
بايگەگە تەگىن بالا شاپپايدى. ءدۇبىردىڭ كورەرمەندەرى, جانكۇيەرلەرى اينالىمنىڭ كومبە جاق تۇسىندا تۇرىپ, كوپ دۇنيەنى كوزدەرى شالا بەرمەيدى. ال بايگەدەگى ناعىز جانتالاس تا, باقتالاس تا تەك ات پەن شاباندوزعا عانا ايان. ءبىرىن-ءبىرى ساباۋ, جول كەسۋ, قىسۋ, ىعىستىرۋ سەكىلدى ءتۇرلى ارەكەتتەرگە قارسى كەزىگەدى. وسىنداي دا ساعى سىنباعان, قانى تۋلاعان شاباندوز عانا تاقىمىنداعى تۇلپارىنىڭ شاشاسىنا شاڭ جۇقتىرمايدى. اتىن اسپانداتقان ءساتىن جوعارىدا ايتا كەتكەنبىز. ماقالا تۇيىنىنە تاعى تىركەتە كەتەلىك, جۇگەن جەتەكتەپ مارەگە جەتكەن كەزىن. ءبىزدىڭ مەيىردىڭ مەرەيىن تاسىتىپ تۇرعانى — البەتتە, تاۋداي جىگەرى, جاۋجۇرەك مىنەزى.
قاراعاندى وبلىسى
