فوتو: kabar.kg
امانجول التاەۆ الەۋمەتتىك جەلىدە قىرعىزستان پرەزيدەنتى ات مىنگىزگەن قازاق اقىنى ءبىرجان قالدىباەۆتى سىناپ, جازبا جاريالاعان ەدى. وندا ول بىرجاننىڭ مۇقىم قازاق ەلىنىڭ اتىنان دومبىرا ۇستاپ سويلەيتىندەي ءجونى جوق ەدى دەيدى.
«قازاق ايتىس ونەرىندە مۇنداي اقىن جوق. ماسەلە بۇل جىگىتتىڭ تانىمال بولماعانىندا ەمەس. ەگەر كەسەك وي ايتسا, كوركەم ولەڭ ءورىپ ناقىشىن كەلتىرە سويلەسە, تىلەنىپ ات سۇراماسا, تىلەۋىن تىلەپ تەك قۋانار ەدىك. قىرعىز ەلىنىڭ ىستىق پەيىلىنە راقمەت! بىراق, كىم كورىنگەندى كوشەدەن تاۋىپ الىپ, قازاق ەلىنىڭ اقىنى دەپ ەل الدىنا شىعارماۋىن سۇرايمىز. قازاق ەلىنىڭ ايتىس اقىندارى مەن جىرشى - تەرمەشىلەر وداعىنىڭ توراعاسىنىڭ ءبىرىنشى ورىنباسارى رەتىندە مالىمدەيمىن. قازاق حالقىنىڭ بەكزات ونەرىنىڭ قۇنىن ولاي تۇسىرمەۋلەرىن تالاپ ەتەمىن.
اقىندىق تالانتى جوق مۇنداي پىسىقايلار ەشكىمگە دە وپا اپەرمەيدى. ەندىگى جەردە قىرعىز باۋىرلار ەكى ەلدىڭ ايتىس اقىندارى وداعىنىڭ اراسىنداعى قول قويىلعان مەموراندۋمعى ەرەجەنى ساقتاۋدى, بىزدەر ۇسىنعان اقىندى عانا حالىق الدىنا شىعارۋلارىن سۇرايمىز. قۇستىڭ قوس قاناتىنداي باۋىرلاس ەلدەردىڭ دوستىعىن جالعان ولەڭشىلەر ەمەس, ناعىز قۇرمەتكە لايىق دارىندى اقىندار جىرلاسىن. ءبىرجان باۋىرىمىز ەلگە جەتكەن سوڭ حالىقتان, بارشا ايتىس اقىندارىنان كەشىرىم سۇراۋدى ۇمىتپاسىن», دەپ جازدى امانجول التاەۆ.
قىرعىزستان پرەزيدەنتى «كابار» اگەنتتىگىنە بەرگەن سۇحباتىندا امانجول التاەۆتىڭ وسى سىنىنا جاۋاپ بەردى.
«امانجول التاەۆتىڭ الەۋمەتتىك جەلىدەگى ۇندەۋىن مەن دە وقىدىم. ارينە, بۇل ىڭعايسىز ۇندەۋ بولدى. ەڭ الدىمەن «ەلشىگە دە, انشىگە دە ءولىم جوق» دەيدى. ەلشىلەر ءوز جۇمىسىن جاسايدى. انشىلەر, ءتىپتى, اقىندار وزدەرىنە ىڭعايلى جەردە ءان سالادى. سىن ايتىپ ءان سالادى, ماداقتاپ ءان سالادى, بىردەڭە سۇراۋ ءۇشىن ءان سالادى. ودان كەمشىلىك, ساياسات ىزدەۋدىڭ قاجەتى جوق. ەكىنشىدەن, اقىن ءبىرجان قالدىباەۆ قىرعىزدىڭ جيەنى. مەن قازاقتىڭ جيەنىمىن. ءبىز تۋىسقانبىز. بەسىنشى اتام سولتونقۇلدىڭ ايەلى نووچا قازاقتىڭ قىزى ەدى. ۇشىنشىدەن, ءبىز قىرعىز-قازاقشا سويلەيتىن حالىقپىز. سول ساتتە ارعىماك سىيعا تارتپاسام, ول ماعان ءبىر كەزدە ءان شىرقايتىن ەدى. «ناعاشىم جاياۋ جىبەردى دەپ ايتار ەدى. ول جەرگە قاتىسپاسام, سول اقىننىڭ ءانىن ەستىمەسەم, اڭگىمە باسقا بولار ەدى. سوندىقتان امانجول مىرزاعا ايتارىم, ءسىز ەشقاشان جايسىز جاعدايعا تاپ بولعان جوقسىز», دەدى ول.
سادىر جاپاروۆ بۇل جەردە ەشقانداي ساياسات جوق ەكەنىن جانە ايتىسكەر اقىننىڭ سوزىنە ءتۇسىپ قالماس ءۇشىن عانا ارعىماق سىيلاعانىن ايتتى.
«مەن ءبىرجان قالدىباەۆتىڭ قانداي اقىن ەكەنىن دە بىلمەيمىن. مەن ونى بۇرىن دا تانىمايتىنمىن. ونى كوشە اقىنى دەپ اتاعان. قازىر كوشە اقىنى بولسا, كەيىن قازاق-قىرعىز حالقىنا تانىمال اقىن بولىپ كەتەر. «بەسىكتەگى بالا پاتشا بولا ما, كىم ءبىلسىن, قۇرساعىنداعى بالا پاتشا بولا ما, كىم ءبىلسىن» دەيدى. ول جاس بالا ەكەن. قولداۋ بولسا اقىرى اتاقتى اقىن بولىپ شىعار. قازاق پەن قىرعىزدى بىزدەن باسقا ەشكىم قولدامايدى. ءبىز ءبىر-بىرىمىزگە قولداۋ كورسەتۋىمىز كەرەك. قازىرگى الەمدىك جاعداي وتكىر. قازاق پەن قىرعىزدىڭ اراسىنا وت سالعىسى كەلەتىن ءۇشىنشى كۇشتەر ءالى دە جوق ەمەس. ءبىز مۇنداي اداسۋشىلىقتان اۋلاق بولۋىمىز كەرەك. ارامىزداعى تىنىشتىقتى ساقتايىق. ونسىز دا ات توبەلىندەي عانا ەلمىز», دەپ جاۋاپ بەردى قىرعىزستان پرەزيدەنتى.
