وبلىستاعى اۋىل شارۋاشىلىعى باسقارماسى باسشىسىنىڭ مىندەتىن اتقارۋشى سىرىم بوشپانوۆ قازىردىڭ وزىندە 1 ملن 420 مىڭ توننا ءشوپ جينالعانىن ايتادى. مال ازىعىن دايىنداۋ جۇمىستارىن پىسىقتاۋ ماقساتىندا ارنايى توپتار قۇرىلعان. ماماندار ورمان قورىنداعى جەرلەردى دە فەرمەرلەرگە ۇلەستىرىپ جاتىر. ءشوپ شابۋ ناۋقانىنا 3,1 مىڭ توننا ديزەل وتىنى بەرىلىپتى. بيىل ءشوپتىڭ ءبىر تونناسى شامامەن 35 پەن 55 مىڭ تەڭگە ارالىعىندا ساۋدالانىپ جاتىر. قۇرعاقشىلىق ءبىراز شارۋانىڭ قولىن بايلاپ تۇر. دەگەنمەن مال باسىن قىسقى كەزەڭگە جەم-شوپپەن تولىق قامتاماسىز ەتۋ ءۇشىن قوسىمشا 300 توننا سابان ازىرلەنۋدە. جەمشوپ قۇنىن ارزانداتۋ ءۇشىن 727 شارۋا قوجالىعىنا سۋبسيديا بەرىلگەن. قاراجاتتىڭ كولەمى 801 ملن تەڭگەنى قۇرايدى. مۇنداي قايتارىمسىز قاراجات ۇساق مالعا دا قاراستىرىلعان. ءوتىنىم قىركۇيەكتەن باستاپ قابىلدانادى.
استىق 994 مىڭ گەكتاردان جينالادى. بۇل كولەم بىلتىرعى دەڭگەيدەن 74,4 مىڭ گەكتارعا ارتىق. مۇنداعى 813,4 مىڭ گەكتاردا – بيداي, 160,4 مىڭ گەكتاردا – ارپا, 13,7 مىڭ گەكتاردا – س ۇلى. كۇن رايى قولايلى بولعان جاعدايدا ەگىن وراعى 20 جۇمىس كۇنى ىشىندە اياقتالادى دەپ كۇتىلۋدە. بۇگىندە اباي, بۇقار جىراۋ جانە شەت اۋداندارىنىڭ جەكەلەگەن شارۋاشىلىقتارى استىق جيناۋ جۇمىستارىنا كىرىستى. جوسپار بويىنشا جاپپاي استىق جيناۋ 1 قىركۇيەكتەن باستالادى.
«بۇگىندە ءداندى داقىلداردىڭ ءوسىمى جاقسى. قۋراپ قالعان مولشەردى ەسەپتەي وتىرىپ, 6,3 مىڭ گەكتار ەسەپتەن شىعارىلدى. الدىن الا دەرەكتەر بويىنشا ورتاشا ونىمدىلىك گەكتارىنا 9,5 تسەنتنەر بولعاندا, استىقتىڭ جالپى ءتۇسىمى 940,4 مىڭ توننا كولەمىندە بولادى دەپ كۇتىلۋدە», دەيدى س.بوشپانوۆ.
وڭىردە سىيىمدىلىعى 145 مىڭ توننالىق 4 ليتسەنزيالانعان جانە 82,6 مىڭ توننالىق 3 ليتسەنزياسىز استىق قابىلداۋ كاسىپورنى دايىن. بۇعان قوسا شارۋاشىلىقتاردا سىيىمدىلىعى 854,4 مىڭ توننانى قۇرايتىن 546 استىق ساقتاۋ قويماسى بار. سونىمەن قاتار شارۋاشىلىق قۇرىلىمدارىمەن 29,6 مىڭ گەكتاردان مايلى داقىل, 11 636 گەكتاردان كارتوپ (بىلتىرمەن سالىستىرعاندا 129 گەكتارعا ارتىق) جانە 1 321 گەكتاردان كوكونىس (بىلتىرمەن سالىستىرعاندا 114,4 گەكتارعا كەم) جينالادى.
كۇزگى دالا جۇمىستارىنا بولىنگەن ارزانداتىلعان ديزەل وتىنىنىڭ جالپى كولەمى – 21,2 مىڭ توننا. «مۇناي – Company» جشس جانە «تۇرمانوۆ»جك وپەراتورلارى شىلدە ايىنا بولىنگەن 4 مىڭ توننا ديزەل وتىنىنىڭ ءليترىن 270 تەڭگەدەن ساتتى. تامىز ايىنان باستاپ 250 تەڭگەگە ءتۇستى.
قاراعاندى وبلىسى
