وتكەن قىستا ءوڭىر جىلۋسىز قالماعانىمەن, كوپ كوڭىلىندە اجەپتاۋىر الاڭداۋشىلىق بولدى. جىلۋ بەرۋ مەكەمەلەرىنىڭ جۇمىسىنا ءجىتى نازار اۋدارىلعاندىقتان عانا اۋپىرىمدەپ ماۋسىمدى اياقتاپ شىقتى. ەلىمىزدىڭ تۇكپىر-تۇكپىرىندەگى جىلۋ بەرۋگە بايلانىستى وقىس وقيعالار ءبىزدىڭ ءوڭىر تۇرعىندارىن دا ءبىرشاما قوبالجىتىپ تاستاعان. بيىلعى جاعدايعا دا قۇلاق ءتۇرىپ وتىر. وبلىستىڭ كوممۋنالدىق سالا قىزمەتكەرلەرى الداعى جىلۋ بەرۋ ماۋسىمىنا دايىندىقتى كوكتەم تۋىسىمەن, ناقتىراق ايتقاندا, 1 مامىردان باستاپ كەتكەن بولاتىن. قازىر اسا اۋقىمدى, كۇردەلى جۇمىس اياقتالۋ ساتىسىندا.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى ءبىرجان ءابدىراحمانوۆتىڭ ايتۋىنا قاراعاندا, وڭىردەگى 959 قازاندىقتىڭ 95,8 پايىزى دايىن. بۇل باعىتتاعى بار شارۋانى تولايىم تىزبەسەك تە, باستى-باستىلارىن اتاي كەتكەننىڭ ارتىقتىعى بولماس. 707 ءبىلىم بەرۋ مەكەمەسىنىڭ 689-ى, 518 دەنساۋلىق ساقتاۋ سالاسى نىساندارىنىڭ 506-سى دايىن بولسا, 2 369 تۇرعىن ءۇي جىلۋ قابىلداۋعا ءازىر. بۇل – بارلىق تۇرعىن ءۇيدىڭ 90 پايىزى. وڭىردەگى جىلۋ جەلىسىنىڭ توزىعى جەتىپ تۇرعانىن دا ايتا كەتەلىك. بيىل 23 شاقىرىم جىلۋ جۇيەسى جاڭعىرتىلدى, 13 شاقىرىمىنا كۇردەلى جوندەۋ جۇرگىزىلدى. وسى جۇمىستاردىڭ بارلىعى – دەر كەزىندە نازار اۋدارىلىپ, قاجەتتى قاراجاتتىڭ دەر كەزىندە بولىنگەنىنىڭ ناتيجەسى. قاراجات تا از ەمەس. بيىل جىلۋ بەرۋ ماۋسىمىنا دايىندالۋعا 27,6 ملرد تەڭگە قاراجات قاراستىرىلعان. قارجىنىڭ ۇلكەن ءبىر بولىگى 11 ينۆەستيتسيالىق جوبانى جۇزەگە اسىرۋعا, 5,3 ملرد-نى جوندەۋ جۇمىستارىن جۇرگىزۋگە باعىتتالعان.
سوناۋ 1996 جىلدان بەرى جارىتىمدى جوندەۋ جۇمىستارى جۇرگىزىلمەگەن ستەپنوگور قالاسىنداعى جىلۋ-ەلەكتر ورتالىعى جەلىلەرىنىڭ شامامەن 80 پايىزدان استامى توزىپ تۇرعانى بەلگىلى. جىلۋ بەرۋ ماۋسىمىنا ازىرلىك بارىسىندا بەس قازاندىق اگرەگاتى مەن بەس تۋربيناعا اعىمداعى جوندەۋ جۇرگىزىلىپ, №6 قازاندىق اگرەگاتى جاڭارتىلدى. بۇل جۇمىسقا 4,2 ملرد تەڭگە قاراستىرىلعان ەدى. №4 جانە №5 تۋربواگرەگاتتاردى كۇردەلى جوندەۋدەن وتكىزۋ كەلەسى جىلعا جوسپارلانىپ وتىر. مەملەكەت باسشىسىنىڭ تاپسىرماسىن ورىنداۋ بارىسىندا ستەپنوگور قالاسىن جىلۋمەن قامتۋ ماسەلەلەرىن ءبىرجولا شەشۋ ءۇشىن ءىس-شارالار جوسپارى ازىرلەنىپ, بەكىتىلدى. ۇكىمەت قورىنان بيىل جالپى ۇزىندىعى 3,1 شاقىرىم ماگيسترالدى جەلىلەردى جوندەۋگە 2 ملرد تەڭگە قارجى ءبولىندى.
«ستەپنوگور تەپلوترانزيت» سەرىكتەستىگى ءوز قاراجاتى ەسەبىنەن 4 شاقىرىم جەلىنى كۇردەلى جوندەۋدەن وتكىزدى. بۇل جۇمىسقا سەرىكتەستىك 1,1 ملرد تەڭگە قارجى ءبولدى. 540 مەترلىك جەلىگە اعىمداعى جوندەۋ جۇمىستارى جۇرگىزىلىپ, توزىعى جەتكەن سورعى جابدىعى اۋىستىرىلدى.
وبلىس ورتالىعىندا دا جىلۋ بەرۋ ماۋسىمىنا دايىندىق شيراتىلا ءتۇستى. 2,6 شاقىرىم جىلۋ جەلىسى سالىندى, 3,2 شاقىرىم جىلۋ جەلىسى جوندەۋدەن وتكىزىلدى. قالانىڭ ەكى اۋداندىق قازاندىقتارى مەن جىلۋ جەلىلەرىن جاڭا ماۋسىمعا دايىنداۋ ءۇشىن ۇكىمەت قورىنان 2,6 ملرد تەڭگە قاراجات بولىنگەن بولاتىن.
ەندىگى ءبىر ماسەلە – كومىرمەن قامتاماسىز ەتۋ. كەيىنگى جىلدارى بۇل تاراپتا اۋىق-اۋىق كۇردەلى ماسەلە تۋىنداپ, قاراپايىم حالىق ۇزىن-سونار كەزەككە تۇرىپ, ماۋسىم سايىن ەسەلەنە وسەتىن كومىر باعاسىنا وكپە ايتىپ تا قوياتىن. قازىرگى كۇنى قاجەتتى كومىردىڭ 97 مىڭ تونناسى جەتكىزىلدى. دەمەك, ەكى ايعا ەركىن جەتەتىن قور بار دەگەن ءسوز. تۇرعىندارعا جىلۋ بەرۋ ماۋسىمىنا 1 ملن توننا كومىر قاجەت. بۇگىنگى تاڭدا 150 مىڭ توننا كومىر جەتكىزىلىپ ساتىلۋدا. بۇل – بارلىق كولەمنىڭ 15 پايىزى. ءسوز اراسىندا ءوڭىر تۇرعىندارىنا كومىر 56 جەردە ساتىلىپ جاتقانىن ايتا كەتەلىك. الداعى ۋاقىتتا بۇل تاراپتاعى شارۋا قارقىن الماق.
كومىردىڭ باعاسى دا ماسەلە بولىپ تۇر. بەلگىلى سەبەپتەرگە بايلانىستى كومىر باعاسى 20-25 پايىزعا ءوسىپتى. باسقارما باسشىسى ورىنباسارىنىڭ ايتۋىنا قاراعاندا, كومىر باعاسىنىڭ ءوسۋى وزىندىك قۇنىنىڭ كوتەرىلۋى مەن تەمىرجول تاريفتەرىنە بايلانىستى ەكەن.
– مەملەكەت باسشىسى قاسىم-جومارت توقاەۆتىڭ تاپسىرماسىن مۇلتىكسىز ورىنداۋ بارىسىندا كوممۋنالدىق قىزمەتتەر بارلىق جىلۋمەن جابدىقتاۋ نىسانىن تەحنيكالىق تەكسەرۋدى اياقتايدى. سول كەزدە جوندەۋدى قاجەت ەتەتىن ۋچاسكەلەر انىقتالماق. الداعى ۋاقىتتا قيىن ءتۇيىننىڭ كۇرمەۋى كەزەڭ-كەزەڭىمەن شەشىلەدى, – دەيدى ءبىرجان ءابدىراحمانوۆ.
قالاي بولعان كۇندە دە جالپاق جۇرت قاتال قىستان قىسىلماي شىقسا يگى.
اقمولا وبلىسى
