ولار – قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتى ءوز تاجىريبەلىك شارۋاشىلىعىمەن بىرگە, قازاق مال شارۋاشىلىعى جانە جەمشوپ ءوندىرۋ عىلىمي-زەرتتەۋ ينستيتۋتى, ءو.و.وسپانوۆ اتىنداعى قازاق توپىراقتانۋ جانە اگروحيميا عىلىمي-زەرتتەۋ ينستيتۋتى, قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتى, قازاق قايتا وڭدەۋ جانە تاماق ونەركاسىبى عىلىمي-زەرتتەۋ ينستيتۋتى, قازاق اگروونەركاسىپ كەشەنى ەكونوميكاسى جانە اۋىلدىق اۋماقتاردى دامىتۋ عىلىمي-زەرتتەۋ ينستيتۋتى جانە «مەركى» جشس-نىڭ تاجىريبەلىك شارۋاشىلىعى.
وسىلايشا, شەتەلدىك جەتەكشى جوعارى وقۋ ورىندارىنىڭ تاجىريبەسىنە سايكەس قازاق ۇلتتىق اگرارلىق زەرتتەۋ ۋنيۆەرسيتەتى قازىرگى زامانعى فۋنكتسيونالدىق ينتەگراتسيالانعان جۇيە سانالاتىن ساپالى زەرتتەۋ ۋنيۆەرسيتەتىنىڭ جاڭا دەڭگەيىنە كوتەرىلدى. ياعني عىلىم – ءبىلىم – ءوندىرىس (زەرتحانا – اۋديتوريا – تاجىريبەلىك شارۋاشىلىق) باعىتىندا جۇمىس ىستەمەك. ۋنيۆەرسيتەتتەردىڭ ءدال وسىنداي كلاسسيكالىق مودەلى عىلىم مەن ءبىلىمدى دامىتۋدىڭ ۇلتتىق ستراتەگياسىنىڭ نەگىزگى باسىمدىعى بولا الادى.
بىرىنشىدەن, ستۋدەنتتەر زاماناۋي جوعارى ءبىلىم الىپ, عىلىمي تاجىريبەگە يە بولادى. بولاشاقتا بىلىكتى, باسەكەگە قابىلەتتى كادر اتانا وتىرىپ, اگروونەركاسىپ سالاسىنىڭ ينتەللەكتۋالدى ەليتاسىن قۇرايدى. ەكىنشىدەن, عىلىمعا جاس تالانتتاردىڭ كەلۋى كۇشەيىپ, قازىرگى نارىقتا قاجەتتى عىلىمي زەرتتەۋلەردىڭ تيىمدىلىگى مەن سۇرانىسى ارتادى. ۇشىنشىدەن, ينتەگراتسيالىق ۇدەرىستەردى كۇشەيتۋ ماقساتىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ بارلىق الەۋەتى – عىلىمي زەرتتەۋ ورتالىقتارى, زاماناۋي زەرتحانالارى, جاس عالىمدارعا ارنالعان جاتاقحانالار بولاشاقتا پراكتيكالىق داعدىلارى قالىپتاسقان جوعارى وقۋ ورنىنىڭ ەنشىلەس ۇيىمدارىمەن بىرلەسىپ پايدالانىلادى.
بۇل رەتتە, عىلىمي-زەرتتەۋ ينستيتۋتتارى مەن ۋنيۆەرسيتەت عالىمدارىنىڭ بىرلەسكەن عىلىمي ازىرلەمەلەرىنىڭ ناتيجەلەرى وندىرىسكە ەنگىزىلىپ قانا قويماي, جاڭا ءبىلىم بەرۋ باعدارلامالارىنىڭ پايدا بولۋىنا ىقپال ەتەدى. ءوز كەزەگىندە بۇل عىلىمي كادرلاردى دايارلاۋ ساپاسىن ارتتىرۋعا مۇمكىندىك بەرەدى. عىلىمي-زەرتتەۋ ينستيتۋتتارى مەن تاجىريبەلىك وندىرىستىك شارۋاشىلىقتار بۇدان بىلاي «ۇلتتىق اگرارلىق عىلىمي-ءبىلىم بەرۋ ورتالىعىن» ۇستاۋعا ديۆيدەندتەر تولەمەيدى. بۇل قوماقتى قاراجات ءوز ۇجىمدارىنىڭ دامۋىنا قالدىرىلادى.
