ءبىلىم ورداسىنداعى مەرەكەلىك شارالاردا بيشىلەر توبىنىڭ قۇرامىنان ءجيى كورىنەتىن ادىلەتتىڭ دەنە ءبىتىمىنىڭ يىلگىشتىگى, ۇلكەن ونەرگە دەگەن يكەمدىلىگىن انىق اڭعارتىپ تۇراتىن-دى. بويىنداعى ەرتە تانىلعان بيشىلىك قاسيەتى قازاق تسيرك ونەرىنىڭ كوگىنە كوتەرىلىپ, شىڭىنا شىعۋىنا العاشقى باسپالداق بولعانداي.
ادىلەتتىڭ ەكى جاسىندا اكەسى دۇنيەدەن ءوتىپ, اناسى سۆەتا باۋىرىنداعى ەكى ۇل, ءبىر قىزدى «قاناتتىعا قاقتىرماي, تۇمسىقتىعا شوقىتتىرماي», وقىپ-توقۋىنا بار كۇش-قايراتىن جۇمىلدىرادى. بالالارىنىڭ قامىمەن رايىمبەك اۋدانىنان الماتىعا كەلىپ, پاتەر جاعالاپ, كۇن-ءتۇن دەمەي جۇمىس ىستەپ قارابايىر تىرشىلىك كەشەدى. ءۇيدىڭ كەنجەسى بولسا دا, ەركەلىككە بوي الدىرماي, ءوز بەتىنشە ىزدەنىپ, ۇنەمى ەڭبەكتەنۋدى ادەتكە اينالدىرعان ادىلەت 9-سىنىپتان سوڭ ءوزى ارمانداعان جۇسىپبەك ەلەبەكوۆ اتىنداعى ەسترادا تسيرك كوللەدجىنە وقۋعا ءتۇسىپ, 2016-2020 جىلدار اراسىندا تسيرك ونەرىنىڭ قىر-سىرىن مەڭگەرىپ شىقتى. تەگەۋرىندى تالانت تسيرك ونەرىندە وزىندىك ويىن ورنەگىن قۇرىپ, كوركەم گيمناستيكانىڭ شەبەرىنە اينالۋدى ماقسات تۇتتى. ماقسات وڭگە, ارمان اقيقاتقا اينالدى, ەڭبەك جاندى دەگەن وسى ەمەس پە؟
– تسيرك ونەرىنىڭ قۇدىرەتىن سوزبەن ايتىپ جەتكىزۋ مۇمكىن ەمەس. ونىڭ ءار ءساتى قاۋىپ-قاتەرگە تولى, ءبىر ءادىستى دۇرىس يگەرە الماساق قۇلاپ, جاراقات الاتىن كەزدەر بولادى. سوندىقتان مۇمكىندىگىنشە قاتەلەسپەۋگە كۇش سالامىز. تسيرك مانەجىندەگى جەڭىس پەن جەتىستىك تەك ەرەن ەڭبەكپەن عانا كەلەدى, ۇنەمى جاتتىعۋمەن جۇرەمىز. ەڭ قىزىعى, گاسترولدىك ساپارلاردا جاڭا دوستار تاۋىپ, شەتەلدىڭ مادەنيەتىمەن تانىسامىز. بۇل شىعارماشىلىعىمىزبەن قوسا رۋحاني وسۋىمىزگە دە سەبىن تيگىزەدى. سونىڭ ارقاسىندا اعىلشىن ءتىلىن مەڭگەرۋىمە مۇمكىندىك تۋدى. ءبىزدىڭ باستى ۇستانىمىمىز – ءار كورەرمەننىڭ كوڭىلىنەن شىعا ءبىلۋ. حالىقتىڭ ىستىق ىقىلاسىنا بولەنۋدەن اسقان قۋانىش جوق, – دەيدى ادىلەت.
كوركەم گيمناستيكا شەبەرى ادلەت تيكانوۆ جەتەكشىلىك ەتەتىن «Hassak» كومانداسىنىڭ قۇرامىندا ونەر كورسەتەتىن ادىلەت دۇڭگەنباي بۇگىندە قۇلاشىن كەڭگە جايىپ, ونەرىنىڭ جاڭا قىرلارىن اشۋعا كۇش سالىپ كەلەدى. جارقىن بورازداەۆ, جالعاس قاينارباي, ماحمۋد الماس, داستان باقىت ۇلى, نۇرىم ساعىمحاندارمەن بىرگە قازاق تسيرك ونەرىنىڭ وركەندەۋىنە ەڭبەك ەتىپ ءجۇر. «توميريس» اتتى ۇجىمدىق قويىلىمدارى ارقىلى تسيرك ونەرىنە سونى لەپ اكەلگەنى كوپشىلىككە ءمالىم. ناتيجەسىندە, بىلتىر ماجارستاننىڭ بۋداپەشت قالاسىندا وتكەن حالىقارالىق تسيرك فەستيۆالىنىڭ لاۋرەاتى اتاندى. سونداي-اق يسپانيادا وتكەن 10-حالىقارالىق تسيرك مەرەيتويىنىڭ لاۋرەاتى اتانعان ونەر ۇجىمى فرانتسياعا شاقىرتۋ العاندىعىن ايرىقشا اتاعىمىز كەلەدى.
گاسترولدىك ساپارلارمەن ەلىمىزدىڭ تسيرك ونەرىن الەمنىڭ ءار قيىرىنا, اتاپ ايتساق, شۆەتساريا, ماجارستان, يسپانيا, پورتۋگاليا, قىرعىزستان مەن رەسەي مەملەكەتتەرىنە تانىتقان تالانتتى جاستار كەلەشەكتە تورتكۇل دۇنيەگە تانىمال «مونتە كارلو» تسيرك فەستيۆالىنە قاتىسىپ, جۇلدەلى ورىننان كورىنۋدى ماقسات ەتىپ وتىر.
كورەرمەننىڭ تاڭدايىن قاقتىرار سيقىرلى تسيرك ونەرىنىڭ جاس بۋىنى بيىل الماتى قالاسىندا وتكەن «Almaty Sirkus Festival» اتتى حالىقارالىق تسيرك فەستيۆالىندە ونەر كورسەتتى. ون بەس ەلدەن ارنايى كەلگەن تسيرك ونەرپازدارىنىڭ ەكۆيليبريستەر, اكروباتتار, ارقانمەن جۇرۋشىلەر, سايقىمازاقتار مەن جونگلەرلەر جانرى ساراپقا سالىنعان فەستيۆالدا «Hassak» ونەر ۇجىمى گيمناستيكا جانرى بويىنشا جۇلدەلى ەكىنشى ورىندى يەلەنىپ, مەرەيى استى. وسىلايشا, ونەر ساڭلاقتارى الداعى قىركۇيەك ايىندا پەتەربۋرگتە وتەتىن «بەز گرانيتس» اتتى تسيرك ونەرىنىڭ فەستيۆالىنە شاقىرتۋ العان بولاتىن.
مىنە, بۇگىنگى تسيرك ونەرىنىڭ جارىق جۇلدىزىنا اينالعان ادىلەت دۇڭگەنباي باستاعان ونەرپازدار الداعى حالىقارالىق تسيرك فەستيۆالىنە دايارلىقتارىن باستاپ تا كەتتى.
الماتى وبلىسى
