«59 جاڭا اۆتوبۋس ساتىپ الدىق. ولار كليماتتى باقىلاۋ, بەينەباقىلاۋ جۇيەلەرىمەن جانە اقىلدى كامەرالارمەن جابدىقتالعان. مىسالى, ەگەر جۇرگىزۋشى شارشاسا, قالعىپ كەتسە, تەمەكى شەكسە نەمەسە تەلەفونمەن سويلەسسە, بۇل كامەرالار ءبارىن ءتۇسىرىپ, ەرەجە تالابى بۇزىلعانى تۋرالى بەلگى بەرەدى. وسىلايشا, ناقتى ۋاقىت رەجىمىندە بارلىعىن قاداعالاپ وتىرۋعا تەحنيكالىق مۇمكىندىگىمىز بار», دەيدى №5 اۆتوبۋس پاركىنىڭ باس ديرەكتورى نۇرلان ەلشىباەۆ.
سونىمەن قاتار اۆتوبۋستار جىلدامدىقتى شەكتەيتىن داتچيكتەرمەن, ءجۇرىپ-تۇرۋى قيىن جولاۋشىلارعا ارنالعان كوتەرگىشتەرمەن جابدىقتالعان. ولاردىڭ كليرەنسى جوعارى, جۇرگىزۋشىگە قوڭىراۋ شالۋ تۇيمەسى بار. اۆتوبۋستار «ەۋرو-5» ەكولوگيالىق ستاندارتى تالاپتارىنا تولىق جاۋاپ بەرەدى.
وبلىس اكىمى ەرماعانبەت بولەكپاەۆ اۆتوپارككە ارنايى بارىپ, ونداعى باسشىلىقپەن كەزدەستى. زاۋىتتان جاڭا الىنعان اۆتوبۋستاردى كوردى. ەكىنشى كەزەكتەگى مىندەت قوعامدىق كولىكتىڭ جۇمىس كەستەسىن ۇزارتۋ ەكەنىن اتاپ ءوتتى.
«وسىمەن ءۇشىنشى جىل قوعامدىق كولىكتى جاڭارتۋمەن تۇراقتى تۇردە اينالىسىپ كەلەمىز. Onay ەلەكتروندى بيلەتتەۋ جۇيەسىن ەنگىزدىك. قالالىق مارشرۋتتاردا عانا ەمەس, قالا ماڭىنداعى مارشرۋتتاردا دا جول ءجۇرۋدى ەكى ەسەگە جۋىق ارزانداتۋعا مۇمكىندىك جاسادىق. 18 جاسقا دەيىنگى بالالاردى تەگىن جول جۇرەتىن قىلدىق. ەندى پريشاحتينسك تۇرعىندارىنىڭ ۇيىنە جەتۋى ءۇشىن اۆتوبۋستاردىڭ جۇمىس ۋاقىتىن 21.00-گە دەيىن ۇزارتۋ ماسەلەسى عانا قالدى. قالاارالىق اۆتوبۋستاردى دا جاڭارتۋ كوزدەلگەن. جىل سوڭىنا دەيىن بارلىعى 33 كولىك ساتىپ الامىز, سەگىزى ەڭ سۇرانىسقا يە باعىتتاردىڭ ءبىرى «قاراعاندى – تەمىرتاۋ» باعىتىنا شىعادى. جاقىن ارادا بالقاش قالاسىنىڭ دا اۆتوبۋس پاركى جاڭارادى. №5 اۆتوپاركتىڭ يەلەرى سول جەردە دە جۇمىس ىستەيدى», دەدى اكىم.
قازىر اۆتوپارك تەحنيكالارىنىڭ 80 پايىزى جاڭارتىلعان. مۇنداي باعىتتاعى جۇمىستار ءالى جالعاسا بەرەدى.
قاراعاندى وبلىسى
