جەر استىندا 227 ادام بولعان. باسىم كوپشىلىگى جەر بەتىنە شىعارىلدى. ءتورت كەنشى ءالى تابىلعان جوق. ەۆاكۋاتسيالانعانداردىڭ سەگىزى كومىرتەگى توتىعىمەن ۋلانعان. ەكى كەنشىنىڭ جاعدايى اۋىر. ولار قاراعاندىداعى پروفەسسور ح.ج.ماقاجانوۆ اتىنداعى كوپبەيىندى اۋرۋحاناعا جەتكىزىلدى. ال قالعانىنا قويىلعان دياگنوز: ورتاشا دەڭگەيدە ۋلانعان. ولارعا شاحتينسك قالاسىندا العاشقى كومەك كورسەتىلىپ, قاراعاندىداعى اۋرۋحاناعا جەتكىزىلدى. قازىر دارىگەرلەردىڭ باقىلاۋىندا.
– «قازاقستان» شاحتاسىندا زارداپ شەككەن ەكى ادام پروفەسسور ح.ج.ماقاجانوۆ اتىنداعى كوپبەيىندى اۋرۋحاناسىنا جەتكىزىلدى. قابىلداۋ ءبولىمىنىڭ دارىگەرلەرى ناۋقاستاردىڭ جاعدايىن تەكسەردى. الدىن الا دياگنوز – شاحتا گازدارىمەن جەدەل ينگالياتسيالىق ۋلانۋ, ونىڭ ىشىندە اۋىر كومىرتەگى توتىعىمەن ۋلانۋ, توكسيكو-گيپوكسيالىق ەنتسەفالوپاتيا, ۋىتتى برونحيت. ولار رەانيماتسيا بولىمشەسىنە جاتقىزىلدى, – دەدى اتالعان اۋرۋحانانىڭ توكسيكولوگيا بولىمشەسىنىڭ مەڭگەرۋشىسى, قاراعاندى وبلىسىنىڭ باس شتاتتان تىس توكسيكولوگى ساۋلە سماعۇلوۆا.
وكىنىشكە قاراي, ءتورت كەنشى تابىلماي جاتىر. ىزدەستىرۋ جۇمىستارىنا قويۋ ءتۇتىن كەدەرگى كەلتىرۋدە. بۇل تۋرالى «ارسەلورميتتالتەمىرتاۋ» تاۋ-كەن سەگمەنتى اتقارۋشى ديرەكتورىنىڭ ورىنباسارى سەرگەي وگاي ءمالىم ەتتى.
– ساعات 16:40 جاعداي بويىنشا 5 جۇمىسشى ىزدەستىرىلىپ جاتىر. ىزدەۋ جۇمىستارىمەن ديسپوزيتسيا بويىنشا شاحتادا ورنالاسقان 12 بولىمشەنىڭ 5-ەۋى اينالىسادى. جۇمىسشىلاردى ىزدەۋگە تاۋ-كەن ورنىنداعى قالىڭ ءتۇتىن كەدەرگى كەلتىرىپ وتىر. قوسىمشا اقپارات تاعى بەرىلەدى, – دەيدى سەرگەي وگاي.
«قازاقستان» شاحتاسىندا بولعان اپاتتاردىڭ ءبىر پاراسى مىناداي: 2017 جىلى 31 تامىزدا تاڭعى ساعات 04:21-دە شاحتادا كەنەت كومىر مەن گاز اتقىلاعان. سول ۋاقىتتا جەردىڭ استىندا 136 ادام بولعان. وكىنىشكە قاراي, ۇشەۋى قازا تاپتى. 2020 جىلدىڭ اقپان ايىندا ءدال وسى شاحتادا ءورت شىعىپ, جۇزدەن اسا ادام سىرتقا شىعارىلعان بولاتىن. ءجۇز مەتر تەرەڭدىكتەگى كومىر القابى جارىعىنان مەتان شىعىپ, ارتى ورتكە ۇلاسقان. ابىروي بولعاندا, كەنشىلەر امان قالعان ەدى.
اتالعان شاحتا الپاۋىت كومپانيا «ارسەلورميتتال تەمىرتاۋعا» قارايدى. قاراپ وتىرساڭىز, مۇنداي اپاتتى جاعدايلار, وقىس وقيعالار ءجيى ورىن الادى. ءتىپتى, جىلدا دەسەك تە جاڭىلمايمىز. بىلتىر دا وسى كومپانياعا تيەسىلى ابايداعى «لەنين» شاحتاسىندا مەتان جارىلىپ, 5 كەنشى قازا بولعان ەدى. سوندا كومپانيانىڭ اتقارۋشى ديرەكتورى ۆيدجاي گوەل الداعى ۋاقىتتا قايعىلى جاعداي قايتالانباس ءۇشىن كومپانيانىڭ شارالار كەشەنىن قابىلدايتىنىن ايتقان بولاتىن. كەشەگى وقيعا جارىلىس ەمەس, ورتتەن تۋىنداپ وتىر. دەگەنمەن قاۋىپسىزدىك باستى باقىلاۋدا بولۋى كەرەك ەمەس پە؟
«جۇمىستى جاقسارتۋ ءۇشىن سىرتتان ساراپشىلار تارتىلادى. 1 ملرد دوللار كولەمىندەگى ينۆەستيتسيا ەندىگى ناتيجەسىن بەرە باستادى. بۇل قاراجاتتار جۇمىسشىلارىمىزدىڭ قاۋىپسىزدىگىن, قورشاعان ورتانى قورعاۋعا جانە قۇرال-جابدىقتى جاڭعىرتۋعا جۇمسالادى», دەگەن ەدى ۆيدجاي گوەل.
بىراق وسى تۇستا «ارسەلور» انتقا بەرىك پە دەگەن ورىندى وي كەلەدى. قاراعاندى شاحتالارىنىڭ مۇنداي اپاتتى جاعدايدان ارىلاتىن كۇنى بار ما؟ الپاۋىت كومپانيانىڭ قاراعاندى شاحتالارىنا يەلىك ەتكەن جىلدارداعى اپاتتى جاعداي بويىنشا ناقتى ستاتيستيكا ايتىلمايدى. جەتى قات جەر استىنداعى ەڭبەك ەتىپ جۇرگەن كەنشىلەردىڭ تاعدىرىنا كەپىل بولا الماي وتىرمىز. وكىنىشتى, ارينە...
قاراعاندى وبلىسى
