فوتو: Akorda.kz
كەڭەسكە پرەمەر-مينيستر, قارجى-ەكونوميكالىق بلوكقا جاۋاپتى مەملەكەتتىك ورگانداردىڭ جانە ۇلتتىق بانكتىڭ, جوعارى اۋديتورلىق پالاتانىڭ باسشىلارى قاتىستى.
پرەزيدەنتكە الەمدىك ەكونوميكاداعى ترەندتەر, ەلىمىزدىڭ الەۋمەتتىك-ەكونوميكالىق دامۋىنا جاسالعان بولجامدار, سونداي-اق 2024-2026 جىلدارعا ارنالعان رەسپۋبليكالىق بيۋدجەت جوباسىنىڭ پارامەترلەرى تۋرالى مالىمەت بەرىلدى.
مەملەكەت باسشىسى تەڭگەرىمدى ماكروەكونوميكالىق ساياسات جۇرگىزۋ, مەملەكەتتىڭ الەۋمەتتىك سالادا قابىلداعان بارلىق مىندەتتەمەلەرىن ساقتاۋ ماڭىزدى ەكەنىنە نازار اۋدارىپ, جوسپارلانعان ينفراقۇرىلىمدىق جانە الەۋمەتتىك جوبالارعا, ەكونوميكانىڭ ناقتى سەكتورىن قولداۋعا جانە دامىتۋعا, جالپىمەملەكەتتىك شىعىندارعا, سونىڭ ىشىندە قورعانىس جانە قۇقىق قورعاۋ جۇيەلەرىنىڭ تيىمدىلىگىن ارتتىرۋعا باعىتتالعان شىعىنداردى تولىققاندى قارجىلاندىرۋ قاجەت ەكەنىن اتاپ ءوتتى.
كەڭەس قورىتىندىسى بويىنشا ۇكىمەتكە بيۋدجەت پروتسەسىنە باقىلاۋدى كۇشەيتۋ, ماكروەكونوميكالىق تۇراقتىلىقتى قامتاماسىز ەتۋ جانە مەملەكەتتىك ورگانداردىڭ قارجى جۇمساۋ ءتارتىبىن جەتىلدىرۋ جونىندە تاپسىرما بەرىلدى.
