ءوزىنىڭ كومانداسىمەن بىرگە بولشەك ساۋدادا ەسەپ-قيساپتى جەڭىلدەتەتىن باعدارلاما جاساپ جاتىر. راس, وسى كۇنى قاراعاندى كولەمىندە كوپتەگەن جاستىڭ ءتۇرلى كومپيۋتەرلىك باعدارلاما جاسايتىن قابىلەت-قارىمىن جالپاق جۇرت بىلە بەرمەيدى. ادىلدەي جاڭاشىلدىققا ۇمتىلعان جاستاردى كورىپ, بىلاي باعامدايدى ەكەنسىز: اقپاراتتىق تەحنولوگيانىڭ جىلىگىن شاعىپ, مايىن ىشەتىن بولاشاق دجوبس پەن تسۋكەربەرگتەر ارامىزدا ءجۇرۋى ابدەن مۇمكىن عوي, كىم بىلەدى؟..
وڭىردەگى جاستىڭ ءىت-تەحنولوگياعا تالاسى بار. وسىلاي بولجام جاساۋىمىزعا شاعىن نەسيە الىپ, كومپيۋتەرلىك باعدارلامانى جىلىكتەپ وتىرعان ءادىل ءمۇسيدىڭ جوباسى سەبەپ. جوبا ءساتتى اياقتالسا, بۋحگالتەرلەرگە شاراپاتى تيەدى.
جاقىندا 4 ملن 400 مىڭ تەڭگە شاعىن نەسيە العان ءادىل ءمۇسي قارقارالى اۋدانى قاراعايلى كەنتىندە تۇرادى. ول كومانداسىمەن بولشەك ساۋدادا ەسەپ-قيساپتى جەڭىلدەتۋگە مۇمكىندىك بەرەتىن باعدارلاما جاساپ جاتىر.
«شاعىن نەسيەنى IT-جوباعا الدىق. بۇل باعدارلاما بولشەك ساۋدانىڭ ىشكى ەسەبىن كاسسا بويىنشا وپەراتسيانى جانە قويماداعى بار تاۋاردىڭ قالدىعىن كورۋگە مۇمكىندىك بەرەدى. بارلىق العاشقى قۇجاتتى اۆتوماتتى تۇردە جۇرگىزەدى. ءار تاۋار ساتىلعان سايىن زاڭ جۇزىندە كەرەك باستاپقى قۇجاتتار اۆتوماتتى تۇردە شىعادى. باعدارلامانىڭ اياق الىسى جامان ەمەس. كودتاۋ ۇستىندەمىز. ديزاينىن, ماكەتىن قۇرىپ, الداعى ماركەتينگتىك ستراتەگيانى قۇراستىرۋعا كىرىستىك. ءبارى ويداعىداي بولسا, كەلەر جىلى باعدارلامانى سىناقتان وتكىزەمىز. كاسىپكەرلىكپەن اينالىسقانىما 5 جىل. وسى 5 جىلدا بيزنەسكە جانە كاسىپكەرلەرگە ارنالعان جەڭىل ءارى تۇسىنىكتى باعدارلاما جوق ەكەنىن ءتۇسىندىم. كوپتەگەن كاسىپكەر ماعان دۇكەندەرىنە, ءدارىحانالارىنا اۆتوماتتاندىرىلعان ارنايى بۋحگالتەرلىك ەسەپتى جۇرگىزەتىن, ياعني ساتىپ العاننان كەيىن قۇجاتتاردى اۆتوماتتى تۇردە دايىندايتىن باعدارلاما سۇرايدى. باعدارلامالار بار. بىراق ولار تولىق ەمەس. ءبىر فۋنكتسياسى بار, ەندى ءبىر فۋنكتسياسى جوق. ال ءبىزدىڭ باعدارلامادا كاسسا, قويما, بۋحگالتەريا تۇگەلدەي ءبىر-بىرىمەن كەرەكتى اقپاراتتى اۆتوماتتى تۇردە الماسادى. وسى كۇنگى نارىقتاعى باعدارلامالاردا ءبىز ۇسىنىپ وتىرعان فۋنكتسيالار جوق. كەزدەسسە دە, وتە قىمبات تۇرادى», دەيدى ءادىل مارات ۇلى.
قازىرگى ۋاقىتتا ويداعى جوباسىنا ءادىل كومانداسىمەن كىرىسكەن. الداعى ۋاقىتتا باعدارلاما ساتىلىمعا شىققاندا, تاعى دا 10 شاقتى ادامدى جۇمىسپەن قامتۋ جوسپارىنىڭ بار ەكەنىن دە جەتكىزدى. باعدارلامالارىنا باتىل كىرىسكەن ءادىل نەسيە الۋعا ءتيىستى قۇزىرلى ۇيىمداردىڭ كەڭەس بەرىپ, مەملەكەت قولداۋىن ايقىن سەزىنگەنىن ايتادى. كاسىپ ەتۋگە قۇلشىنىس بار دا, كەدەرگىگە كىدىرمەيتىندەرىنە قولداۋ كورسەتىلسە, قوپارىپ جۇمىس ىستەيتىندەرىنە سەنىمدى.
ءادىلدىڭ باعدارلاماشىلار توبى مۇنىمەن توقتاپ قالمايدى. كومانداداعى جىگىتتەر الىستى كوزدەپ وتىر. ءتول باعدارلامالارىنىڭ باعىن الەمدىك دەڭگەيدە سىناماق نيەتى بار.
«باعدارلامانى الەمدىك دەڭگەيگە دەيىن جەتكىزۋ جوسپاردا بار. ونىڭ بارلىعى تىنىمسىز ەڭبەك پەن ءبىراز ۋاقىتتى تالاپ ەتەدى. بيزنەستە كەڭ تاراعان باعدارلامالاردىڭ تاجىريبەسىنە سۇيەنە وتىرىپ, وتاندىق بيزنەسكە كەرەكتى قۇرالداردىڭ باعدارلاماسىن ۇسىنۋ ويىمىزدا», دەيدى ءادىل.
ءادىل – 22 جاستا. قارقارالى اۋدانى اققورا اۋىلىندا دۇنيەگە كەلگەن. قاراعايلى كەنتىندە №16 جالپى ءبىلىم بەرەتىن مەكتەپتى ويداعىداي بىتىرگەن. ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىن تاۋ-كەن ينجەنەرى ماماندىعى بويىنشا ءتامامداپ شىققان. اكەسى مارات مۋسين دە, اناسى جازگۇل سوۆەتقىزى دا ءوندىرىس سالاسىندا ەڭبەك ەتىپ ءجۇر. وقۋدى وزات بىتىرگەن ادىلگە دە وسى سالاداعى كومپانيالاردان بىرنەشە رەت شاقىرتۋ تۇسكەن. بىراق ءادىل IT سالاسى باعىتىن تاڭداپتى. ءبىز بىلگەن ءادىلدىڭ ىزگى الەمى ازىرگە وسى.
قاراعاندى وبلىسى
