سپورت • 17 تامىز, 2023

مەرگەندەر باكۋدە باق سىنايدى

270 رەت
كورسەتىلدى
2 مين
وقۋ ءۇشىن

ازەربايجاننىڭ باس شاھارى – باكۋدە نىسانا كوزدەۋدەن الەم چەمپيوناتىنىڭ جالاۋى جەلبىرەدى. 31 تامىزعا دەيىن سوزىلاتىن باسەكەلەر بارىسىندا قاتىسۋشىلار تاپانشا اتۋ, مىلتىق اتۋ, ستەند اتۋ جانە جىلجىمالى نىسانانى كوزدەۋدەن سايىسقا ءتۇسىپ جاتىر. وسى جارىستا پاريج وليمپياداسىنا جولدامالار ساراپقا سالىنادى.

مەرگەندەر باكۋدە باق سىنايدى

الەم چەمپيوناتىنىڭ اشىلۋ سالتاناتى «Baku Crystal Hall» امبەباپ كەشەنىندە ءوتتى. وعان سپورتشىلار مەن جانكۇيەر­لەردەن بولەك جەرگىلىكتى بيلىك باسىنداعى ازاماتتار مەن وسى سپورت ءتۇرىنىڭ ماماندارى قا­تىستى. العاشقى بولىپ ءسوز العان حالىقارالىق نىسا­نا كوزدەۋ فەدەراتسياسىنىڭ (ISSF) پرەزيدەنتى لۋچانو روس­سي: «كەيىنگى جىلدارى ازەرباي­جاندا سپورتتىڭ سان الۋان ءتۇرى بويىنشا كوپتەگەن ءدۇبىرلى دودالار اسا جوعارى دەڭ­گەيدە ۇيىمداستىرىلىپ ءجۇر. مەرگەندەر جارىسىنىڭ دا­رەجەسى دە بيىك بولاتىنىنا ەش كۇمانىم جوق. الداعى ەكى اپ­تادا ءبىز نىسانا كوزدەۋدىڭ بارلىق باعدارلاماسى بويىنشا ۇزدىكتەردى انىقتايمىز. پاريج وليمپياداسىنا دەيىن ءبىر عانا جىل قالدى. سول سەبەپتى وسى الەم چەمپيوناتىندا جولدامالاردىڭ باسىم بولىگى ساراپقا سالىنادى», دەپ مالىمدەدى.

كاسپي تەڭىزىنىڭ جاعالاۋىندا ەلىمىزدىڭ تۋى استىندا 26 سپورتشى ونەر كورسەتەدى. ولار: ەلدار يمانقۇلوۆ, ۆالەري راقىمجان, ماكسيم مازەپا, نيكيتا چي­ريۋكين, رۋسلان يۋنۋسمەتوۆ, ارتەمي كاباكوۆ, الەكسەي لوتارەۆ, ساۋلە الىمبەك, ولگا اكسەنوۆا, يرينا يۋنۋسمەتوۆا, ۆالەريا پوپەلوۆا (تاپانشا); يسلام ساتباەۆ, يۋري يۋركوۆ, كونستانتين مالينوۆسكي, يليا فەدين, ارينا التۋحوۆا, ەليزاۆەتا بەزرۋكوۆا, الەكساندرا لە, اناستاسيا گريگورەۆا (مىل­تىق); باقتيار ىبىراەۆ,  اندرەي حۋدياكوۆ, اسادبەك نازيركۋليەۆ, يليا زوتەەۆ, فاتيما يرنازاروۆا, زۋحرا يرنازاروۆا جانە الەك­ساندرا سادۋاقاسوۆا (جىلجىمالى نىسانا).

نىسانا كوزدەۋدەن ەلىمىزدىڭ ۇلتتىق قۇراماسى باكۋدەگى الەم چەمپيوناتىنا تىڭعىلىقتى دايار­لاندى. جىل باسىنان بەرى ولار يندونەزيا مەن ازەربايجاندا ۇيىمداستىرىلعان الەم كۋبوگىنىڭ كەزەڭدىك سايىستارىنا قاتىستى. قازاقستان رەسپۋبليكاسىنىڭ سپارتاكياداسىندا باق سىناپ,  قىتايدىڭ چەندۋ قالاسىندا الاۋى تۇتانعان جازعى دۇنيەجۇزىلىك ۋنيۆەرسيادادا ونەر كورسەتتى. سوڭعى وقۋ-جاتتىعۋ جيىنىن قۇرالايدى كوزگە اتقان مەرگەندەر ازەربايجاننىڭ گابالا قالاسىندا وتكىزىپ, وسى جاقتا شەبەرلىكتەرىن ابدەن شىڭدادى. ەندى ءبىز جەرلەستەرىمىز باكۋدە بارىنشا جاقسى ونەر كورسەتەدى دەپ ۇمىتتەنەمىز.

سوڭعى جاڭالىقتار