«كەيىنگى ەكى جىلدا پرەزيدەنتتىڭ ساياسي رەفورمالار باعدارلاماسى اياسىندا اۋىل اكىمدەرىن حالىقتىڭ ءوزى تىكەلەي سايلايتىن بولدى. وسى ۋاقىتقا دەيىن 1 668 اۋىل, اۋىلدىق وكرۋگ, اۋداندىق ماڭىزى بار قالا اكىمدەرى سايلاندى. ۇمىتكەرلەردىڭ 75 پايىزىن ساياسي پارتيالار ۇسىنسا, قالعان 25 پايىزى – ءوزىن-ءوزى ۇسىنۋشىلار. سونداي-اق سايلانعان اكىمدەردىڭ جارتىسىنان استامى (57,4%) بۇرىن مۇنداي قىزمەت اتقارماعان. بۇل – اۋىل اكىمدەرىنىڭ كورپۋسى ايتارلىقتاي جاڭاردى دەگەن ءسوز», دەپ جازدى ەرلان قارين.
مەملەكەتتىك كەڭەسشىنىڭ ايتۋىنشا, جەرگىلىكتى اكىمدەردىڭ قۇرامى دا ءبىرشاما «جاسارعان». بۇل جونىندە ول: «بۇگىندە سايلانعان اكىمدەردىڭ ورتاشا جاسى 45 جاستى قۇرايدى. الداعى جەكسەنبىدە, 20 تامىز كۇنى 3 وبلىستاعى 21 اۋىل اكىمىنىڭ سايلاۋى وتەدى. 2023 جىلدىڭ سوڭىنا دەيىن بارلىعى 199 ەلدى مەكەندە جاڭادان اكىمدەر سايلانادى. سولايشا, اۋىل اكىمدەرىن سايلاۋ ەلىمىزدىڭ ساياسي ومىرىندە قالىپتى قۇبىلىسقا اينالدى», دەپ جازدى.
