وبلىس ورتالىعىنداعى فەستيۆال جالعاسى كونفەرەنتسياعا ۇلاستى. الىس-جاقىننان كەلگەن جىراۋلار بۇقار بابانىڭ شىعارماشىلىعى حاقىندا وي الماستى. قازاق ۇلتتىق ونەر ۋنيۆەرسيتەتىنىڭ پروفەسسورى, جىراۋ الماس الماتوۆ بۇقار بابا مۇراسىنىڭ بۇگىنگى قوعامداعى وزەكتىلىگى جايىندا: «بۇقار جىراۋ – ءبۇتىن قازاقتىڭ, الاش بىرلىگىنىڭ كۇرەتامىرى. شىعارماشىلىعىندا ەلدىك ماسەلە قوزعالادى. ۇلت بولىپ ۇيىسۋدىڭ ماڭىزىن ءوزىنىڭ جىرلارىمەن جەتكىزگەن. ول حان الدىندا دا, قارا الدىندا دا تايسالماي سويلەگەن. بۇقار جىراۋ ءبىزدىڭ 1000 جىلدىق مادەنيەتىمىزدى بويىنا ءسىڭىرىپ, سونى جىرلارىنا ارقاۋ ەتكەن. بابا جىرلارى وزەكتىلىگىن ءالى جوعالتپادى. XXI عاسىرعا جەتكەن مۇرالارى ۇلتقا باعىت-باعدار نۇسقارىنا كۇمان جوق», دەدى ا.الماتوۆ.
ماڭعىستاۋ وبلىسىنان ارنايى كەلگەن اماندىق كومەكوۆ تە كومەكەي اۋليەنىڭ حالىقتىڭ مۇڭىن اشىق ايتقانىن, سول كەزدەگى ساياسي ماسەلەلەرگە بەل شەشىپ ارالاسقانىن اتاپ ءوتىپ, مۇنداي قايراتكەرلەردىڭ عاسىرلار بويى دارىپتەلە بەرۋى كەرەكتىگىن جەتكىزدى.
قالا تۇرعىندارى قاراعاندىنىڭ ورتالىق ساياباق ساحناسىندا ەلىمىزدىڭ ءار قيىرىنان كەلگەن جىراۋلار ونەرىن تاماشالادى. بۇل مەرەكەلىك ءىس-شارانىڭ ەرەكشەلىگى – بۇقار تولعاۋلى ءار ءوڭىردىڭ ماقامىندا جىرلاندى. جىرشى-جىراۋلاردىڭ كوشىن باستاپ كەلگەن الماس الماتوۆ ءوزىنىڭ ءتول تولعاۋىن ورىنداپ بەردى. قىزىلوردادان كەلگەن ۇلجان بايبوسىنوۆا بۇقار جىراۋدىڭ تولعاۋىن سىردىڭ ماقامىنا سالىپ ايتتى. ايتىسكەر اقىن, جىرشى ديدار قاميەۆ ارقانىڭ ماقامىمەن تولعادى.
بۇقار جىراۋ فەستيۆالى وسىدان ون شاقتى جىل بۇرىن ايتىسكەر اقىن ايتباي جۇماعۇلوۆتىڭ باستاماسىمەن قولعا الىنعان ەدى. سودان بەرى جىل سايىن ءداستۇرلى تۇردە ءوتىپ كەلەدى.
«بۇقارەكەڭ جىرلايدى» فەستيۆالى 2008 جىلدان بەرى وتكىزىلىپ كەلەدى. بۇقار جىراۋدىڭ 350 جىلدىعى بەس جىل بۇرىن حالىقارالىق دەڭگەيدە دۇركىرەگەن ەدى. بيىل 355 جىلدىعى رەسپۋبليكالىق اۋقىمدا ۇيىمداستىرىلدى», دەدى فەستيۆال ۇيىمداستىرۋشىسى ايتباي جۇماعۇلوۆ.
فەستيۆال قورىتىندىسى بويىنشا قاتىسۋشىلارعا ارنايى سىيلىقتار مەن العىسحاتتار تابىستالدى.
قاراعاندى وبلىسى
