اقساقال ءوزىنىڭ جاسى تۋرالى: «مەن – 69-دان ەندى استىم» دەپ ازىلدەيدى. ارداگەر ۆەلوشاباندوز ەلىمىزدىڭ ءبىرشاما بولىگىن ۆەلوسيپەدپەن ءجۇرىپ ءوتىپتى. قۇداي قۋات بەرسە, نەبارى ەكى ايدىڭ ىشىندە بۇكىل ەل اۋماعىن ارالايمىن دەپ وتىر.
– مەن شامامەن وسى جولى 6 مىڭ شاقىرىمدى باسىپ ءوتتىم. ورال, اقتوبە, جەزقازعان, قىزىلوردا, تۇركىستان, تاراز, وسكەمەن, سەمەي قالالارىندا بولدىم. ەندى قاراعاندىدان كەيىن استانا, كوكشەتاۋ, پەتروپاۆل, قوستاناي, اقتوبە قالالارىنا بارىپ, ساپاردى اتىراۋمەن اياقتايمىن دەپ ويلاپ وتىرمىن. كۇنىنە قانشا شاقىرىم ءجۇرىپ وتەتىنىمدى ءدال ايتۋ قيىن. مەنىڭ مەجەم – جەرگىلىكتى تەمىرجول ستانسالارى. ءبىر تەمىرجول ستانساسىنان ەكىنشىسىنە جالعايتىن جولدى قاداعالايمىن, – دەيدى ج.وتارعاليەۆ.
بۇل جولعى ساپارىن ۆەلوشاباندوز بەيبارىس سۇلتاننىڭ – 800, استانا قالاسىنىڭ – 25 جىلدىعىنا ارناپتى.
– 2017 جىلى العاش رەت ۆەلوسيپەدپەن شالقاردان اقتوبەگە دەيىن باردىم. بۇل, شامامەن, 350 شاقىرىم. ول ارالىقتى مەن 4-5 كۇندە ءجۇرىپ ءوتتىم. 2018 جىلى اقتوبەدەن شىعىپ, اتىراۋعا باردىم. كولىكتەردى ۇناتپايمىن. قايدا بارسام دا, مەنىڭ نەگىزگى تۇلپارىم, اينىماس سەرىگىم – ۆەلوسيپەد. مەن وعان ەنەرگيادان وزگە ەشتەڭە جۇمسامايمىن. موتورلى كولىك ساتىپ الساڭ, ونىڭ ماشاقاتى كوپ, مايىن اۋىستىرۋ كەرەك دەگەندەي. شىعىنى دا از ەمەس. ەندى الداعى ساپارىم – جامبىل دالاسى. ونداعى ميسسيامدى شۋ – مويىنتىنىڭ قوسىلعانىنا 70 جىل تولۋىنا ارناعىم كەلەدى, – دەيدى قاريا. ءسويتىپ, ەندىگى باعىتىن تاراز – تۇركىسىب, شۋ – سارىشاعان, مويىنتى باعىتى بويىنشا وزگەرتەتىنىن ايتتى.
جۇماباي اقساقال اقتوبەدەگى «Velo pulse» ۆەلوكومانداسىنا قوسىلىپ, ولارمەن بىرگە قالا بويىنشا ءتۇرلى شارالارعا قاتىسىپ, ساياحات تا جاسايدى. ارقاعا ات باسىن تىرەگەن اقساقالدى وبلىستىق دەنە شىنىقتىرۋ جانە سپورت باسقارماسى قۇرمەتپەن كۇتىپ الىپ, ءسات ساپار تىلەپ شىعارىپ سالدى.
قاراعاندى وبلىسى
