ويتكەنى بيىل ماۋسىم ايىندا باعدارلاما اياسىندا جەڭىلدىكپەن نەسيە الۋ مۇمكىندىگىن يەلەنگەن جاستاردىڭ ءبىر توبىنا سەرتيفيكاتتار سالتاناتتى تۇردە تاپسىرىلعان ەدى. سول سالتاناتتا وبلىس اكىمى ب.ابدىعالي ۇلى جاستار تاراپىنان اسا زور قىزىعۋشىلىق بايقالعانىنا بايلانىستى باعدارلامانىڭ جالعاساتىنىن جانە وعان قاتىسۋشىلاردىڭ اياسىنىڭ كەڭەيتىلە تۇسەتىنىن مالىمدەگەن ەدى.
شىنىندا دا, باعدارلامانىڭ العاشقى كەزەڭىندە 350-دەن اسا ءوتىنىش تۇسكەن ەكەن. تۇسكەن وتىنىشتەر تالاپقا سايكەس ىرىكتەلەتىنى ايتپاسا دا تۇسىنىكتى. العاشقى نەسيە يەلەنگەن جاستاردىڭ اراسىندا 55-ءى – ءبىلىم, 13-ءى دەنساۋلىق سالاسىنىڭ جاس ماماندارى بولىپ شىقتى. وبلىسقا اۋاداي قاجەتتى ماماندىق يەلەرىنىڭ باسپاناعا قول جەتكىزۋى تەك ولاردىڭ وزدەرى ءۇشىن عانا قۋانىش ەمەس ەكەنى دە تۇسىنىكتى.
شىلدە ايىنان بەرى وبلىستا باعدارلامانى جۇزەگە اسىرۋ ءۇشىن قوسىمشا قۇجاتتار قابىلداۋ ءجۇرىپ جاتىر. بۇل جولى وبلىس اكىمىنىڭ ۇسىنىسى بويىنشا كوممۋنالدىق كاسىپورىندار جۇمىسكەرلەرى دە, اۋىل شارۋاشىلىعى مەن مەملەكەتتىك قىزمەت سالالارىنىڭ وكىلدەرى دە اتالعان باعدارلاماعا قاتىسۋ مۇمكىندىگىنە يە بولدى. تەك بارلىعى تالاپقا ساي بولۋ كەرەك. ال تالاپتار قانداي؟ ەڭ باستىسى, جەڭىلدىكتى نەسيە الۋعا نيەت بىلدىرگەندەردىڭ جاسى ءوتىنىش بەرگەن ساتىندە 35-تەن اسپاۋى شارت. ۇلىتاۋ وبلىسىندا كەمى ءبىر جىل تۇراقتى تۇرعان جانە كەيىنگى 5 جىل مەرزىم ىشىندە ءوزىنىڭ دە, وتباسى مۇشەلەرىنىڭ دە ەل تەرريتورياسىندا تۇرعىن ءۇيىنىڭ بولماۋى سونداي-اق ءتيىستى سالاداعى كەمى ءبىر جىل كولەمىندەگى زەينەتاقى تولەمى ۇزدىكسىز تولەنىپ تۇرعان تۇراقتى جۇمىس اتقارۋى جانە ت.ب. تالاپتار.
بۇل باعدارلاما « ۇلىتاۋ وبلىسىنىڭ الەۋمەتتىك-ەكونوميكالىق دامۋىنىڭ كەشەندى جوسپارىنا» سايكەس 2022-2026 جىلدار ارالىعىن قامتيدى.باعدارلامانى جۇزەگە اسىرۋ ءۇشىن وبلىستىق بيۋدجەتتەن – 500 ملن, بانك تاراپىنان 250 ملن تەڭگە قاراستىرىلعان.«UlytauZhastary» باعدارلاماسىنىڭ نەسيەسى 5 پايىزدىق مولشەرلەمەمەن 20 جىل مەرزىمگە بەرىلەدى. نەسيە الۋشى العاشقى 10 پايىزدىق جارناسىن تولەۋى قاجەت.
جاڭاارقا اۋدانىنداعى ورازالى جۇمابەكوۆ اتىنداعى تىرەك مەكتەبىنىڭ دەنە شىنىقتىرۋ ءپانى مۇعالىمى ايان بۇلكەنوۆ – وسى باعدارلاما ارقىلى باسپانالى بولعان جاستاردىڭ ءبىرى.
– وتە كەرەكتى باعدارلاما, جاستاردى قولداۋدىڭ ناقتى كورىنىسى دەپ بىلەمىن. قويىلاتىن تالاپتارى – جەڭىل, جيناقتايتىن قۇجاتتارى دا كوپ ەمەس. باعدارلاما ارقىلى باۋ-باقشا وسىرۋگە اسا قولايلى, اۋلاسى كەڭ 4 بولمەلى پاتەرگە يە بولدىم. قۋانىشتىمىن, – دەيدى ول.
جەڭىلدىگى بار نەسيە ارقىلى باسپاناعا قول جەتكىزىپ, قۋانىشقا كەنەلەتىن جاستار قاتارى مولايا ءتۇسسىن!
ۇلىتاۋ وبلىسى
