ءبىلىم وشاقتارىنداعى وقۋشى ورنىنىڭ تاپشىلىعى استانانىڭ ىرگەسىندەگى ەلدى مەكەندەردە دە بار. بۇل تۇرعىندار سانىنىڭ جىل سايىن ەسەلەپ وسۋىنە بايلانىستى. بۇگىنگى تاڭدا وڭىردە ءۇش اۋىسىمدا ءبىلىم بەرەتىن ەكى مەكتەپ – ارشالى اۋدانىنداعى جىبەك جولى اۋىلىنىڭ مەكتەبى مەن قوسشى قالاسىنداعى №2 ءبىلىم وشاعى. كۇرمەۋى قيىن وسى ءتۇيىندى شەشۋ ءۇشىن جىبەك جولى اۋىلىندا 300 ورىندىق, قوسشى قالاسىندا 1 200 ورىندىق مەكتەپ قۇرىلىسى جۇرگىزىلىپ جاتىر. ءبىلىم وشاقتارى وسى جىلدىڭ تامىز ايىندا تولىق اياقتالىپ, وقۋشىلاردى قابىلداماق.
سونداي-اق اپاتتى مەكتەپتەردىڭ دە بار ەكەندىگىن ايتا كەتۋگە ءتيىسپىز. مۇنداي مەكتەپتىڭ سانى – ەكەۋ. ولاردىڭ بىرەۋى جارقايىڭ اۋدانىنداعى ءبىرسۋات اۋىلىندا بولسا, ەكىنشىسى ءبىرجان سال اۋدانىنا قاراستى بۇلاندى ەلدى مەكەنىندە. بۇلاندى اۋىلىندا 800 ورىندىق مەكتەپ قۇرىلىسى جۇرگىزىلىپ جاتىر. جاڭا ءبىلىم وشاعى 2023 جىلى پايدالانۋعا بەرىلەدى دەپ مەجەلەنىپ وتىر. ال ءبىرسۋات اۋىلىنداعى مەكتەپ عيماراتىنا كۇردەلى جوندەۋ جۇمىسىن جۇرگىزۋ ءۇشىن جوبالىق-سمەتالىق قۇجاتتاما ازىرلەندى. جاڭا جوبانىڭ قۇنى – 434,9 ملن تەڭگە. قازىر ساراپتامادان وتكىزىلۋ ۇستىندە.
وسى جىلى وڭىردە 4 052 ورىندىق 10 ءبىلىم وشاعى سالىنىپ جاتىر. وڭىردەگى ءبىلىم سالاسىنا تىڭ سەرپىن بەرەتىن قامقورلىق دەسەك تە ارتىق ەمەس. ماسەلەن, قوسشى قالاسىندا 1 200, تسەلينوگراد اۋدانىنا قاراستى شۇبار اۋىلىندا 300, وتەمىس اۋىلىندا 1 120, جاڭاجول اۋىلىندا 80, ارشالى اۋدانىنا قاراستى جالتىركول اۋىلىندا 300, كوكشەتاۋ قالاسىندا 300 جانە 1 200 ورىندىق ەكى مەكتەپ سالىنباق. سونداي-اق ستەپنوگور قالاسىنىڭ ىرگەسىندەگى بەستوبە كەنتىندە 300 ورىندىق ءبىلىم وشاعى بوي كوتەرمەك. جاڭا وقۋ جىلىنا دەيىن ۇزىن-ىرعاسى 2 092 ورىندىق بەس بىردەي ءبىلىم وشاعى پايدالانۋعا بەرىلەدى دەپ جوسپارلانىپ وتىر. وسىنداي جاعىمدى جاڭالىقتارعا جەكە ينۆەستيتسيالار ەسەبىنەن قوسشى قالاسىندا سالىنعان 1 500 ورىندىق مەكتەپتى قوسساڭىز, بيىلعى جىلى قىرۋار شارۋا اتقارىلعاندىعىنا كوز جەتكىزەر ەدىڭىز.
ءبىلىم سالاسىنداعى ىلگەرىلەۋگە «جايلى مەكتەپ» ۇلتتىق جوباسى سەپتىگىن تيگىزىپ جاتىر. مەكتەپتەردەگى ورىن تاپشىلىعىن جويۋ ماقساتىندا وڭىردە 2025 جىلعا دەيىن 22,6 مىڭ وقۋشىعا ارنالعان 18 مەكتەپ سالۋ كوزدەلگەن. ويعا العان شارۋا وڭىنان وڭعارىلسا, ءبىلىم سالاسى سونى سەرپىنگە يە بولماق.
اقمولا وبلىسى
