فوتو: اسحات ورالوۆتىڭ تەلەگرام پاراقشاسى
«جاقىندا ءبىزدىڭ مينيسترلىك اقىن شىعارمالارىنىڭ ەكى تومدىق جيناعىن شىعارىپ, استاناداعى ۇلتتىق كىتاپحانادا تۇساۋكەسەرىن ۇيىمداستىرعان بولاتىن. سوندىقتان ءبىز وسى كىتاپتاردى وڭىرلەرگە تاراتىپ, بارشا قازاقستاندىقتارعا قولجەتىمدى بولۋى ءۇشىن كۇش سالامىز», دەدى ءوزىنىڭ تەلەگرام پاراقشاسىندا اسحات ورالوۆ.
مادەنيەت جانە سپورت ءمينيسترى پاۆلودار وبلىسىنىڭ باياناۋىل اۋدانىندا وتكەن عۇلامانىڭ 165 جىلدىعىنا ارنالعان ىس–شارالارعا توقتالا كەلە: «قر پارلامەنتى ءماجىلىسىنىڭ سپيكەرى ەرلان قوشانوۆ مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ, سالتاناتتى ءىس-شارانى اشتى. ەستەرىڭىزگە سالايىن, ساناۋلى كۇن بۇرىن عانا پرەزيدەنت پاۆلودار وبلىسىنا كەلىپ, ماڭىزدى تاپسىرمالارى قالاي ورىندالىپ جاتقانىن جەكە باقىلاپ كەتكەن ەدى», دەپ اتاپ ءوتتى.
«مۇنداي ءىس-شارالاردىڭ ماقساتى - حالقىمىزدىڭ ۇلى تۇلعالارىنىڭ رۋحاني مۇراسىن ساقتاۋ جانە ناسيحاتتاۋ. ءماشھۇر ءجۇسىپ كوپەي ۇلى قازاق مادەنيەتىنە ۇلكەن ۇلەس قوسىپ, ۇلتتىق قۇندىلىقتارىمىزدى نىعايتۋ ءۇشىن ەڭبەك ەتتى. مۇنداي ادامدار, ءسوزسىز, بۇكىل قازاق حالقىنىڭ ماقتانىشى. سوندىقتان ءبىزدىڭ مينيسترلىك اسىلدارىمىزدان قالعان مول مۇرانى بولاشاق ۇرپاققا جەتكىزۋ باعىتىندا جۇمىسىن ودان ءارى جالعاستىرادى», دەپ جازدى مينيستر ءوزىنىڭ تەلەگرام پاراقشاسىندا.
