ۆيتسە-ءمينيستردىڭ ايتۋىنشا, ەلىمىزدىڭ حالىقتىڭ جوعارى بىلىممەن قامتىلۋى بويىنشا دەڭگەيى رەسەيدەن دە تومەن بولىپ شىقتى.
«ۇلتتىق ستاتيستيكا بيۋروسىنىڭ 2021 جىلعى مالىمەتىنە سۇيەنسەك, قازاقستاندا تۇلەكتەردى جوعارى بىلىممەن جالپى قامتۋ 62%-دى قۇرايدى, بۇل كوپتەگەن ەلدەن ەداۋىر تومەن (رەسەي – 82%, وڭتۇستىك كورەيا – 94%, يرلانديا – 78%, بەلارۋس – 81%). ال جالپى ەلىمىزدە جوعارى ءبىلىمى بار ازاماتتاردىڭ ستاتيستيكاسىنا قاراساق, ەرلەردىڭ ۇلەسى 17%, ايەلدەردىڭ ۇلەسى 21%-دى قۇرايدى. بۇل – تومەن كورسەتكىش. وسى جايتتاردى ەسكەرسەك, الەۋمەتتىك جەلىدەگى گرانت سانىن ازايتۋ تۋرالى ايتىلىپ جاتقان سىن قانشالىقتى دۇرىس دەگەن سۇراق تۋىندايدى. بيىل ەلىمىزدە 174 مىڭنان استام تۇلەك مەكتەپ ءبىتىردى. سونداي-اق 140 مىڭعا جۋىق تۇلەك كوللەدج ءبىتىردى. ولاردىڭ ىشىندە 94 مىڭ تۇلەك گرانت كونكۋرسىنا قاتىستى. ال بولىنگەن گرانت سانى – 73 مىڭ. ستاتيستيكاعا قاراساق, گرانت نەگىزسىز ءبولىندى دەپ ايتۋعا كەلمەيدى. كەرىسىنشە, ۇكىمەتتەن بولىنگەن گرانتتار جاستاردى شەتەلدەن تەگىن وقۋ ىزدەمەي, ەلىمىزدە قالۋىنا جانە حالىقتىڭ جوعارى ءبىلىم جەڭگەيىن ارتتىرۋعا سەپتىگىن تيگىزەرى ءسوزسىز», دەپ جازدى قۋانىش ەرعاليەۆ Facebook جەلىسىندەگى جەكە پاراقشاسىندا.
سونىمەن قاتار ول جاستارعا مەملەكەتتەن كورسەتىلەتىن الەۋمەتتىك قولداۋدىڭ ماڭىزدىلىعى تۋرالى جازدى.
«تاعى ءبىر ايتا كەتەرلىك ماڭىزدى جايت, تۇلەكتەرگە بولىنگەن گرانتتاردىڭ جارتىسىنان كوبى الەۋمەتتىك وسال ساناتتارىنداعى ادامدارعا ارنالعان. كۆوتالاردىڭ ۇلەسى مەملەكەتتىك گرانتتاردىڭ جالپى سانىنىڭ 53,5%-ىن قۇرايدى, ونىڭ ىشىندە 35%-ى اۋىل جاستارىنا بولىنگەن. الەۋمەتتىك وسال توپتارعا بارلىعى 9 كۆوتا قاراستىرىلعان. ەلىمىزدە جوعارى ءبىلىم بارلىعىنا بىردەي قولجەتىمدى بولۋى ءتيىس. وسى ورايدا ۇكىمەتتەن گرانتتاردىڭ ءبولىنۋى, الەۋمەتتىك قولداۋ كورسەتىلۋى جاستاردىڭ دامۋىنا اسەر ەتەدى. مەملەكەت تاراپىنان جاستايىنان قولداۋدى سەزىنىپ وسكەن بالا بولاشاقتا دا ەلىمىز ءۇشىن ايانباي ەڭبەك ەتەرى ءسوزسىز. ونى ءوز تاجىريبەمنەن جاقسى بىلەمىن», دەدى ءمينيستردىڭ ورىنباسارى.
ءوز جازباسىندا قۋانىش ەرعاليەۆ مەكتەپ بىتىرگەندە العاشقى گرانتىن قالاي جەڭىپ العانى تۋرالى ەستەلىگىمەن دە ءبولىستى.
«العاش جوعارى وقۋ ورنىنا گرانت جەڭىپ العانداعى سەزىمدى ۇمىتۋ مۇمكىن ەمەس. مەكتەپ كەزىمدە رەسپۋبليكالىق, حالىقارالىق وليمپيادالارعا قاتىستىم. 11-سىنىپتا ۋنيۆەرسيتەتكە وقۋعا ءتۇسۋ ءۇشىن ەمتيحانعا دايىندالعان جوقپىن, ويتكەنى حالىقارالىق وليمپيادا جۇلدەگەرلەرىنە مەملەكەتتىك گرانت بولىنەتىن. بىراق سول جىلى بۇل ەرەجە وزگەرىپ, ءبىز دە گرانت كونكۋرسىنا قاتىسۋ ءۇشىن تەست تاپسىرۋىمىز كەرەك بولدى. بۇل وزگەرىس مەن ءۇشىن كۇتپەگەن جاعداي بولدى, بىراق مەكتەپ قابىرعاسىندا العان بىلىمىمە سەنىپ, دايىندىقسىز تەست تاپسىردىم, ناتيجەسىندە 94 بالل الىپ شىقتىم (120 بالدان). ءبىر قىزىعى, كونكۋرس ناتيجەسى شىققاندا مەنىڭ اتى-ءجونىم ەكى جاقتا دا جاريالاندى. ياعني كۇتپەگەن جەردەن مەديتسينالىق ۋنيۆەرسيتەتتىڭ گرانتىمەن (جالپى كونكۋرس) قاتار حالىقارالىق وليمپيادا جۇلدەگەرى رەتىندە دە گرانت يەگەرى اتاندىم. بۇل مەن ءۇشىن ءومىر بويى ەستە قالارلىق ەرەكشە ساتتەردىڭ ءبىرى بولدى. ماگيستراتۋرا مەن دوكتورانتۋرانى شەتەلدە وقىدىم. وندا دا مەملەكەتتىڭ قولداۋىمەن «بولاشاق» باعدارلاماسى اياسىندا ءبىلىم الدىم. مەن سياقتى اۋىلدىق جەردەن شىققان قاراپايىم جاستارعا مۇنداي مۇمكىندىك ءتيىمدى الەۋمەتتىك ليفت بولىپ تابىلادى. گرانت يەگەرلەرىن, اتا-انالارى مەن ۇستازدارىن شىن جۇرەكتەن قۇتتىقتايمىن. ەلىمىزدىڭ بولاشاعى جارقىن بولسىن», دەلىنگەن جازبادا.
